ඇල්පිටිය ප්‍රාදේශීය සභා ඡන්ද විමසීම අද (26) පැවැත්වේ. ඒ සඳහා අවශ්‍ය සියලු නිලධාරීන්, ඡන්ද පත්‍රිකා සහ අනෙකුත් බඩුබාහිරාදිය ඊයේ (25) අදාළ මධ්‍යස්ථාන වෙත රැගෙන ගිය බව මැතිවරණ කොමිෂන් සභාව පැවැසීය.
අද (26) උදෑසන 7 සිට පස්වරු 4 දක්වා ඡන්ද විමසීම සිදුවන අතර ඊට අවශ්‍ය ආරක්ෂක විධිවිධාන යොදවා ඇති බව මැතිවරණ කොමිෂන් සභාවේ සභාපති ආර්. එම්. ඒ. එල්. රත්නායක මහතා පැවැසීය.
ඡන්ද මධ්‍යස්ථාන 48කදී ඡන්දය ප්‍රකාශ කිරීම සඳහා ඡන්දදායකයින් 55,643ක් සුදුසුකම් ලබා ඇති අතර 2018 වර්ෂයේ ඡන්දදායක ලියාපදිංචි කිරීමේ නාමලේඛනයට අනුව මෙම ඡන්ද විමසීම පැවැත්වෙන බව මැතිවරණ කොමිසම ප්‍රකාශ කළේය.
ඇල්පිටිය ප්‍රාදේශීය සභා මැතිවරණයේ ඡන්දය භාවිත කරනු ලබන ස්ථාන සියල්ලෙහිම නිරීක්ෂණ කටයුතු සඳහා තම නිලධාරීන් යොදවා ඇති බව පැෆ්රල් සංවිධානයේ විධායක අධ්‍යක්ෂ රෝහණ හේට්ටිආරච්චි මහතා සඳහන් කළේය.
