සර්වජන බලය දේශපාලන සන්ධානය මේ රටේ සැබෑ විපක්ෂයේ කාර්යභාරය ඉටු කිරීමට සැදී පැහැදී සිටින බවත් ආණ්ඩුවේ හොඳ වැඩවලට සහාය දෙන බව එම පක්ෂයේ කොළඹ දිස්ත්‍රික් අපේක්ෂක විරාජ් මීරියගල්ල මහතා පැවැසීය.
ඒ මහතා මේ බව පැවැසුවේ පසුගියදා මහරගම පැවැති රැස්වීම් මාලාවකදීය.
එහිදී වැඩිදුරටත් අදහස් දැක්වූ ඒ මහතා මෙසේද පැවැසීය.
“මේ වන විට රටේ ආර්ථිකය ස්ථාවර තත්ත්වයක නෑ. සාමාන්‍ය ජන ජීවිතය ඉතාම ශෝචනීය තත්ත්වයක තියෙන්නෙ. මේ සිදුවීම්වලට මෙතෙක් පැවැති දේශපාලන ක්‍රමය වගකියන්න ඕනෙ. ජනතාවට අවශ්‍ය දූෂිත, වංචනික දේශපාලන ක්‍රමවේදයට තිත තියන්න. රටේ සමෘද්ධිය ගැන හිතන, ගරාවැටුණු දේශය යළි ගොඩ නැඟීමට හැකි, උගත් බුද්ධිමත් තරුණ පිරිසකගේ අවශ්‍යතාව ජනතාවට දැනිලා තියෙනවා. අන්න ඒ නිසයි මමත් මේ සද්කාර්යයට උරදෙන්න හිතුවේ. අපට ඉන්නවා, හොඳ, ශක්තිමත්, බුද්ධිමත් නායකයෙක්. ඒ තමයි දිලිත් ජයවීර මහතා. ඒ මහතා හොඳ ව්‍යවසායකයෙක්. මේ රට පවතින බංකොලොත්භාවයෙන් නිවැරදි ලෙස ගොඩ ගත හැක්කේ ව්‍යවසායක රාජ්‍යයකින් පමණයි.
ආණ්ඩුව පත්කර ඇත්තේ ජනතාව. ඒ අනුව ජාතික ජන බලවේගයට ආණ්ඩුවක් කරගෙන යන්න සහයෝගය දිය යුතුයි. කකුලෙන් අදින්න හොඳ නෑ. ඒ අය ආණ්ඩුව හරියට කරයිද නැද්ද කියලා රටේ ජනතාව ඉදිරි මැතිවරණවලදී තීන්දු කරයි. සර්වජන බලය ඉන්නේ ජනතාවට නිවැරදි මාර්ගය පෙන්වා දීමට. ඒ කාර්යභාරය අපි එඩිතරව ඉදිරියට කරනවා.”
