රුපියල් කෝටියක කොන්ත්‍රාත්තුවකට කාන්තාවක් ඝාතනය කිරීම සඳහා සූදානම්ව සිටි පුද්ගලයකු ගිනි අවියක් සහ ජීව උණ්ඩ හයක් සමඟ අපරාධ පරීක්ෂණ දෙපාර්තමේන්තුව විසින් ඉකුත් සති අන්තයේ ගිනි අවියක්ද සමඟ අත්අඩංගුවට ගන්නා විටත් එම කාන්තාව සමඟ ඇගේ සැමියාව ද ඝාතනයකර තිබී ඇතැයි විමර්ශනවලින් හෙළිවී තිබේ.
එම ද්විත්ව ඝාතනය සිදුව ඇත්තේ පසුගිය 04 වෙනිදා අහංගම වැල්හේන්ගොඩ නිවසක් තුළදීය. ඊට සම්බන්ධ සැකකරුවන්ද අහංගම පොලිසිය මේ වන විට අත්අඩංගුවට ගෙන ඇති බව ද පොලිස් තොරතුරු සඳහන් කළේය. ඉඩම් ආරවුලක් මුල්කරගෙන මෙම ඝාතන කොන්ත්‍රාත්තුව ලබා දී ඇත්තේ ව්‍යාපාරිකයෙක් බවත් වෙඩි තබා ඝාතනය කිරීමට පිරිසකට කෝටියකත කොන්ත්‍රාත්තුව ලබාදෙන අතර තුර වෙනත් පාර්ශ්වයකටද තවත් කොන්ත්‍රාත්තුවක් ලබා දී තිබී ඇති බවත් විමර්ශනවලින් පෙනී ගොස් ඇත. මෙහි දී වෙඩි තබා ඝාතනය කිරීමට ලබාදුන් කොන්ත්‍රාත්තුවට පෙර කපා කොටා කාන්තාව සමඟ ඇගේ සැමියාවද ඝාතනයකර ඇති බව පොලිසිය සඳහන් කරයි.
මෙසේ ඝාතනයකර ඇත්තේ කමනි වීරතුංග (63) සහ පී.ජයසිංහ (67) යන අඹුසැමි යුවල බව පොලිසිය සඳහන් කරයි. නිවස තුළ කපා කොටා මේ දෙදෙනාව ඝාතනය කර තිබී ඇත.
අපරාධ පරීක්ෂණ දෙපාර්තමේන්තුවේ මනුෂ්‍ය ඝාතන හා සංවිධානාත්මක අපරාධ විමර්ශන අංශය මේ බව නොදැන අහංගම කාන්තාවක් ඝාතනය කිරීමට සූදානමින් සිටි පුද්ගලයකු ගිනි අවියක් සමඟ අත්අඩංගුවට ගෙන තිබේ.
හබරාදුව මීපේ ප්‍රදේශයේ පදිංචි හොරයින් මත්කුඩුවලට දැඩිව ඇබ්බැහිව සිටින පුද්ගලයකු වන සැකකරුගෙන් ප්‍රශ්න කිරීමේ දී පවසා ඇත්තේ අහංගම ප්‍රදේශයේ පදිංචිව සිටින ව්‍යාපාරිකයකු විසින් කාන්තාවක් ඝාතනය කිරීමට තමාටත් මිතුරෙකුටත් රුපියල් කෝටියක කොන්ත්‍රාත්තුවක් ලබාදුන් බවත් ඒ සඳහා ගිනි අවිය සූදානම්කරගෙන සිටි බවය. මිතුරා වෙනත් සිදුවීමකට බන්ධනාගාරගත වී ඇත. ඒ හේතුවෙන් ඝාතන කොන්ත්‍රාත්තුව ඉටු කිරීමට ප්‍රමාද වීම හේතුවෙන් වෙනත් කණ්ඩායමක් යොදා ව්‍යාපාරිකයා විසින් අඹුසැමි යුවල මරා දමා ඇති බව උසස් පොලිස් නිලධාරියෙක් පැවැසීය.
