මාධ්‍යවේදී ප්‍රගීත් එක්නැලිගොඩ මහතා පැහැරගෙන ගොස් අතුරුදන් කළේ යැයි කියන සිද්ධියක් සම්බන්ධයෙන් චෝදනා කරමින් ගිරිතලේ හමුදා කඳවුරේ හිටපු අණදෙන නිලධාරී ඇතුළු යුද හමුදා බුද්ධි අංශ සාමාජිකයන් නව දෙනකුට එරෙහිව පවරා ඇති නඩුව විශේෂ ත්‍රිපුද්ගල මහාධිකරණ විනිසුරු මඬුල්ලක් හමුවේ ඊයේ (28දා) විභාගයට ගන්නා ලදි.
මහාධිකරණ විනිසුරුවරුන් වන ආචාර්ය නාමල් බලල්ලේ, මහේන් වීරමන්, සුජීව නිශ්ශංක මහත්වරුන්ගෙන් සමන්විත ත්‍රිපුද්ගල විනිසුරු මඬුල්ල හමුවේ මෙම නඩුව විභාග වේ.
එහිදී නඩුවේ සාක්ෂිකරුවන් වශයෙන් නම්කර සිටින පෞද්ගලික දුරකතන සමාගම් 2ක් වෙනුවෙන් එහි නියෝජිතයන් අධිකරණය හමුවේ සාක්ෂි දෙන ලදි. විත්තිකරුවන් ලබාගත් දුරකතන ඇමතුම් කිහිපයක් සම්බන්ධයෙන් විත්තියේ මෙහෙයවීම යටතේ ඔවුන් සාක්ෂි දීම කළේය. නඩුව දෙසැම්බර් 06 වැනි දා යළි කැඳවීමට නියම විය.
පසුගිය 2010 වසරේ ජනවාරි මස 25 වැනි දා හෝ ඊට ආසන්න දිනයකදී ගිරිතලේ, හබරණ හා කොට්ටාව යන ප්‍රදේශවලදී විත්තිකරුවන් තවත් නම් නොදත් පිරිසක් සමඟ එක්ව රහසිගතව සිරකර තැබීමේ අරමුණෙන් මාධ්‍යවේදී ප්‍රගීත් එක්නැලිගොඩ පැහැරගෙන යෑම හා මරණය සිදු කිරීම යන චෝදනා යටතේ නීතිපතිවරයා දණ්ඩ නීති සංග්‍රහයේ 102 සමඟ කියවිය යුතු 356, 140, 146 සමඟ කියවිය යුතු 356, 146, 359, 32, 102 හා 113 ආ කියවිය යුතු 355 හා 32 සමඟ කියවිය යුතු 296 වගන්ති ප්‍රකාරව විත්තිකරුවන්ට එරෙහිව කොළඹ ස්ථිර ත්‍රිපුද්ගල මහාධිකරණය හමුවේ අධි චෝදනා 17ක් ගොනු කර ඇත. නඩුවේ විත්තිකරුවන් ලෙස ගිරිතලේ හමුදා කඳවුරේ අණදෙන නිලධාරී ලුතිනන් කර්නල් ෂම්මි කුමාරරත්න, ඩබ්ලිව්. ඩී. උපසේන (සුරේෂ්), ආර්. එම්. පී. කේ. රාජපක්ෂ (නාදන්), එස්.එම්. රවීන්ද්‍ර රූපසේන (රංජි), චමින්ද කුමාර අබේරත්න, කනිෂ්ක ගුණරත්න, අයියාසාමි බාලසුබ්‍රමනියම්, තරංග ප්‍රසාද් ගමගේ සහ ටී.ඊ.ආර්. පීරිස් යන යුද හමුදා බුද්ධි අංශ සාමාජිකයන් නව දෙනකු නම් කර තිබේ.
අගතියට පත් පාර්ශ්වය වෙනුවෙන් ජනාධිපති නීතිඥ උපුල් කුමරප්පෙරුම මහතා පෙනී සිටි අතර විත්තිය වෙනුවෙන් නීතිඥ රසික බාලසූරිය ඇතුළු නීතිඥ මඬුල්ලක් පෙනී සිටිති. නඩු විභාගය සිදුවන අවස්ථාව දැකබලා ගැනීමට අන්තර්ජාතික මානව හිමිකම් සංවිධාන කිහිපයක නියෝජිතයෝ අධිකරණයට පැමිණ සිටියහ.
