පෙම්වතිය සමඟ ආරවුල් වී දහනව හැවිරිදි සිය පෙම්වතියගේ හිසට කළු ගලකින් පහරදී ඝාතනය කළැයි කියන 21 හැවිරිදි පෙම්වතකු අත්අඩංගුවට ගත් බව පයාගල පොලිසිය පවසයි.
මෙම සිදුවීමෙන් මියගොස් ඇත්තේ පයාගල, පහළගොඩ ප්‍රදේශයේ පදිංචි දැරණියගලගේ තරුෂි සෙව්මිණී නමැති 19 හැවිරිදි තරුණියකි.
ජංගම දුරකතන අලෙවිසලක සේවයේ නියුතු සැකකාර තරුණයා සහ මරණයට පත් තරුණිය පෙරේදා (29) රාත්‍රී පයාගල, දියලගොඩ ප්‍රදේශයේ මුහුදු වෙරළේ කතාබස් කරමින් සිට ඇති අතර එහිදී ඇතිවූ බහින්බස්වීමකදී මෙම ඝාතනය සිදුව ඇතැයි පොලිසිය පවසයි.
සැකකාර තරුණයා වෙනත් තරුණියක හා සම්බන්ධයක් පවත්වන බවට මරණයට පත් තරුණිය දැනගෙන ඇති බවත් ඒ සම්බන්ධයෙන් විමසීම සඳහා තරුණයා සේවයේ නියුතු වෙළෙඳසලට ගොස් ඇති එම තරුණිය සැකකරුගේ ජංගම දුරකතනය සහ යතුරුපැදියේ යතුර රැගෙන ‘මේවා ගන්න ඕන නම් බීච් එකට එන්න’ යැයි පවසා පිටව ගොස් ඇති බවත් මූලික විමර්ශනවලදී අනාවරණය වී ඇතැයි පොලිසිය කියයි.
ඒ අනුව පසුදින රාත්‍රියේ මුහුදුවෙරළට ගොස් ඇති සැකකරු එම තරුණිය සමඟ බහින්බස්වී ඇති බවත් එහිදී සැකකරු තරුණියගේ හිසට ගලකින් පහරදී ඇති බවත් පොලිසිය සඳහන් කරයි.
ඉන්පසු ඔහුගේ මිතුරකු මාර්ගයෙන් 1990 සුවසැරිය ගිලන් රථ සේවයෙන් තම පෙම්වතියව කළුතර නාගොඩ ශික්ෂණ රෝහලට ඇතුළත් කර ඇති බවත් එහිදී තරුණිය මියගොස් ඇති බවත් පොලිසිය පවසයි.
සැකකරු තරුණියව රෝහල්ගත කර පසුව ඔහුගේ නි‍ෙවසට ගොස් වෙනත් ඇඳුමකින් සැරසී තරුණියගේ නි‍ෙවසට ගොස් ඇගේ මවත් නැඟණියත් සමඟ රෝහලට පැමිණ ඇති බවත් විමර්ශනවලදී වාර්තා වී ඇතැයි පොලිසිය සඳහන් කරයි.
සැකකරු කළුතර මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි.
පයාගල ස්ථානාධිපති ප්‍රධාන පොලිස් පරීක්ෂක තුෂාර ජයසේකර මහතාගේ උපදෙස් පරිදි අපරාධ අංශ ස්ථානාධිපති පොලිස් පරීක්ෂක ඒ.ඩී.ආර්.පී. අලුත්ගේ මහතාගේ ප්‍රධානත්වයෙන් උප පොලිස් පරීක්ෂක ඔස්මන් ද සිල්වා, කොස්තාපල්වරුන් වන (77827) සහ ජයරත්න (101523) යනාදීහු පරීක්ෂණ පවත්වති.
