වන අලි ගම් වැදීම වළක්වා ගැනීමට නම් ඒ අවදානම ඇති ප්‍රදේශවලට අලි වෙඩි බෙදා හැරීම කාර්යක්ෂම කරන ලෙස පරිසර, වනජීවී, වන සම්පත්, ජල සම්පාදන වැවිලි හා ප්‍රජා යටිතල පහසුකම් ඇමැති විජිත හේරත් මහතා අදාළ නිලධාරීන්ට උපදෙස් ලබා දී ඇත. පසුගිය වසරේ අනවසර විදුලි රැහැන් ඇටවීම ඇතුළු මිනිස් ක්‍රියාකාරකම් නිසා වන අලි 90ක් මරණයට පත්ව තිබේ. වන අලි මිනිස් ගැටුමට කෙටි කාලීන විසඳුම් ලබාදීමට මේ පියවර කාර්යක්ෂම කිරීමට වනජීවී සංරක්ෂණ දෙපාර්තමේන්තුව කටයුතු යොදා ඇතැයි එම අධ්‍යක්ෂ ජනරාල් චන්දන සූරියබණ්ඩාර මහතා පැවැසීය. මෙහිදී සූරියබණ්ඩාර මහතා පෙන්වා දුන්නේ පසුගිය වසරට වඩා 100ක් පමණ අඩුවෙන් අලි මරණ මේ වන විට වාර්තා වී ඇති බවයි.
වනජීවී සංරක්ෂණ දෙපාර්තමේන්තුවේ පවතින සේවක පුරප්පාඩු සහ යටිතල පහසුකම් අවම මට්ටමක පැවැතීම නිසා මේ දෙපාර්තමේන්තුවේ කටයුතු සිදු කරගෙන යෑමේදී තමන් දුෂ්කරතා රැසකට මුහුණපා ඇතැයි පසුගියදා ඇමැතිවරයා සමඟ පැවැති සාකච්ඡාවකදී නිලධාරින් ඇමැති විජිත හේරත් මහතාට පෙන්වා දී ඇත. එහිදී ඇමැතිවරයා උපදෙස් දී ඇත්තේ වසර 2025 වන විට මේ පුරප්පාඩු වහාම පිරවීමට අදාළ ක්‍රියාමාර්ග ගන්නා ලෙසයි.
