ජාතික ජන බලවේග ආණ්ඩුව දින 35ක් තුළ ජනතා අප්‍රසාදයට ලක්වී ඇතැයි නව ප්‍රජාතන්ත්‍රවාදී පෙරමුණේ කොළඹ දිස්ත්‍රික් අපේක්ෂක සුගීෂ්වර බණ්ඩාර මහතා පැවැසීය.
ඒ මහතා මේ බව පැවැසුවේ මහරගම පිහිටි නව ජනතා පෙරමුණ ප්‍රධාන කාර්යාලයේදී ඊයේ (28) පැවැති මාධ්‍ය සාකච්ඡාවකට එක් වෙමිනි.
එහිදී වැඩිදුරටත් අදහස් දැක්වූ ඒ මහතා මෙසේද කීවේය.
Òජාතික ජන බලවේග ආණ්ඩුව දින 35ක් තුළ ජනතා අප්‍රසාදයට ලක් වී ඇති අයුරු ඇල්පිටිය ප්‍රාදේශීය සභා මැතිවරණයෙන් මනාව පිළිබිබු වෙනවා. රටෙහි වත්මන් ජනාධිපති අනුර කුමාර මැතිතුමා ප්‍රකාශ කළ පරිදි රාජ්‍ය සේවක වැටුප් වැඩිකිරීම හා අත්‍යවශ්‍ය පාරිභෝගික භාණ්ඩ වන හාල්, අල, ලූණු, හාල්මැස්සෝ යනාදි භාණ්ඩවල මිල අඩු කිරීමට ද එතුමාට නොහැකි වී තිබෙනවා.
ඇල්පිටිය ප්‍රාදේශීය සභා මැතිවරණ ප්‍රතිඵලයෙන් ඒ පිළිබඳව පෙන්නුම් කළ ඇල්පිටිය ජනතාවට ස්තූතිවන්ත වෙනවා.
2019 ඇල්පිටිය ප්‍රාදේශිය සභා මැතිවරණයේදී ගෝඨාභය රාජපක්ෂ මහතා ඇල්පිටිය ආසනයෙන් 66.7%ක් ලබාගත්තා.
2024 අනුර කුමාර මහතා ප්‍රමුඛ ජාතික ජන බලවේගයට 49.37%ක් ප්‍රතිශතයක් පමණයි ලබාගත හැකි වූයේ. අනුර කුමාර ජනාධිපතිතුමාට ඇල්පිටියෙන්ද බහුතරයක් නොමැති අතර ප්‍රතිඵලය 2.8% ප්‍රමාණයකින් අඩු වී තිබෙනවා.
ඊයේ පොලොන්නරුව දිස්ත්‍රික්කයේ ප්‍රධාන හාල් මෝල් පරීක්ෂාව පිළිබඳව ප්‍රසාදය පළ කරනවා වගේම ඒ සඳහා පොලොන්නරුවේම පාරිභෝගික අධිකාරියෙහි නිලධාරින් යැවීමෙන් අක්‍රමිකතා සිදුවිය හැකියි. එයට විසඳුම ලෙස ඩඩ්ලි සිරිසේන හා සිරිපාල ගම්ලත් මහත්වරුන්ගේ වී මෝල්වල සත්‍ය වශයෙන්ම පවතින වී සහ හාල් තොග පිළිබඳව වට්ස්ඇප් (Whatsapp ) පණිවිඩයක් ගෙන්වා ගන්නේ නම් යාවත්කාලීන නිවැරදි තොරතුරු ලබා ගැනීමට හැකියාව ලැබෙනවා.Ó
