රත්මලාන දුම්රිය අංගණයේ දේපොළ සොරාගැනීමට ඊයේ (23) අලුයම දුම්රිය අංගණය ඇතුළට පැමිණි මත්කුඩුලෝලීන් පස් දෙනෙකුගෙන් එක් අයෙකුට ආරක්ෂක නිලධාරින් තැබූ වෙඩි පහරක් කකුලට වැදී තුවාල ලබා ඇති බවත්, සැකකරුවන් පහරදීමෙන් ආරක්ෂක නිලධාරි මහතකු ඇතුළු දෙදෙනකු දකුණු කොළඹ ශික්ෂණ රෝහල වෙත ප්‍රතිකාර සඳහා ඇතුළත් කරනු ලැබ ඇතැයි පොලිස් මාධ්‍ය කොට්ඨාසය පවසයි.
මෙම සිදුවීම ඊයේ (23) අලුයම 3.00ට පමණ සිදුවී ඇති බවත් පස්දෙනෙකු දුම්රිය අංගණයට ඇතුළු වී දුම්රිය දේපොළ සොරාගැනීමට තැත් කිරීමේදී ආරක්ෂක නිලධාරින් විසින් ඔවුන් අත්අඩංගුවට ගැනීමට සැරසීමේදී එකී සැකකරුවන් ආරක්ෂක නිලධාරින්ට පහරදී පලා යාමට උත්සාහ කර ඇති අතර, එම අවස්ථාවේ ආරක්ෂක නිලධාරින් තැබූ වෙඩි පහරක් සැකකරුවකුගේ කකුලකට වැදී වැටී සිට ඇති අතර, අනෙක් සැකකරුවන් හතර දෙනා පලාගොස් ඇති බවත් පොලිසිය පැවසීය.
ඒ අනුව ආරක්ෂක නිලධාරින් විසින් හදිසි අනතුරු සේවා 1990 ගිලන් රථයක් ගෙන්වාගෙන තුවාල ලබා සිටි සැකකරු හා සැකකරුවන් පහර දීමෙන් තුවාල ලැබූ ආරක්ෂක නිලධාරි මහතාද වහාම දකුණු කොළඹ ශික්ෂණ රෝහල වෙත ප්‍රතිකාර සඳහා ඇතුළත් කරනු ලැබ ඇත.
මේ පිළිබඳව වැඩිදුර පරීක්ෂණ ගල්කිස්ස ජ්‍යෙෂ්ඨ පොලිස් අධිකාරි ප්‍රශන්න බ්‍රාහ්මණගේ මහතාගේ අධීක්ෂණය මත ගල්කිස්ස මූලස්ථාන ප්‍රධාන පොලිස් පරීක්ෂක දිලීප සී. පෙරේරා මහතාගේ උපදෙස් මත පොලිස් කණ්ඩායමක් විසින් සිදුකර‍ෙගන යනු ලබයි.
