පාර්ලිමේන්තු මැතිවරණයේදී මහනුවර දිස්ත්‍රික්කයෙන් මන්ත්‍රී ධුර හතරක් හෝ පහක් නව ප්‍රජාතන්ත්‍රවාදී පෙරමුණ විසින් හිමි කර ගන්නා බව එම පක්ෂයේ මහනුවර දිස්ත්‍රික් අපේක්ෂක ළහිරු මධුශංක මහතා පවසයි.
නාවලපිටිය නගරයේදී මාධ්‍ය වෙත මේ බව පැවසු ළහිරු මධුශංක මහතා වැඩිදුරටත් මෙසේද පැවසීය.
මහනුවර දිස්ත්‍රික්කය නියෝජනය කරමින් නව ප්‍රජාතන්ත්‍රවාදි පෙරමුණ මෙවර ප්‍රබල අපේක්ෂක කණ්ඩායමක් මැතිවරණයට ඉදිරිපත් කර තිබෙනවා. ඒ තත්ත්වය මත මහනුවර දිස්ත්‍රික්කයේ මන්ත්‍රී ධුර 12න් මන්ත්‍රී ධුර හතරක් හෝ පහක් අපට ලබාගන්න පුළුවන්.
මහනුවර දිස්ත්‍රික්කයේ උඩුනුවර ප්‍රධාන සංවිධායක ලෙස මම මැතිවරණයට ඉදිරිපත් වෙලා ඉන්නවා. තරුණ දේශපාලකයෙක් විදියට මම මේ දිස්ත්‍රික්කයේ සංවර්ධන යෝජනා ක්‍රම රාශියක් සැලසුම් කර තිබෙනවා.
උඩුනුවර ආසනය සංචාරක කලාපයක් බවට පත් කිරීමත් ගලගෙදර හා හාරිස්පත්තුව ප්‍රදේශ අපනයන ගම්මාන බවට පත් කිරීමත් මහනුවර දිස්ත්‍රික්කයේ සුළු අපනයන භෝග වගාවන් සංවර්ධනය කිරීම මෙන්ම එම සුළු අපනයන භෝග විවිධ සතුන්ගෙන් බේරාගැනීමට අවශ්‍ය පියවර ගන්නේ කෙසේද යන්නත් පිළිබඳව සැලසුම් සකස් කර තිබෙනවා. එම තත්ත්වයන්ට අමතරව මේ දිස්ත්‍රික්කයේ විවිධ සංවර්ධන සැලසුම් රාශියක් සකස් කර අවසන්.
ව්‍යාපාර කළමනාකරණය පිළිබඳව උපාධියක් ලබා ඇති තමාට එම දැනුම උපයෝගි කරගෙන මේ ප්‍රදේශයේ ජනතාවගේ ආර්ථිකය නඟාසිටුවීමට විවිධ වැඩසටහන් මෙන්ම සැලසුම් ක්‍රියාත්මක කිරීමට අවශ්‍ය සහාය මේ මැතිවරණයේදී ලබාදීමට පියවර ගන්නා ලෙස මේ දිස්ත්‍රික්කයේ වෙසෙන සිංහල, දමිළ, මුස්ලිම් සියලු දෙනාගෙන් ඉල්ලා සිටින බවද ඔහු පැවසීය.
