සිරී මං හිතන්නේ පුතා එන්න ඇති ඔයා ළඟට. අන්තිම මොහොතේ එයා නවතින්නේ නෑ කියලා තේරුණාම මං මඟින්මගටම කිව්වෙ ඔයා ළඟට යන්නම කියලා. ගහන්න බණින්න යන්න එපා සිරී දරුවට. මගේ දරුවා නිසා කියනවා නෙවෙයි ඒකගේ අතේ ඇත්තටම වරදක් නෑ. ඒක මං සහසුද්දෙන් දන්නවා. ඒ වෙලාවේ මං එතන හිටියා සිරී ඒත් අනේ කරුමෙට පුතාව මට නවත්ත ගන්න බැරි වුණා. මං පොලිසියට කිව්වා වුණත් මං දෑහින් දැක්ක දේ. එයාලා පුතාට සමාවක් දෙන්න ලෑස්තියක් තිබුණේ නෑනේ. ඔයා නොදන්නවට සුදූ කොහොමත් නහයට නාහන එකී. ඔයා වගේ නෙවෙයි මං වගෙත් නෙවෙයි අනේ මන්ද කොහෙන් ආව ඇට්ටරකමක්ද කියල. පොඩි කාලේ හිටංම අයියා එක්ක කෙක්ක වගේ පැටලෙනවා. අනේ කොල්ලා අහිංසකයා. ඒකා පණ ඇරලා නංගි පොඩ්ඩට ආදරෙයි. ඒකිගේ හැම කෙනෙහිලිකමක්ම ඔහේ ඉවසනවා. සුදූ ඉස්කෝලෙ යනකොටත් පොඩි හරි අඩු පාඩුවක් වුනොත් ගෙදර අඩි පොළවේ හප්පනවා. ඒකට කොල්ලා කකුලේ ඇඟිලි දහයෙන් අටක්ම එළියේ තිබුණත් සපත්තු දෙක දාගෙන යනවා හූම් නොකියා. ඔහෙත් ඉතින් උන් හිටි ගමන් අපිව අත්ඇරලා ගියහම මං අසරණ වුණහැටි ඉතින් අමුතුවෙන් කියන්න ඕන නෑනේ. ඉන්නකං කෑවා බිව්වා මිසක් ඉතුරුවක් කර ගන්න තරං වුවමනාවක් තිබුණේ නෑනේ.
ගෙදර තිබුණ මැසිමේ දූවිලි පිහලා එළියට අරං කුලියට ඇඳුම් මහලා තමයි දරුවෝ දෙන්න මං ලොකු කර ගත්තේ. ඒ කාලේ නං අර ඔයාගේ බඩ බැඳ ගත්ත යාලුවංගෙන් උදව් එමට තිබුණා. පස්සෙන් පහු හැමදාම බිං කලුවරත් එක්ක මෙහෙ හක්කලං කරන්න ගන්න කොට මං ඒ උදව්වලින් කමක් නෑ කියලා හොඳ දෙකක් කථා කරා එයාලට. ඊට පස්සේ නං ජීවිතේ හරි අමාරු වුණා සිරී. බොරු මොකටෙයි කෑවට වඩා නොකාපු දවස් තමයි වැඩි. දරුවෝ දෙන්නට කන්න දීලා ඇල්වතුර බීලා රෑ එළි කර ගත්ත දවස් එමටයි.
“අපේ අම්මා ලස්සනට සාරි හැට්ට මහනවා ටීච”
ඉස්කෝලෙ ගිහින් පුතා දීලා තිබුණ පණිවිඩේට
ටීචර්ලා ගොඩක් මට ඕඩර් එවලා තිබුණයින් යාන්තං ඔළුව උස්ස ගත්තා. හන්දියේ සැලුන් එකෙනුත් මඟුල් සාරි හැට්ට මල් කුමාරි ගවුං වගේ ඕඩර් ආවේ ටීචර්ලගේ කටින් කට ගිය වචනවලට පින් සිද්ධ වෙන්න. අනේ රෑ තිස්සේ මං මහනකං ඈනුං ඇර ඇර මයේ පුතා ඉන්නවා සිරී මට තනි රකින්න. බොත්තං අල්ලන්න හක් අල්ලන්න එහෙමත් හරි හරියට මට උදව් කරා. පංගුවක් දාට මට මැසිමෙන් ඔළුව අහකට ගන්න බැරි තරං වැඩ ආවම කොල්ලා බතක් මාළුවක් උයලා ගන්නත් පුරුදු වුණා. ඒකා ඔය සේරම කරනකං සුදූ පුටුවක් උඩ දපාගෙන ටීවී එකට ඇහැ දී ගෙන ඉන්නවා. මං ඒකිට බැණ්නම කොල්ලා මට බණිනවා
“නංගී තාම පුංචි එකී අම්මේ”කියලා.
