හැටේ දශකයේ අගභාගයේදී අතිශය ජනප්‍රියත්වයට පත්වූ ‘ටාසන්’ රූපවාහිනී වෘතාන්ත කතා මාලාවට පණ දුන් අමෙරිකානු නළු රොන් එලී මෙලොව හැර ගොස් ඇතැයි විදෙස් මාධ්‍ය වාර්තා කළේය. 86 හැවිරිදි වියෙහි පසුවූ තිදරු පියකු වන රොන් එලී කැලිෆෝනියා ප්‍රාන්තයේ සිය දියණියකට අයත් නිවෙසකදී ජීවිතයෙන් සමුගෙන ඇත්තේ පසුගිය සැප්තැම්බර් මාසයේ 29 වැනිදා බවත්, ඔහුගේ දියණිය පසුගියදා නිවේදනය කරනතුරු රොන් එලීගේ මරණය ප්‍රසිද්ධියට පත් නොවූ බවත් විදෙස් මාධ්‍ය වැඩිදුරටත් වාර්තා කළේය. ළමා ලෝකයේ පමණක් නොව තරුණ මහලු කාගෙත් ආදරය දිනාගත් ලෝක ප්‍රකට ‘ටාසන්’ ප්‍රබන්ධ චරිතයට පණ පෙවූ නළුවන් අතුරින් වඩාත්ම ජනප්‍රියත්වයට පත්වූ නළුවා ලෙස සැලකෙන අඩි 6කුත්, අඟල් 4ක් උසැති රොන් එලී ටාසන් චරිතයට පණ පෙවීමට පෙර හොලිවුඩ් චිත්‍රපට රැසකට රංගනයෙන් එක්වී සිටි අතර, ටාසන් රූපවාහිනි වෘතාන්තයට එක්වීමට පෙර එවැනි වෘතාන්ත 9කටම දායකත්වය ලබා දී තිබිණි. නළුවකු ලෙස පමණක් නොව නවකතාකරුවකු ලෙස ද නමක් දිනා සිටි රොන් එලී නවකතා දෙකක් ද රචනා කර ඇතැයි වාර්තා වේ.
නළුවකු ලෙස මෙන්ම තරුණියන්ගේ ආදරය දිනූ කඩවසම් පෙම්වතකු ද වන රොන් සිය පාසල් පෙම්වතිය හෙලන් ජෙනට් සමඟ සිදු කළ විවාහය වසර දෙකකින් බිඳවැටුණු බවත්, අනතුරුව එවකට හොලිවුඩ් සිනමාවේ සිටි සුරූපි නිළියක වූ උර්සුලා ඇන්ඩ්‍රෙස් ඇතුළු නිළියන් කිහිපදෙනකු සමඟම පෙමින් බැඳී සිටි බවත් වාර්තා වේ. අනතුරුව ඔහු ෆ්ලොරිඩා ප්‍රාන්තයේ රූ රැජනක වූ වැලරි ලුන්ඩින් සමඟ 1984දී අතිනත ගත් බවත්, ඇය 2019 වසරේදී නාඳුනන පුද්ගලයකු අතින් සිදුවූ පිහි ඇනුමකින් ඝාතනයට ලක්වූ බවත් වාර්තා වේ.
