ඉන්දියාවේ මුම්බායි නුවර සිට කටුනායක ගුවන්තොටුපොළ වෙත පැමිණෙමින් තිබූ ඉන්දීය විස්තාරා ගුවන් සේවයේ යානය තුළ බෝම්බ ඇති බවට ඉන්දියාවේ විස්තාරා ගුවන් සේවා ප්‍රධාන කාර්යාලයේ ට්විටර් ගිණුම වෙත ලැබී තිබූ පණිවිඩයක් මත, කටුනායක ගුවන්තොටුපොළ දැනුවත් කිරීමෙන් අනතුරුව, එම ගුවන් යානය පූර්ණ හදිසි ගොඩබැස්සවීමකට ඊයේ (24) පස්වරුවේ පියවර ගෙන තිබුණි.
එයාර් බස් වර්ගයේ ඒ. 320 වර්ගයේ මෙම ගුවන් යානය තුළ ගුවන් මගීන් 107 දෙනකු සහ ගුවන් යානා කාර්යය මණ්ඩලය 08 දෙනෙකු ගමන් කරමින් සිටියහ.
මෙම ගුවන් යානයේ හදිසි ගොඩබැස්සවීම සඳහා ගිනි නිවීම් රථ, වෛද්‍යවරුන්, හෙදියන්, ගිලන් රථ, බෝම්බ නිශ්ක්‍රීය අංශයේ නිලධාරීන්, ගලවා ගැනීමේ සහ සහන සේවකයන්, පුපුරන ද්‍රව්‍ය අනාවරණය කර ගැනීමට පුහුණු කළ සුනඛයන්, පුපුරන ද්‍රව්‍ය කල් තබා හඳුනා ගත හැකි ඉලෙක්ට්‍රොනික උපකරණ රැගත් භට පිරිසක් ඇතුළු විශාල පිරිසක් කටුනායක ගුවන්තොටුපොළ ධාවන පථය අසලට රැස් කර සිටියහ.
විස්තාරා ගුවන් යානය කටුනායක ගුවන්තොටුපොළ වෙත ගොඩබැස්සවීමෙන් අනතුරුව, ගුවන් යානය ධාවන පථයේ කෙළවර වෙත රැගෙන ගොස්, පරීක්ෂණ කටයුතු සිදු කෙරුණි.
මුලින්ම ගුවන් යානයේ පැමිණි මගීන් සහ කාර්යය මණ්ඩලය පරීක්ෂා කර පිටතට ගත් අතර, පසුව ගුවන් යානයේ ගමන් මලු සඳහා භාණ්ඩ ගබඩා ප්‍රදේශය පරීක්ෂාවට ලක් කෙරුණි.
සවස 05.00 පමණ වන විට මෙම ගුවන් යානයේ සියලුම පරීක්ෂා කිරීම් නිමා කර තිබූ අතර මෙම ගුවන් යානය තුළ පුපුරන ද්‍රව්‍ය කිසිවක් හමුනොවූ බව ගුවන් තොටුපොළ ප්‍රකාශකවරයකු පැවසීය.
මෙම ගුවන් යානය තුළ පසුගිය 19 වැනි දින ද බෝම්බ ඇති බවට කටුනායක ගුවන්තොටුපොළ වෙත තොරතුරු වාර්තා වීමත් සමඟම මේ ආකාරයටම මෙම ගුවන් යානය පරීක්ෂා කිරීමකට ලක් කළ අතර ඉන්දීය ගුවන් සේවා සමාගම් සියල්ලටම මේ ආකාරයට බෝම්බ තර්ජන එල්ල වෙමින් පවතී.