කොහොමින් කොහොම හරි පුතා විස්ස විද්‍යාලයට යනකොට කෙල්ලත් ඒ නවයක් අරං මහ ඉහළින් සාමාන්‍ය පෙළ පාස් වුණා. ඊට පස්සේ ඉතින් ඒකිට ඕන වුණා ටවුමේ ඉස්කෝලෙට යන්න.
“අයියා කැම්පස් ගියෙත් ඔය ඉස්කෝලෙ ඉඳන් වෙච්චි. උඹ මොකටද උසස් පෙළට ටවුමේ ඉස්කෝලෙට යන්න ම ඕන කියන්නේ”
“අම්මේ අයියා කරේ කොමස්. මට කරන්න ඕන සයන්ස්”
පුරුදු විදිහටම ඒකි යකා නටන්න ගත්තා. පුතා ඒ වෙනකොට අමතර පන්ති කරලා එයාගේ වියදම හොයා ගත්ත නිසා තමයි මං ඒකිව ටවුමට යවන්න හිත හදා ගත්තේ. අනේ ඔයාට මොකට බොරු කියනවද සිරී ඕකි ටවුමට ගියා කියලා උදේ හවස පස්සේ වැටිලා පරිස්සං කරන්න මට යන්න නං බැරි වුණා මේ වැඩ කන්දරාවත් එක්ක. ඒත් ඉතින් ආ පස්සට හැරිලා කල්පනා කරලා බලද්දී මේ වෙච්ච සන්තෑසිය මට නවත්ත ගන්න තිබුණා කොහොම හරි වෙලාවක් හොයන් ඒකි පස්සේ වැටිලා හිටිය නං කියලා දැන් හිතෙනවා. මක් කරන්නද මේක අපි සේරොගෙම කරුමේ.
උසස් පෙළ පන්තියේ දෙවනි අවුරුද්ද වෙනකං ඒකි ඉගෙනීම් වැඩ හොඳටම කරගෙන ගියා. පන්තියේ මුලට හිටියා. මට නොතේරුනත් පුතා ආව දවසට පොත් පත් සේරම පෙරළ පෙරළ හොයනවා නංගී පොඩ්ඩගේ වැඩවල තරම. ආඩම්බරෙන් හිනා වෙවී.
“අම්මේ මේ යන විදිහටම ගියොත් නංගී දොස්තර නෝනා කෙනෙක් වෙන එක ඉර හඳ වගේ විශ්වාසයි”
කියලත් කිව්වා එහෙම දවසක. ඒත් මේ පහුගිය දොහක පුතා ගෙදර ආවේ මරුවිකල්ලෙන් වගේ. මං කවදාවත් දැකලා නෑ එහෙම කේන්තියක්. කෙළින්ම ගියේ නංගිගේ කාමරේට. සුදූගේ කොණ්ඩෙන් ඇදගෙන ආවේ මා ළඟට.
“අම්මා අහන්න මේකි පෙරේදා පන්ති යනවා කියලා ගියේ කොහෙද කියලා”
මට තේරුනා පුතා කියන්න යන කාරණය. ඉන්තේරුවෙන්ම කෙල්ල කා එක්ක හරි යාළුවෙලා ඇති. ඕවා මෙහෙම ගහල බැණලා විසඳගන්න බෑනේ.
