අපරාධ පරීක්ෂණ දෙපාර්තමේන්තුවේ හිටපු අධ්‍යක්ෂ ශානි අබේසේකර සහ එම දෙපාර්තමේන්තුව භාර හිටපු ජ්‍යෙෂ්ඨ නියෝජ්‍ය පොලිස්ති රවී සෙනවිරත්නට එරෙහිව පාස්කු ඉරිදා දින ම්ලේච්ඡ ප්‍රහාරයට අදාළව එල්ල වන චෝදනා සම්බන්ධයෙන් කළ සොයා බැලීමවලදී අනාවරණය වූ කාරණා ගැන පළවන ලිපි පෙළේ පළමු, දෙවැනි සහ තෙවැනි ලිපි මීට පෙර පළ විය. මේ එහි සිව්වැනි කොටසයි.
මාවනැල්ල පොලිස් ස්ථානාධිපති ප්‍රධාන පොලිස් පරීක්ෂක මාඹුලගේ දොන් දමිත නිලංග මහතා පාස්කු දින ඉරිද ප්‍රහාරය ගැන සෙවූ ජනාධිපති පරීක්ෂණ කොමිෂන් සභාව ඉදිරියේ සාක්කි ලබාදෙමින් සඳහන් කළ පරිදි 2018 දෙසැම්බර් 26 වැනිදා වන විට ඔහුගේ පොලිස් බලප්‍රදේශයෙන් පිට ස්ථානවල ද බුදුපිළිමවලට හානි කිරීම් වාර්තා වී තිබී ඇත.
පොතුහැර, පේරාදෙණිය පොලිස්වසම්වල බුදුපිළිමවලට හානි කිරීම සම්බන්ධයෙන් ද මාවනැල්ල පොලිසිය කරුණු අනාවරණය කරගෙන ඇත්තේ 26 වැනිදා සැකකරු අත්අඩංගුවට ගැනීමෙන් පසු කරුණු සොයා බැලීමට එම පොලිසිවල නිලධාරීන් පැමිණි අවස්ථාවේදීය.
මෙම ලිපි මාලාවේ තුන්වැනි කොටසේ දී සඳහන් කළ පරිදි සැකකරුවන් පිරිසක් අත්අඩංගුවට ගත් මාවනැල්ල පොලිසියට සැකකරුවන් දෙදෙනකු අත්අඩංගුවට ගැනීමට නොහැකි විය. එම සැකකරුවන් දෙදෙනා එකම පවුලේ සහෝදරයන් වූ අතර මාවනැල්ල පොලිස් ස්ථානාධිපතිවරයා ජනාධිපති කොමිසමට ප්‍රකාශ කළ පරිදි ඔවුන් 26 වැනිදා උදෑසන 10ට පමණ එම නි‍ෙවසට යනවිට නි‍ෙවසේ සිට ඇත්තේ සැකකරුවන්ගේ මව සහ සහෝදරියන් පමණි. ඔවුන්ගේ පියා ඊබ්‍රහීම් මවුලවි ද නි‍ෙවසේ සිට නැත.
සැකකරුවන් දෙදෙනා
මෙම සිද්ධියේ විමර්ශන සම්බන්ධයෙන් මුලින්ම නොවැම්බර් 24 වැනිදා කෑගල්ල පොලිස් අධිකාරි කාර්යාලයේ දී ප්‍රගති රැස්වීමක් පවැත්වූ බවත් යළි ප්‍රගති සමාලෝචන රැස්වීමක් පැවැත්වූයේ දෙසැම්බර් 31 වැනිදා නියෝජ්‍ය පොලිස්පති කාර්යාලයේදී බවත් මාවනැල්ල පොලිසිය අධීක්ෂණය කළ කෑගල්ල දිස්ත්‍රික් 2 භාර සහකාර පොලිස් අධිකාරි තෙන්නකෝන් මුදියන්සේලාගේ ජගත් ගාමිණී තෙන්නකෝන් මහතා ජනාධිපති කොමිසමේ දී සාක්කි දෙමින් සඳහන් කළේය. ඔහු වැඩිදුරටත් සඳහන් කර තිබුණේ පොලිස් පරීක්ෂක අමරපාල ඇතුළු කණ්ඩායමක් සෙසු සැකකරුවන් දෙදෙනා සොයා ගැනීමට විවිධ ප්‍රදේශවලට ගිය බවයි.
