බලාපොරොත්තු වූ වෙනස යථාර්ථයක් කරන්න අපට පුළුවන්
ජාතික ජන බලවේගයේ ගාලු දිසා කාන්තා බළකායේ විධායක කමිටු සාමාජිකා, පාර්ලිමේන්තු මන්ත්‍රීධුර අපේක්ෂිකා, නීතිඥ හසාරා ලියනගේ
* ඔබ ක්‍රියාකාරී දේශපාලනයට සම්බන්ධ වෙන්නේ මොන විදිහට ද?
ඇත්තටම සමාජ ක්‍රියාකාරිනියක් විදිහට වැඩ කළාට දේශපාලනයට සම්බන්ධ වෙන්නේ 2022 දී වගේ මෑත කාලයේ. විශේෂයෙන්ම ජාතික ජන බලවේගයේ “ගැහැනු අපි එක මිටට” කියන තේමාවත් එක්ක කාන්තාවන් බලමුළුගැන්වීමේ වැඩසටහනත් එක්ක. එහිදී බිම්මට්ටමේ සංවිධාන කටයුතු, සංවිධාන ව්‍යුහයන් ගොඩනැඟීමට මං දායක වෙනවා. එතැනින් එහාට ගාල්ල දිස්ත්‍රික්කය පුරාම කාන්තා සවිධාන ගොඩනැඟීම හා කාන්තාවන් දේශපාලනිකව දැනුවත් කිරීමේ ක්‍රියාවලිය මේ දක්වාම අඛණ්ඩව සිද්ධ වෙනවා.
* ඔබ වෘත්තියෙන් නීතිඥවරියක්. වෘත්තීය ජීවිතය දේශපාලනයත් එක්ක බැඳීමක් තියෙනවාද? ගැටීමක් තියෙනවාද?
ඔබ කීවා වගේ මං මූලික වශයෙන් බලපිටිය උසාවියේ නීතිඥවරියක් විදිහට වැඩ කරනවා. හැබැයි ඒ විතරක් නෙවෙයි, පෞරුෂ සංවර්ධන පුහුණුකාරිනියක් ලෙසත් මං වැඩ කරනවා. ඒක මට බාධාවක් නම් වුණේ නෑ. මොකද මම වැඩකරපු හා දැනටමත් වැඩ කරන මේ වෘත්තීන් දෙකම මට දේශපාලනයට පිටිවහලක් වුණා. වෙනත් විදිහකට කියනවා නම් මේ ක්ෂේත්‍ර දෙකම මිනිසුන්ගේ ප්‍රශ්න ගැන, කතා කරන ගැටෙන ක්ෂේත්‍රයන් දෙකක්. ඒ නිසාම එයින් මට මගේ දේශපාලන ක්‍රියාකාරකම් හා අත්දැකීම්වලට ඒ තුළින් ලොකු පිටිවහලක් ලැබනෙවා. මේ නිසා මට මිනිසුන්ට තියෙන ප්‍රශ්න ගැන හොඳ අවබෝධයක් ලැබුණා.
* ප්‍රධාන ධාරාවේ ක්‍රියාකාරී දේශපාලන පක්ෂ හා සංවිධාන බොහෝ තිබියදී, ඔබ ජාතික ජන බලවේගය වගේ පක්ෂයක් තෝරා ගන්නේ ඇයි?
මෙතුවක් කාලයක් පුරාවටම අපි වෙනත් පක්ෂවල වැඩපිළිවෙළ දැක්කා. එයාලා ඇත්තටම වැඩ කරන විදිහ දැක්කා. ඒ හැම තැනකදීම කාන්තාවන් යොදාගනු ලැබුවේ ඡන්දය ගැනීම සඳහා පමණයි. ඒත් ජාතික ජන බලවේගය කාන්තාවන්ට දෙන්නේ මොන වගේ තැනක්ද කියන එකට හොඳම උදාහරණය තමා වත්මන් අගමැතිනිය හරිනි අමරසූරිය සහෝදරිය. එතකොට ඇය ඇත්තටම මට දේශපාලනයට පූර්වාදර්ශයක් සැපයූවා. මං වගේම තවත් කාන්තාවන් බොහෝමයකට මේ දේශපාලනයට එකතුවෙන්න උත්තේජනය සැපයුවා. සක්‍රියව මැදිහත් වෙන්න ප්‍රධාන හේතුවක් ඒක.
