ශ්‍රී ලංකා අගොන්ශු මිත්‍රත්ව පදනමේ 32 වැනි ශිෂ්‍යත්ව ප්‍රදානෝත්සවය නොවැම්බර් 02 පස්වරු 2.00ට කැලණිය මානෙල්වත්ත නාගානන්ද ජාත්‍යන්තර බෞද්ධ අධ්‍යයන ආයතන සම්මේලන මධ්‍යස්ථානයේදී පැවැත්වීමට කටයුතු යොදා තිබේ.
මෑත යුගයේ ජපානයේ තියොතෝ නුවර කේන්ද්‍ර කරගෙන බිහිවූ අගොන්ශු විහාරස්ථානය ජපානයේ සුවිශේෂ බෞද්ධ සිද්ධස්ථානයක් බවට මේ වන විට පත්ව තිබේ. වර්ෂ 1978දී ජපානයේ බිහිවූ අගොන්ශු නිකායේ මූලස්ථානය වනුයේ ද මෙම අගොන්ශු විහාරයයි. ජපානයේ නගර කිහිපයක සේම ඉන් පිටස්තර රටවලත් ශාඛා පිහිටුවා තිබෙන මෙම අගොන්ශු විහාර සමූහයේ නිර්මාතෘවරයා වනුයේ සෙයිසු කිරියාමා මහනාහිමිපාණෝය.
මෙම අගොන්ශු විහාරය කේන්ද්‍ර කරගෙන වර්ෂ 1994 ජනවාරි 12 වැනිදා ශ්‍රී ලංකා අගොන්ශු මිත්‍රත්ව පදනම ශ්‍රී ලංකාවේ ස්ථාපිත කිරීම දීර්ඝ කාලීන ජපන් ශ්‍රී ලංකා මිත්‍රත්වය යළි තහවුරු වූ අවස්ථාවක් ලෙස නම් කළ හැකිය.
සෙයිසු කිරියාමා මහා නාහිමියන් විසින් මෙහි වගකීම් සියල්ල පවරා දෙන ලද්දේ ජපන් භාෂාව හා සංස්කෘතිය පිළිබඳ මනා දැනුම් සම්භාරයකින් හෙබි සෝමසිරි අද්දර පතිරණගේ මහතා වෙතය.
මෙවර 32 වැනි වාර්ෂික ශිෂ්‍යත්ව ප්‍රදානය සිදුකරන අවස්ථාව වන විට ශ්‍රී ලංකා අගොන්ශු මිත්‍රත්ව පදනම හරහා ලබා දුන් සමස්ත ශිෂ්‍යත්ව ප්‍රමාණය 18,801කි. මෙවර ශිෂ්‍යත්ව 735ක් ප්‍රදානය කෙරේ. පදනමේ නිර්මාතෘ සෙයිසු කිරියාමා මහානාහිමි වර්ෂ 2016දී අගෝස්තු මස 29 වැනිදා අපවත්වී වදාළ අතර එයින් පසු අගොන්ශු විහාර සමූහයේ සභාපති පදවියට පත්වූයේ වදා නඔතෝ මැතිනියයි. මහනාහිමි අභාවයෙන් පසුවද මෙම ශිෂ්‍යත්ව ව්‍යාපෘතිය එහෙයින් ක්‍රියාත්මක කිරීමට එතුමිය ප්‍රමුඛ අගොන්ශු විහාර සමාජ සුබසාධන අංශය ක්‍රියා කළේය.
මෙවර ශිෂ්‍යත්ව ප්‍රදානෝත්සවය සඳහා ජපානයේ අගොන්ශු විහාරය නියෝජනය කරමින් තොමොනෝ මසුයුකී හිමි, අරතනී හරුහිදේ හිමි, සතෝ තකෙහිෂි හිමි සහභාගි වෙති. තායිවානයේ ප්‍රධාන සංඝනායක කැලණිය මානෙල්වත්ත නාගානන්ද ජාත්‍යන්තර බෞද්ධ අධ්‍යයන ආයතනයේ උපකුලපති ආචාර්ය බෝදාගම චන්දිම නාහිමි මුලසුන හොබවන අතර ශ්‍රී ජයවර්ධනපුර විශ්වවිද්‍යාලයේ උප කුලපති ජ්‍යෙෂ්ඨ මහාචාර්ය පත්මලාල් එම්. මානගේ මහතා ප්‍රධාන ආරාධිතයා ලෙස එක් වෙයි.
නොවැම්බර් 02 වැනිදා පස්වරු 2.00ට කැලණිය මානෙල්වත්ත නාගානන්ද ජාත්‍යන්තර බෞද්ධ අධ්‍යයන ආයතන සම්මේලන මධ්‍යස්ථානයේදී පැවැත්වෙන මෙම ශිෂ්‍යත්ව ප්‍රදානෝත්සවය ශ්‍රී ලංකා අගොන්ශු මිත්‍රත්ව පදනමේ අධ්‍යක්ෂ ජනරාල් අගොන්ශු නිකායේ දකුණු ආසියානු කලාපීය රටවල බෞද්ධ උපදේශක රෝහණ කීර්ති ශාසනබන්දු සෝමසිරි අද්දර පතිරණගේ මහතාගේ අධීක්ෂණය පරිදි ශ්‍රී ලංකා අගොන්ශු මිත්‍රත්ව පදනමේ අධ්‍යක්ෂ මණ්ඩලයේ හා ප්‍රාදේශීය සම්බන්ධීකරණ නිලධාරීන්ගේ මෙහෙයවීමෙන් උලෙළ සංවිධානය කෙරේ.
