රත්මලාන සොයිසාපුර මහල් නිවාස සංකීර්ණයක හතරවන මහලේ අධික ලෙස නරක්වූ පිරිමි මළ සිරුරක් ඊයේ (28) හමුවූ බව ගල්කිස්ස පොලිසිය කියයි. මෙම මරණකරු තනිව ජීවත්වූ පුද්ගලයකු වන අතර මීට දින 10කට පමණ පෙර මියගොස් තිබූ බවට අනුමාන කළ හැකි මරණයක් බවත් පොලිසිය සඳහන් කරයි.
මළ සිරුර තිබූ නිවෙසෙන් අධික දුර්ගන්ධයක් හමා එන බවට අසල්වැසියන් කළ දැනුම් දීම මත කළ පරීක්ෂාවේදී එම නිවෙසේ ඇඳක තිබූ නරක්වූ සිරුර සොයා ගත් බව පොලීසිය කියයි. මරණකරු කවුරුන්ද යන්න මෙතෙක් හඳුනාගෙන නැති අතර, මෘතශරීරය දකුණ කොළඹ ශික්ෂණ රෝහලට යැවීමට පියවර ගෙන ඇතැයිද පොලිසිය සඳහන් කරයි.
ගල්කිස්ස ජ්‍යෙෂ්ඨ පොලිස් අධිකාරී ප්‍රශන්න බ්‍රහ්මණගේ මහතාගේ අධීක්ෂණයෙන් ගල්කිස්ස මූලස්ථාන ප්‍රධාන පොලිස් පරීක්ෂක දිලීප සී. පෙරේරා මහතාගේ උපදෙස් මත විවිධ පැමිණිලි අංශයේ ස්ථානාධිපති පොලිස් පරීක්ෂක සුගත්, පොලිස් කොස්තාපල් (21803) සංජීව යන නිලධාරීහු පරීක්ෂණ පවත්වති.