* ඔබ ගම්මට්ටමින් සංවිධානයේ පහළ තලය සංවිධානය කරන කෙනෙක් විදිහට, ඒ මට්ටමේ මිනිසුන්ට ඇත්තටම තමන්ගෙ එදිනෙදා අවශ්‍යතාවලින් එහාට ගිය ඔබලා යෝජනා කරන විදිහේ වෙනසක් ගැන අවබෝධයක් තියෙනවද?
ඔබ කියනවා වගේ පහුගිය හැම ආණ්ඩුවම, හැම දේශපාලන පක්ෂයක්ම කළේ ගමට බෝක්කුවක් පාලමක්, පුද්ගලිකව මොකක් හරි එදිනෙදා සුළු වාසියක් එක්ක දේශපාලනය කරන එක තමා. මිනිස්සු ඡන්දය දුන්නෙත් එහෙම. මිනිස්සුත් දැනගෙන හිටියා මේ අය අපේ ළඟට එන්නෙ ඡන්දෙ කාලෙට විතරයි කියලා. ඒත් දැන් එහෙම නෑ.
මේ මෑත කාලය පුරාවටම අපි ගම්වල ගෙවල් ගානෙ ඇවිද්දා. තාමත් ඇවිදිනවා. දැන් මිනිස්සු තමන්ගෙ පෞද්ගලික අවශ්‍යතාවන්ගෙන් එහාට ගිහිල්ලා. ‘අපට පෞද්ගලිකව මොනවත් නැති වුණාට කමක් නෑ. මේ රට හැදෙනව නම් ඒ ඇති’ කියලා හිතන අය තමා දැන් වැඩිපුරම ඉන්නෙ. අද දවස පුරාම තිබුණු රැස්වීම් ඉවර කරලා එද්දිත් මිනිස්සු කියන්නෙ ඒකයි. එහෙම මිනිස්සු සාධනීය විදිහට වෙනස් වුණේ නැතිනම් 3%ක තිබුණු පක්ෂයක් රටේ ජනාධිපතිවරයා තෝරාපත් කර ගැනීමට තරම් වර්ධනය වෙන්නට හේතුවක් නෑනෙ. දේශපාලනයේ ලොකු පරිවර්තනයක් වෙලා තියෙනවා. බිම්මට්ටමේ මිනිස්සු පවා අපි රැස්වීමකට ගියාම අපට පුද්ගලිකව කිසිදු දෙයක් එපා කියනවා. පොදුවේ මිනිස්සුන්ට නිදහසේ ජීවත් වෙන්න පුළුවන් රටක් හදල දෙන්න කියලා තමා කියන්නෙ. මිනිසුන්ගේ ආකල්ප වෙනස්වීම තමා වැදගත්.
* මේ මහ මැතිවරණයෙන් ශක්තිමත් ආණ්ඩු බලයක් ලබා ගත හැකි ඡන්ද ප්‍රතිශතයක් ලැබෙයිද ?