සැකකරුවන් දෙදෙනා අත්අඩංගුවට ගැනීමට අපොහොසත් වූ පසුබිමක දෙසැම්බර් 29 වැනිදා දහවල් 12.21කට සහකාර පොලිස් අධිකාරි ගාමිණී තෙන්නකෝන් මහතාට පොලිස් මූලස්ථානයෙන් ඇමතුමක් ලබාගෙන ඇති අතර පොලිස්පතිවරයාට ඇමතුමක් ගන්නා ලෙසට උපදෙස් ලැබී තිබේ. ඒ අනුව මුලින්ම ඇමතුමක් ගත්ත ද ප්‍රතිචාරයක් නොලද තැන තෙන්නකෝන් මහතා, පොලිස් මූලස්ථානයට ඇමතුමක් ගෙන වෙනත් ජංගම දුරකතන අංකයකට ගෙන පොලිස්පතිවරයා අමතා තිබේ.
සහකාර පොලිස් අධිකාරිගෙන් විමර්ශන ප්‍රගතිය විමසීමෙන් අනතුරුව බස්නාහිර ආණ්ඩුකාර අසාද් සාලිගේ දුරකතන අංකය සහකාර පොලිස් අධිකාරි වෙත ලබා දී ඇති පොලිස්පතිවරයා ඔහුට ඇමතුමක් ලබා දෙන ලෙසත්, යම් තොරතුරක් ඇති බවට ඔහු කී නිසා එම තොරතුර ලබාගන්නා ලෙසත් පූජිත් ජයසුන්දර මහතා උපදෙස් දී ඇත.
එයා ආවේ නැද්ද
දෙසැම්බර් 29 වැනිදා පස්වරු 12.29ට සහකාර පොලිස් අධිකාරිවරයා අසාද් සාලි මහතාට ඇමතුමක් ලබා දි තිබෙන අතර එහිදී අසාද් සාලි ප්‍රකාශ කර ඇත්තේ පොලිසිය සොයමින් සිටින සැකකරුවන් දෙදෙනා තම්සින් නම් මවුලවි විසින් එදිනම ගෙනැවිත් බාර දෙනු ඇති බව යැයි සහකාර පොලිස් අධිකාරි කියා ඇත. එවැන්නක් කී බව අසාද් සාලි පසුව ප්‍රතික්ෂේප කර තිබේ. එම තොරතුර ගැන සහකාර පොලිස් අධිකාරිවරයා දහවල් 12.38ට පාලිත සිරිවර්ධන නමැති නියෝජ්‍ය පොලිස්පතිවරයාට දැනුම් දී තිබේ. එවිට ඔහු කියා ඇත්තේ එලෙස බාර දෙනවා නම් හොඳ බැවින් බලා සිටිමු යනුවෙනි. කෙසේ වෙතත් අදාළ මවුලවි එදින සැකකරුවන් ගෙනැවිත් බාරදී තිබුණේ නැත.
ඉන්පසු නියෝජ්‍ය පොලිස්පති පාලිත සිරිවර්ධනගේ ප්‍රධානත්වයෙන් පැවති ප්‍රගති සමාලෝචන රැස්වීමේදී පාලිත සිරිවර්ධන මහතා, සහකාර පොලිස් අධිකාරිවරයාට උපදෙස් දී ඇත්තේ අසාද් සාලි මහතාට ඇමතුමක් ගෙන ඒ ගැන විමසන ලෙසයි. ඒ අනුව සහකාර පොලිස් අධිකාරි තෙන්නකෝන් මහතා අනිත් නිලධාරීන් ද ඉදිරිපිට උදෑසන 11.28ට පමණ අසාද් සාලි මහතාට ඇමතුමක් ගෙන තිබේ. නියෝජ්‍ය පොලිස්පති දැනුම් දී ඇත්තේ දුරකතන ඇමතුම ගෙන සියලු දෙනාට ඇසෙන පරිදි ලවුඩ් ස්පීකර් දැමීමට බැවින් ඔහු එය සිදු කර ඇති අතර සැකකරුවන් දෙදෙනා ගෙනැවිත් බාර නුදුන් බව සහකාර පොලිස් අධිකාරිවරයා ප්‍රකාශ කිරීමෙන් පසු අසාද් සාලි ‘එයා ආවේ නැද්ද’ යැයි විමසා මඳක් රැඳී සිටින ලෙස දැනුම් දී වෙනත් අයකුට ඇමතුමක් දී ඇත. ඒ අතරතුර සහකාර පොලිස් අධිකාරිවරයා ඇමතුම විසන්ධි කර තිබේ.
