පැමිණිල්ලක් විභාග කිරීමට පැමිණි අයකුට සාපරාධී බලහත්කාරය පෑ බව කියන කුලියාපිටිය මූලස්ථාන ප්‍රධාන පොලිස් පරීක්‍ෂකවරයා වහාම අත්අඩංගුවට ගෙන අධිකරණයට ඉදිරිපත් කරන්නැයි කුලියාපිටිය මහේස්ත්‍රාත් රන්දික ලක්මාල් ජයලත් මහතා ඉකුත්දා ( 25) කුලියාපිටිය පොලිසියට නියම කළේය.
මෙලෙස අත්අඩංගුවට ගෙන ඉදිරිපත් කරන ලෙසට නියෝග නිකුත් වූයේ කුලියාපිටිය මූලස්ථාන ප්‍රධාන පොලිස් පරීක්‍ෂක වජිර ඉන්ද්‍රජිත් නමැත්තාවය.
පවුල් ආරවුලක් විසඳා ගැනීමට කුලියාපිටිය පොලිස් කොට්ඨාසයට අයත් කොට්ඨාස ළමා හා කාන්තා කාර්යාංශයට පැමිණි අඹු සැමි යුවළකගේ සැමියා ප්‍රකාශ ලබාදෙමින් සිටිය දී එම ස්ථානයට වී ඇති සැකකාර මූලස්ථාන පොලිස් පරීක්‍ෂකවරයා ප්‍රකාශ සටහන් කර ගනිමින් සිටි පොලිස් නිලධාරිනියට උස් හඩින් බැණ එළවා දමා ප්‍රකාශය ලබාදෙමින් සිටි පුද්ගලයාට පහරදීමට සැරසී ඇති බව කුලියාපිටිය කොට්ඨාස බාර ජ්‍යෙෂ්ඨ පොලිස් අධිකාරි මහේෂ් කුමාරසිංහ මහතා බී වාර්තාවක් මඟින් අධිකරණයට කරුණු ඉදිරිපත් කරමින් පැවැසීය.
එහිදී එම කාර්යංශයේ ස්ථානාධිපතිවරිය එම ස්ථානයට පැමිණ තත්ත්වය සමනය කිරීමට උත්සාහ ගෙන තිබූ බවත් සැකකාර මූලස්ථාන පොලිස් පරීක්‍ෂකවරයා එයද නොතකා කලහකාරීව හැසිරෙමින් ස්ථානාධිපතිවරියට ද පරුෂ වචනයෙන් බැණවැදී ඇතැයි ද පොලිස් අධිකාරිවරයා අධිකරණයට දැනුම් දුන්නේය.
මෙම සිද්ධිය සම්බන්ධයෙන් අදාළ අංශයේ ස්ථානාධිපතිවරිය සහ තවත් පොලිස් නිලධාරීන් තිදෙනකු ලබා දී තිබූ සාක්‍ෂි මත ඉදිරි විමර්ශන සිදුකරන බවත් සැකකාර පොලිස් නිලධාරියා මේ වනවිට නිවාඩු වාර්තාකොට ස්ථානයෙන් පිටව ගොස් ඇති බවත් පොලිස් අධිකාරිවරයා අධිකරණයට කරුණු ඉදිරිපත් කළේය.
ඒ අනුව මෙම සැකකාර මූලස්ථාන පොලිස් පරීක්‍ෂකවරයා අත්අඩංගුවට ගෙන අධිකරණයට ඉදිරිපත් කිරීමට වෙනත් දිනයක් ලබාදෙන ලෙසද පොලිස් අධිකාරිවරයා අධිකරණයෙන් ඉල්ලීය.
කොට්ඨාස ළමා හා කාන්තා කාර්යාංශය ඇත්තේ මූලස්ථාන පොලිසිය යටතේද යන්න මෙහි දී විමසූ මහේස්ත්‍රාත්වරයා නොවැම්බර් මස 8 වැනිදා සැකකරු අත්අඩංගුවට අධිකරණයට ඉදිරිපත් කරන්නැයි නියම කළේය.
කුලියාපිටිය කොට්ඨාස භාර ජ්‍යෙෂ්ඨ පොලිස් අධිකාරි මහේෂ් කුමාරසිංහ, කොට්ඨාස අපරාධ විමර්ශන කාර්යාංශයේ ස්ථානාධිපති පොලිස් පරීක්‍ෂක පුෂ්පිත ගුණසේකර යන නිලධාරීහු සිද්ධිය සම්බන්ධයෙන් බී වාර්තාවක් මඟින් අධිකරණයට කරුණු ඉදිරිපත් කළහ.