අනිවාර්යයෙන්ම අපි මේ සැරේ බහුතර බලයක් තියෙන ශක්තිමත් පාර්ලිමේන්තුවක් හදනවා. ඒ වෙනුවෙන් මිනිස්සු එකතු වෙලා ඉන්නවා. පහුගිය වතාවේදී ප්‍රතිවාදී කණ්ඩායම් නඟපු බොරු, මඩ අවලාද විශ්වාස කරපු බොහෝ පිරිසක් අපට ඡන්දය දෙන්න බයෙන් හිටියා. දේශපාලන පළිගැනීම් සිද්ධ වෙයි. මේ රට ලේ විලක් වෙයි වගේ ඉතාම ම්ලෙච්ඡ සහගත ප්‍රකාශ කළා. ඒත් දැන් මිනිස්සු දන්නවා අපි කියන දේ කරන නිසි වැඩපිළිවෙළක් තියෙන බලවේගයක් කියලා. ඒක අපි ඔප්පු කරලයි ඉන්නෙ. අපරාදෙ ඡන්දෙ නොදුන්නෙ කියලා කියන අය ගම්වලදි මට හම්බවෙනවා. ගෘහස්ථ සාකච්ඡාවක්, රැස්වීමක් ඉවර වුණාම ජනාධිපතිවරණයේදී නොදුන්නු, දැන් එකතුවුණු අය සිටින බව පේනවා. කලින් ගත්තු ජන වරමට වඩා ප්‍රතිශතයකින් අපට දිනන්න පුළුවන්. මේ මහමැතිවරණයෙන් ශක්තිමත් පාර්ලිමේන්තුවක් අපි නියත වශයෙන්ම හදනවා.
* අනුර සහෝදරයා යන්නෙත් ගිය ජනාධිපතිවරයා ගිය පාරෙමයි කියලා විපක්ෂයේ අය චෝදනා කරනවා. ඒක එහෙම නෙවෙයිද?
පක්ෂයක් විදිහට නෙවෙයි, මේ පාරේ අපි රටක් විදිහට ටික දුරක් ඇවිත් ඉන්නෙ. එතකොට ආපහු හැරෙන්න අමාරුයි. මිනිස්සුන්ට ප්‍රශ්නය තිබුණේ අත්‍යවශ්‍ය මොහොතක ණය ගැනීම නෙවෙයි, ගන්න ණයෙනුත් හොරා කයිද කියන බය. මීට කලින් දිගටම වෙලා තිබුණෙ එහෙම එකක්. මූල්‍යමය විනිවිදභාවය නැතිකම ලොකු ප්‍රශ්නයක්. සාමාන්‍ය ජන ජීවිතය කඩාකප්පල් වෙන, ඒකට බාධා කරන කිසිදු දෙයක් අපි කරන්නෙ නෑ. මූල්‍යමය විනිවිදභාවය ආරක්ෂා කරනවා. එක සත පහකවත් වංචාවක් දූෂණයක් නොවන විදිහට වැඩ කරනවා. මිනිසුන්ට ප්‍රතිලාභ ලැබෙන විදිහට ඒ ණය ආයෝජනය කරනවා. පසුගිය නායකයින් නොකළේම ඒකයි.
* තාම වෙනසක් දැනිලා නෑ කියලත් සමහරු චෝදනා කරනවා. අවසාන වශයෙන් ඒ ගැන මොකද හිතන්නේ?
2048 වෙනකල් ඉවසන්න කියල කියපු අයට තමා දැන් ලොකුම හදිස්සිය. දැන් මේ රට කරන්නෙ ලෝකයේ කුඩාම කැබිනට් මණ්ඩලයක්. මේ ගෙවෙන්නේ සංක්‍රාන්ති යුගයක්. මරණ මංචකයේ සිටින ලෙඩෙක් වගේ රට තියෙන්නෙ. අපට කෙටි කාලීන, මධ්‍ය කාලීන හා දිගු කාලීන වැඩපිළිවෙළක් තියෙනවා. ඒකත් එක්ක රට ඉදිරියට යනවා. ප්‍රතිවාදීන්ට බොරු ප්‍රචාර කරන්න පුළුවන්. ඒත් ඒවට මිනිස්සු වලංගුතාවක් දෙන්නෙ නෑ. ඉදිරි පාර්ලිමේන්තු මැතිවරණයෙන් පසු අපගේ ප්‍රතිපත්ති ප්‍රකාශනයේ තියෙන බොහෝ දේවල් නිසි කලට වෙලාවට කරමින් මිනිසුන් බලාපොරොත්තු වූ වෙනස යථාර්ථයක් කරන්න අපට පුළුවන්.