මෙම සිද්ධිය අනවශ්‍ය ලෙස ඉස්මතු කිරීමකට ලක් කර ප්‍රධාන සිද්ධිය යටපත් කිරීමේ අරමුණක් ඇතිව හිටපු නියෝජ්‍ය පොලිස්පතිවරයා කටයුතු කර ඇති ද යන්න ගැන විමර්ශන කළ යුතුව තිබේ. ඊට හේතුව පාස්කු කොමිෂන් සභාවේදී සාක්කි දෙමින් සහකාර පොලිස් අධිකාරි කමල් පෙරේරා ප්‍රකාශ කළේ මෙම සැකකරුවන් අත්අඩංගුවට ගැනීමට විවිධ ප්‍රදේශවලට කණ්ඩායම් පිටත් කර හරිමින් සිටියදී සැකකරුවන් දෙදෙනා එදින ගෙනවිත් බාර දෙන බවට නියෝජ්‍ය පොලිස්පතිවරයා ප්‍රකාශ කළ බවයි. නියෝජ්‍ය පොලිස්පතිවරයා ඒ බව සඳහන් කර ඇත්තේ අසාද් සාලි කීවේ යැයි කියමින් පොලිස්පතිවරයා උපුටා දක්වමිනි. අසාද් සාලි එවැනි පොරොන්දුවක් නොවූ බවට ගාමිණී තෙන්නකෝන්, සහකාර පොලිස් අධිකාරිවරයා නියෝජ්‍ය පොලිස්පති කාර්යාලයේදී කළ දුරකතන සංවාදයේදී හැඟීයාමක් ගැන කමල් පෙරේරා සාක්කි දුන්නේය. සැකකරුවන් ගෙනැවිත් බාරදෙන බවට නොකී බව එම සංවාදයේදී ප්‍රකාශ වූ බව කමල් පෙරේරා මහතා කීවේය.
දිගටම විමර්ශන
මීට පෙර ලිපිය අවසන් කළ පරිදි දෙසැම්බර් 26 අලුයම බුදුපිළිම කැඩීමේ සිදුවීම් වාර්තාවීමත් සමඟ විමර්ශනවලට සහයෝගය දැක්වීමට අපරාධ පරීක්ෂණ දෙපාර්තමේන්තුවේ මාරසිංහ මහතා ඇතුළු කණ්ඩායමක් මාවනැල්ලට යොමු කෙරිණි. එසේම ශානි අබේසේකර මහතා ද 26 වැනිදා මාවනැල්ලට ගියේය. ඉන් පසු සහකාර පොලිස් අධිකාරි කමල් පෙරේරා සහ ශානි අබේසේකර විමර්ශන සම්බන්ධයෙන් සාකච්ඡා කළ බව කමල් පෙරේරා, ජනාධිපති කොමිසමට කීවේය.
අපරාධ පරීක්ෂණ දෙපාර්තමේන්තුවේ අධ්‍යක්ෂවරයා මෙවැනි අවස්ථාවකට සහභාගි වීම සිදු වන්නේ කලාතුරකින් බවත්, නාලන්ද එල්ලාවල ඝාතන සිද්ධිය විමර්ශනයට නිලධාරීන් යොමු කිරීමට අපරාධ පරීක්ෂණ දෙපාර්තමේන්තුවේ අධ්‍යක්ෂවරයා අදාළ ස්ථානයට ගිය පසු එහි අධ්‍යක්ෂවරයකු නිලධාරීන් යොමු කිරීම සඳහා එම ස්ථානයට පැමිණියේ මාවනැල්ල බුදුපිළිම සිදුවීමේදී බවත් සහකාර පොලිස් අධිකාරි කමල් පෙරේරා මහතා ජනාධිපති කොමිසමේදී සඳහන් කළේය. දෙසැම්බර් 26 වැනිදා දහවල් අදාළ සාකච්ඡාවලින් පසු විමර්ශනයට සහාය වීමට කණ්ඩායමක් තබා යන බව කියමින් ශානි අබේසේකර මහතා පිටව ගිය බව ද ඔහු කීවේය. කොමිසම එම අවස්ථාවේදී සහකාර පොලිස් අධිකාරිගෙන් විමසා සිටියේ අපරාධ පරීක්ෂණ දෙපාර්කමේන්තුව විමර්ශන බාර ගත් පසු අනිත් පොලිසිවලින් විමර්ශන කරන්නේ ද යන්නයි. එහිදී සහකාර පොලිස් අධිකාරි ප්‍රකාශ කළේ අපරාධ පරීක්ෂණ දෙපාර්තමේන්තුව විමර්ශන කළ ද තමන්ට ද දිගින් දිගටම විමර්ශන කරන ලෙසට පාලිත සිරිවර්ධන මහතා උපදෙස් දුන් බවයි.
ඒ අනුව අපරාධ පරීක්ෂණ දෙපාර්තමේන්තුව විමර්ශන බාර ගත්තේ ද එසේ නැත්නම් සහයෝගය දැක්වීම පමණක් කළේ ද, පාලිත සිරිවර්ධන මහතා දිගින් දිගටම ඔහු යටතේ සිටින කණ්ඩායම්වලට විමර්ශන කිරීමට උපදෙස් දුන්නේ ඇයි ද යන්න ගැන පරස්පරතාවක් මතුවිය.
මතු සම්බන්ධයි
තරිඳු ජයවර්ධන