“පුතේ ඉස්සර වෙලා නංගිව අතඅරින්න. කෑකෝ ගහලා රට්ටු හිනස්සන්නේ නැතුව අපි කතා කරලා මේ ප්‍රශ්නේ විසඳගමු.”
“රට්ටු හිනස්සන්න දෙයක් තව ඉතුරු නෑ අම්මේ මේකි අපේ මූණේ දැලි ගාලා ඉවරයි.”
ඉකි ගහ ගහ අඬන කෙල්ල දිහා බලාගෙන පුතා ගුගුරනවා.
“කියාපන් උඹේ මහ ලොකු ප්‍රේමවන්තයා ගැන අම්මට”
පුතා තාමත් නිවිලා නෑ. අනේ මන්ද සිරී ඒ වෙලාවේ මක් කරන්නද මට තේරුනේ නෑ.
“අම්ම දන්නවද මේකි පොලිස්කාරයෙක් එක්ක දීග යන්න ඉන්නේ. නිකං එකෙක් නෙවෙයි බැඳලා දරුවෝ දෙන්නෙක් ඉන්න එකෙක්”
අනේ සිරී මට වටේම කළුවර වෙනවා විතරයි මතක. සිහිය නාවා නං හොඳයි කියලමයි හිතුණේ ඇහැ ඇරුනම.
“මොකද්ද දරුවෝ මේ කර ගත්තේ.”
මං ඇහැව්වේ කතා කර ගන්න පුළුවන් වුණ පළමුවෙනි තත්පරේ.
“එයා නෝනව දික්කසාද කරලා මාව බඳිනවා කිව්වා අම්මේ…”
කියලා කියනකොටම පුතා පැනලා සුදූට ගැහුවා කම්මුල් පාරක් ඇඟිලි පාර හිටින්න. ඒක කොල්ල නොගැහුවනං මං ගහන පාරක්. එදා රෑ රාත්තිරියේ කෙල්ලගේ පොලිස් පෙම්බරා ආව නඩු අහන්න කාකි සූට් ඇන්දම ලොකුකමක් ඉහට ගහනවනේ සමහරුන්ට. අනේ සිරී මේකි හවස වෙච්ච සේරම ඒකගේ කනේ තියලා.
“මං ආවේ මාධවී එක්ක යන්න”
කිව්වාම පුතා මැද්දට පැනලා කිව්වා
“කසාද බැඳපු එවුන්ට දෙන්න මෙහේ ගෑනු නෑ”
කියලා.
මහ හයිරංකාරයෙක් වගේ ඒ පාර ඒකා අත පය උස්ස ගෙන ආවම අපේ කොල්ලා ගහපු එක පාරට උන්දෑ වීසී වෙලා ගිහින් ගෙට ගොඩ වෙන පඩියේ ගැට්ටේ ඔළුව පිටිපස්ස වැදුණා. ඉස්පිරිතාලේ ගෙනියන කොටත් වෙන්න ඕන දේ වෙලා ඉවරලු සිරී. පොලිසියෙන් ඇවිත් මයේ අහිංසකයා කුදලගෙන ගියා. අනේ ජීප් එක ඇතුළේ ඉඳන් පුතා මං දිහා බලපු බැල්ම ඔයා නොදැක්ක එකමයි හොඳ සිරී. යන මග ආරංචි වුණා කොල්ලා පැනලා යන්න හැදුවය ඒ නිසා වෙඩි තිබ්බය කියලා. මං ඉස්පිරිතාලේ යනකං මයේ රත්තරං පුතා පණ ගැට ගහගෙන හිටියා සිරී. එදා පපුවේ අමාරුව හැදිලා ඔයා මා දිහා බලපු බැල්මෙන්ම මං දිහා බලං ඉඳලා මයේ කොලූ ඔයා ළඟට එන්න ආවා සිරී. මාත් ඒ පිම්මේ එනවා ඒත් මක් කරන්නද අපි දෙන්නගේ ලෙයින් ගැට ගැහිච්ච තව පරාණයක් ගෙදර ඉන්නවනේ. මට අපේ දරුවෝ පරිස්සම් කර ගන්න බැරි වුණා, අනේ සමාවෙන්න සිරී.
පවිත්‍රි මෙන්ඩිස්