ප්‍රියාන් ආර්. විජේබණ්ඩාර
මේ ආණ්ඩුවට බලය දීලා වැඩ කරන්න යම් සාධනීය කාලයක් දිය යුතුයි
සර්වජන බලය සන්ධානයේ මාතර දිස්ත්‍රික් කණ්ඩායමේ නායක, හිටපු පාර්ලිමේන්තු මන්ත්‍රී වීරසුමන වීරසිංහ
අද මුහුණට මුහුණ සංවාදය සඳහා එක්වන්නේ ජාතික ජන බලවේගයේ ගාලු දිසා කාන්තා බළකායේ විධායක කමිටු සාමාජිකා, මෙවර පාර්ලිමේන්තු මන්ත්‍රීධුර අපේක්ෂිකා, නීතිඥ හසාරා ලියනගේ සහ සර්වජන බලය සන්ධානයේ මාතර දිස්ත්‍රික් කණ්ඩායමේ නායක, හිටපු පාර්ලිමේන්තු මන්ත්‍රී වීරසුමන වීරසිංහ යන අයයි.
* මහමැතිවරණය සම්බන්ධයෙන් තබා තිබෙන බලාපොරොත්තු මොනවාද ?
මෙවර මහමැතිවරණය සඳහා පක්ෂ රැසක් සමඟ සන්ධානගතව තමයි සර්වජන බලය සන්ධානය මැතිවරණයට ඉදිරිපත් වෙන්නේ. අපි සන්ධානයක් විදියට දිස්ත්‍රික්ක 22ක් සඳහා තරග කරනවා. දේශපාලන අද්දැකීම් තිබෙන, විවිධ වෘත්තීන් නියෝජනය කරන, තරුණ තරුණියන් වගේම දක්ෂ, උගත් බුද්ධිමත් පිරිසක් මෙවර ඉදිරිපත් කරලා තිබෙනවා. එම නිසා අපිට විස්වාසයක් තිබෙනවා අපි නියෝජනය කරන සෑම දිස්ත්‍රික්කයකින්ම එක මන්ත්‍රී ධුරයක් හෝ ඊට වැඩි සංඛ්‍යාවක් ලබාගන්න පුළුවන් කියලා. එම නිසා මම ජනතාවගෙන් ඉල්ලා සිටින්නේ ආණ්ඩු පක්ෂයට හෝ විපක්ෂයට නියෝජිතයන් තෝරා යැවීමේ දී වංචාවට, දූෂණයට වගේම භීෂණයට සම්බන්ධ නොවූ පිරිස් යවන්න කියලා.
* ඔබ පාර්ලිමේන්තු මන්ත්‍රීවරයෙකුගේ භූමිකාව ආරම්භ කරන්නේ ශ්‍රී ලංකා පොදුජන පෙරමුණත් සමග. එහෙත් ඔබ මෙවර තරග කරන්නේ වෙනත් සන්ධානයකින්. ඇයි එම පක්ෂය අතහැර වෙනත් තැනකට යන්න තීරණය කරන්නේ ?
ශ්‍රී ලංකා පොදුජන පෙරමුණ ගොඩනඟන්න, එය ශක්තිමත්ව ජනතාව අතරට ගෙනියන්න අපි විශාල කැපකිරීමක් කළා. එහිදී අපි ජනතාවට සුවිශේෂී බලාපොරොත්තු රැසක් දුන්නා. ඒ සියල්ල විශ්වාස කරලා තමයි ජනතාව විශාල ඡන්ද සංඛ්‍යාවකින් ජනාධිපතිවරයා පත් කළේ. තුනෙන් දෙකකට ආසන්න පාර්ලිමේන්තු බලයක් දුන්නේ. එහෙත් ටික කාලයක් යද්දි ආණ්ඩුව ජනතාවට ලබාදුන් පොරොන්දුවලින් බැහැර වෙලා වෙනත් ගමනක් යන්න පටන් ගත්තා. එම පොරොන්දු අමතක වෙන්න පටන් ගත්තා. අප දිගින් දිගටම සටන් කළා ඒ ගමන වෙනස් කරලා ජනතාව ඉල්ලූ ගමන යන්න. එහෙත් එය සිදු නොවන බව අවබෝධ වෙද්දි ඒ මොහොතේ තිබුණ ප්‍රබල ආණ්ඩු පක්ෂයෙන් ඉවත්ව විපක්ෂයට ගොස් ජනතා අභිලාෂයන් වෙනුවෙන් පෙනී සිටින්න මම තීරණය කළා. මම හිතන්නේ මාතර දිස්ත්‍රික්කය නියෝජනය කළ ආණ්ඩු පක්ෂයේ මන්ත්‍රීවරුන්ගෙන් මුලින්ම විපක්ෂයට ගියේ මමයි.
