“වසර 76ක් පුරා අපි ආණ්ඩු ගණනාවක් පත් කළත් රටේ ප්‍රශ්න එතැනමයි. අපි කරන්නේ ආණ්ඩු ගේනවා ආණ්ඩු එළවනවා විතරයි.” යනුවෙන් දෙවැනි පරපුර පක්ෂයේ නායක උවිඳු විජේවීර මහතා පැවැසීය.
ඒ මහතා මේ බව පැවැසුවේ මෙවර මහමැතිවරණයට කුරුණෑගල දිස්ත්‍රික්කයෙන් තරග කරන තම කණ්ඩායමේ ජය තහවුරු කිරීම වෙනුවෙන් කුරුණෑගල, ඉඳුල්ගොඩකන්ද ප්‍රදේශයේ පසුගියදා (26) පැවැති ජන හමුවකදීය.
එහිදී වැඩිදුරටත් අදහස් දැක්වූ ඒ මහතා මෙලෙස ද කීවේය.
“නිල් පක්ෂයෙන් නායකයෙක් ආ විට, කොළ පක්ෂයයි රතු පක්ෂයි එකතු වෙලා එයාගේ කකුලෙන් අදිනවා. කොළ පක්ෂයෙන් නායකයෙක් ආ විට රතු පක්ෂයයි නිල් පක්ෂයයි එකතු වෙලා එයාගේ කකුලෙන් අදිනවා. දැන් රතු පක්ෂයේ නායකයෙක් ඇවිත් ඉන්නවා. ඔන්න දැන් නිල් පක්ෂයයි කොළ පක්ෂයයි එකතු වෙලා එයාගේ කකුලෙන් අදිනවා. මේක කර්මය වගේ අපි පස්සෙන් එනවා. අපි බෞද්ධයන් විදියට කර්ම විශ්වාස කරන අයනේ. අර කරත්ත රෝදේ වගේ කැරකි කැරකි පසු පස්සෙන් එනවා වගේ මේ දේ නොකඩවාම සිදු වෙනවා.
අපි විශ්වාස කරනවා, මේ රටට අලුත් දේශපාලන ව්‍යාපාරයක්, අලුත් දේශපාලන ගමනක් අවශ්‍යයි කියලා. ඒ අලුත් ගමන වෙනුවෙන් තමයි අපි දෙවන පරපුර කියලා පක්ෂයක් හදලා තියෙන්නේ. මේ රටේ තියෙන බහුතරයක් ප්‍රශ්නවලට හේතුව තමයි අපි මේ පක්ෂවලට බෙදිලා ඉන්න එක. පක්ෂවලට බෙදිලා අපි ගහ මරා ගන්න එක. අපට බැරි වෙලා තියෙනවා තාමත් අපි ලාංකීය මිනිස්සු කියලා හිතන්න. දැන් අපි මේ වෙන කොට ආණ්ඩු කීයක් නම් පත්කර ගෙන තියෙනවාද? ඒත් රටේ ප්‍රශ්න එතැනමයි. අපි කරන්නේ ආණ්ඩු ගේනවා ආණ්ඩු එළවනවා විතරයි.
තෙල් පෝලිම් එනකොට ඒකට සතුටු වූ පාක්ෂිකයන් හිටියා. ඉතින් මේ දේශපාලනය වෙනස් කරන්න ඕනේ. අපි කවද්ද ලාංකිකයන් හැටියට හිතන්නේ. මේ ගම්වල ඉන්න අම්මලා තාත්තලා අපට දැනෙන්නේ අපේ අම්මලා තාත්තලා වගේ. අපට යූඑන්පී අම්මල වෙනමයි ශ්‍රී ලංකා අම්මලා වෙනමයි ජේවීපී අම්මලා වෙනමයි කියල නෑ. අපි ඔක්කොම මේ රටේ මිනිස්සු. අපේ රටේ පුරවැසියෝ. අන්න එහෙම හිතන්න පුළුවන් දේශපාලන ව්‍යාපාරයක් තමයි අපි මේ දෙවන පරපුර කියලා නිර්මාණය කර තියෙන්නේ.
අපි අපේ පක්ෂයට අපේක්ෂකයන් තෝරන කොට ඔහුට කොච්චරක් වියදම් කරන්න පුළුවන්ද කියලා බැලුවේ නෑ. අපි හෙව්වේ කාරණා කිහිපයයි. ඒ තමයි ඔහු මානවවාදය තියෙන කෙනෙක්ද? ඔහු පරිසරයට ආදරේ කරනවාද? ඔහු දක්ෂයෙක්ද? ඔහු තවත් දක්ෂයන්ට ඉඩ දෙනවාද? ඔහු මේ මව්බිමේ උරුමයට ආදරය කරනවාද? මෙන්න මේ දෘෂ්ටිවාදී සංකල්පයට පදනම්ව තමයි අපි හොඳ මනුස්සයන්ව තේරුවේ. අපි ධනයටවත්, බලයටවත්, අපට ඥාතීත්වයක් තියෙනවාද කියලවත් බලලා නෙමෙයි ඔබේ ගමෙන් අපි අපේක්ෂකයන් තෝරා ගත්තේ.
එක්දහස් නවසිය හැත්තෑ හතේ විවෘත ආර්ථිකය ආවට පස්සේ අපේ රටේ හැදුණෙම මහා කෑදර මනුස්සයෙක්. මේ ගහ කොළ සතා සීපාව පවා මුදල් හැටියට පේන කෑදර මනුස්සයෙක්. ඒ මිනිසා තමන්ගේ අම්ම තාත්තගේ වටිනාකමක් දන්නේ නෑ. එහෙම සමාජයක් අද හැදිලා තියෙන්නෙ. අන්න ඒ නිසා මේ මහා පරිසරයට ආදරය කරන මනුස්සයා අද පාර්ලිමේන්තුවේ ඉන්න ඕනේ. කුසලතාවට, දක්ෂතාවට ඉඩ දෙන මනුස්සකමට ඉඩ දෙන මනුස්සයෙක් අද පාර්ලිමේන්තුවේ ඉන්න ඕනෙ. දක්ෂයා හදලා දක්ෂයාට ඉඩ දීලා ගමනක් ගියොත් මේ රටට ලස්සන ගමනක් යන්න පුළුවන්. මේක බදාගෙන ඉන්න ආපු මිනිස්සු ටිකක් නෙවෙයි අපි. අන්න ඔබට පුළුවන් එහෙම දැක්මක් තියෙන මතවාදයක් තියෙන මිනිස්සු ටිකක් පාර්ලිමේන්තුවට යවන්න. අපි කතා කරන්නේ වෙනස් චින්තනයක් ගැන. අපි කතා කරන්නේ වෙනස් දැක්මක් ගැන. මේක ඔබට තේරෙනවා. ඔබේ හදවතට තේරෙනවා. මේ මහ පොළොවත් එක්ක ගැටගැහිච්ච දේශපාලන ව්‍යාපාරයක් දැන් මේ රටට අවශ්‍යයි.
අපි ඔබට ආරාධනා කරනවා, නැවත වරක් මේ පාට, පක්ෂ, ජාති, ආගම් භේද අතහැර ලාංකීය මිනිස්සු හැටියට හිතන්න පුළුවන් ලාංකීය දේශපාලන මතවාදයක් එක්ක එකතු වෙන්න කියලා.”
