ආසියානු නෙට්බෝල් ශූරතාවලියේ පිට පිට හයවැනි ජයග්‍රහණය වාර්තා කළ ශ්‍රී ලංකා ක්‍රීඩිකාවෝ ඊයේ මාලදිවයින ලකුණු 80 – 32ක් ලෙස පරාජයට පත් කොට මූලික වටයේ සියලු තරග ජයග්‍රහණය කරමින් ප්‍රබල තත්ත්වයක සිටියහ.
ඉන්දියාවේ බැංගලෝර්හි කොරමන්ගලා ගෘහස්ථ ක්‍රීඩාංගණයේ පැවැත්වෙන මේ ශූරතාවලියේදී මාලදිවයින කණ්ඩායම පළමු කාර්තුවේදී ලකුණු 18 – 07කින් පරාජය කළ අතර, පළමු භාගය නිමාවෙද්දී ලකුණු තත්ත්වය 43 – 13ක් විය. තෙවැනි කාර්තුවේදී ලකුණු 64 – 24ක් ලෙස ශ්‍රී ලංකා පිල පෙරමුණ ගත්තේය.
මෙතෙක් ශ්‍රී ලංකාව සහභාගිවූ තරගවලදී මැලේසියාව ලකුණු 72 – 40කින්, ජපානය ලකුණු 85 – 18කින්, ඉන්දියාව ලකුණු 81 – 31කින්, සෞදි ආරබියාව ලකුණු 115 – 5කින් හා පිලිපීනය ලකුණු 73 – 43කින් පරාජය කළේය. ශ්‍රී ලංකා නෙට්බෝල් පිල වසර 1989 සිට 6 වතාවක් ආසියානු නෙට්බෝල් ශූරතාව දිනාගත් අතර, සිංගප්පූරුව අවස්ථා 3කදී හා මැලේසියාව අවස්ථා 2කදී ආසියානු ශූරියෝ වූහ.