* ඔබ ඉදිරිපත් වෙන්නේ අලුත් කණ්ඩායමක් එක්ක. ජයග්‍රහණය කරන්න පුළුවන් කියන විස්වාසය තිබෙනවාද ?
අපේ කණ්ඩායම අලුත් නැහැ. ප්‍රාදේශීය මට්ටමේ සිට පාර්ලිමේන්තු දක්වා අද්දැකීම් තිබෙන පිරිස් අපේ කණ්ඩායමේ ඉන්නවා. උගත්, බුද්ධිමත් පිරිස් ඉන්නවා. තරුණ තරුණියන් ඉන්නවා. ව්‍යසායකයන් වගේම විවිධ වෘත්තීන් නියෝජනය කරන පිරිස් ඉන්නවා. මේ අය පසුගිය කාලය පුරාවටම ජනතාව සමඟ වැඩ කළ අය. අපි සමඟ ඉන්න කිසිවෙකුට චෝදනා නැහැ. විශේෂයෙන්ම මම දේශපාලනය පටන් අරගෙන අවුරුදු 27ක් වෙනවා. ප්‍රාදේශීය සභාව, පළාත් සභාව වගේම පාර්ලිමේන්තුවත් නියෝජනය කරන්න හැකියාව ලැබිලා තිබෙනවා. පාර්ලිමේන්තුවේ හිටිය අවුරුදු හතරක කාලය තුළ මගේ දිස්ත්‍රික්කයේ ජනතාවගේ වගේම සමස්ත රටේ ජනතාවගේ ප්‍රශ්න වෙනුවෙන් පෙනී සිටියා.
* ඒ කියන්නේ ජාතික ජන බලවේගයට හෝ ඉදිරිපත් වී සිටින අනෙක් පක්ෂවලට වඩා ඔබේ පක්ෂය ප්‍රබලයිද ?
අපි බිම් මට්ටමේ සිට දේශපාලනය කරන පිරිස්. මම කියන්නේ නැහැ මේ වෙලාවේ ජාතික ජන බලවේගය පරාජය කරලා ආණ්ඩු බලය ලබා ගන්න පුළුවන් කියලා. මම අපේ දිස්ත්‍රික්කය ගැන කතා කරන්නම්. එහිදී ජාතික ජන බලවේගය දිස්ත්‍රික්කය ජයග්‍රහණය කරාවි. නමුත් අපිට දිස්ත්‍රික්කයෙන් මන්ත්‍රී ධුර දෙකක් හෝ තුනක් ලබාගත හැකි බව බිම් මට්ටමත් එක්ක කටයුතු කරද්දී හැඟී ගොස් තිබෙනවා. අනෙක් කාරණය ජාතික ජන බලවේගයේ ජනාධිපතිවරයෙක් දැන් ඉන්නේ. ඔවුන්ට ආණ්ඩු බලය ලබාදීලා යම් සාධනීය කාලයක් වැඩ කරන්න ඉඩ ලබාදිය යුතුයි. හොඳ දෙයක් වෙනවා නම් සහයෝගය දෙන ගමන් වැරැදි දෙයක් වෙනවා නම් අනිවාර්යෙන්ම ඊට විරුද්ධව පෙනී ඉන්න අප කටයුතු කරනවා. ඒ වගේම ඉදිරිපත් වෙලා ඉන්න අනිත් කණ්ඩායම් දිහා බැලුවම සර්වජන බලවේගය ඊට වඩා ප්‍රබල තැනක ඉන්නවා. ඒ කියන්නේ ප්‍රබල විපක්ෂයකට නායකත්වය දෙන්න අපේ සන්ධානයට පුළුවන් කියන විශ්වාසය අපිට තිබෙනවා.
