වී අලෙවි මණ්ඩලයට මුදල් නොදුන් මුදල් අමාත්‍යාංශයේ ඉහළ නිලධාරීන් සහල් මාෆියාවට රිසි සේ ගොවියා හා පාරිභෝගිකයා ගසාකෑමට ඉඩ දුන් බව හිටපු කෘෂිකර්ම ඇමැති මහින්ද අමරවීර මහතා පවසයි.
තමා කෘෂිකර්ම අමාත්‍යවරයා වශයෙන් වී අලෙවි මණ්ඩලයට වී මිල දී ගැනීමට මුදල් ලබාදෙන ලෙස මුදල් අමාත්‍යාංශයෙන් අවස්ථා ගණනාවක දී ඉල්ලා සිටි නමුත් මුදල් අමාත්‍යාංශයේ ඉහළ නිලධාරීන් මෙන්ම එවකට ජනාධිපති ආර්ථික උපදේශකවරයාත් වී අලෙවි මණ්ඩලයට මුදල් ලබා දීම ප්‍රතික්ෂේප කළ බව ද ඒ මහතා පෙන්වාදෙයි. මාධ්‍ය වෙත ප්‍රකාශයක් කරමින් හිටපු ඇමැතිවරයා මේ බව සඳහන් කළේය. එහිදී වැඩිදුරටත් අඳහස් පළකළ මහින්ද අමරවීර මහතා, මේ හේතු නිසා සහල් මාෆියාව රිසි සේ ගොවියාත් පාරිභෝගිකයාත් සූරා ගෙන කෑවා. හිටපු ජනාධිපති රනිල් වික්‍රමසිංහ මහතා දුන් උපදෙස් පවා මේ නිලධාරීන් තුට්ටු දෙකට මායිම් කළේ නෑ. අද වෙළෙඳපළේ නාඩු සහල්වල විශාල හිඟයක් තිබෙනවා. යල කන්නයේ සියලු වී අස්වනු තිබෙන්නේ මහ මෝල් හිමියන් ළඟ. මුදල් අමාත්‍යාංශයේ නිලධාරීන් කුඩා හා මධ්‍යම පරිමාණ හාල් මෝල් අයිතිකරුවන්ට වී මිල දී ගන්න මුදල් දුන්නා. නමුත් ඒ වැඩපිළිවෙළ නිසා ගොවියාටවත් පාරිභෝගිකයාටවත් සහනයක් ලැබුණේ නැහැ. මේ සහල් හිඟයට හා මිල ඉහළ යාමට වගකිව යුත්තේ මුදල් අමාත්‍යාංශයේ ඉහළ නිලධාරීන් බව මම කියනවා. මම අවස්ථා කිහිපයක දී මෙම කාරණය පෙන්වා දුන් නිසා අන්තිමට රුපියල් මිලියන 500ක් දුන්නා. හැබැයි එතකොට වී ඔක්කොම තිබුණේ මහ මෝල් අයිතිකාරයෝ ළඟ. වී අලෙවි මණ්ඩලය වී මිල දී ගන්නෙ නැහැ කියල කෑගහපු සමහර දේශපාලන පක්ෂවල ගොවි නියෝජිතයෝ වී අලෙවි මණ්ඩලයට වී ඇටයක්වත් දුන්නෙ නෑ.
එදා අවශ්‍ය වෙලාවට වී අලෙවි මණ්ලයට මුදල් ලබා දෙන්න මුදල් අමාත්‍යාංශයේ නිලධාරීන් කටයුතු කළා නම් අද සහල් හිඟයකුත් නෑ. සහල් මිල ඉහළ යන්නෙත් නෑ..
කොහොම වුණත් යල කන්නයේ ඉහළ වී අස්වැන්නක් ලැබුණා. අපි රජය වශයෙන් ගොවීන්ට පොහොර සහනාධාරය ලබා දුන්නා. ජනාධිපති රනිල් වික්‍රමසිංහ මහතා පසුගිය කන්න පහට රුපියල් මිලියන 50,000ක් වෙන්කළා යැයි පැවැසීය.
බුද්ධිකා ඉඹුලාන