* එහෙත් පාර්ලිමේන්තුව නියෝජනය කළ බොහෝ පිරිසක් මෙවර මැතිවරණයට තරග කරන්නේ නැහැ. ඔබේ දිස්ත්‍රික්කය ගත්තත් එය දකින්න පුළුවන්. එවැනි තත්ත්වයක් තිබියදී මෙවර ඉදිරිපත් වෙන්න බියක් හෝ චකිතයක් තිබුණේ නැද්ද ?
පසුගිය කාලයේ හිටපු මන්ත්‍රීවරු, ප්‍රබල යයි කියා ගන්නා විශාල පිරිසක් මෙවර ඡන්දය ඉල්ලන්නෙම නැතුව ඉවත් වෙලා ඉන්නවා. තවත් පිරිසක් ජාතික ලයිස්තුවලට රිංගගෙන ඉන්නවා. තමන් හරියට වැඩ කළානම්, ජනතා අභිලාෂයන් වෙනුවෙන් නිවැරැදි ලෙස පෙනී සිටිය නම් අයින් වෙන්න හේතුවක් නැහැ. අපේ දිස්ත්‍රික්කයේ පවා පසුගිය වර ඉල්ලු පිරිසගෙන් බහුතරයක් මෙවර ඉල්ලන්නේ නැහැ. මට එවැනි කිසිම බියක් හෝ චකිතයක් නැහැ. මම හැමදාම නිවැරැදි දේ වෙනුවෙන් පෙනී සිටියා. පාසල් යන කාලයේ පවා මම නිවැරැදි දේ වෙනුවෙන් පෙනී සිටියා. ජනතාව අතරට යද්දි ඔවුන් කියන්නේ මන්ත්‍රීතුමා විතරයි අපි වෙනුවෙන් පෙනී සිටියේ කියලා. ඒ නිසා නොබියව ඉදිරිපත් වුණා.
* ඇත්තටම පසුගිය පාර්ලිමේන්තුව නියෝජනය කරපු 225 දෙනාම දූෂිතයන් ද ?
ඒක මම පිළි ගන්නේ නැහැ. ඔය 225 අතර වංචාවට, දූෂණයට, භීෂණයට සම්බන්ධ නොවූ පිරිසක් ඉන්නවා. ඒත් කිහිප දෙනෙක් ඒවා කරද්දි 225ටම ඒ ඇඟිල්ල දික් වෙනවා. මම විශ්වාස කරනවා පසුගිය පාර්ලිමේන්තුව නියෝජනය කරපු ඇතැම් පිරිසක් ඉන්නවා තව දුරටත් පාර්ලිමේන්තුවේ රැ‍ඳෙන්න ඕන. නමුත් අවාසනාවකට එම තත්ත්වය නැතිව ගොස් තිබෙනවා.
*අවසාන වශයෙන් සර්වජන බලය සන්ධානය මහමැතිවරණයෙන් ඉහළ ජයග්‍රහණයක් ලබාගන්න පුළුවන් යැයි ඔබ විශ්වාස කරනවාද ?
දිස්ත්‍රික් 22කට අපි තරග කරනවා. ඒ අතුරින් මාතර, ගාල්ල, ගම්පහ, කුරුණෑගල, නුවර, කොළඹ වගේම දිස්ත්‍රික් ගණනාවක් අපිට ඉහළ වාසි තිබෙනවා. එම දිස්ත්‍රික්කවලින් මන්ත්‍රී ධුර දෙකක් හෝ තුනක් ගන්න පුළුවන්. විශේෂයෙන්ම මම නියෝජනය කරන මාතර දිස්ත්‍රික්කයෙන් මන්ත්‍රී ධුර දෙකක් හෝ තුනක් ලබා ගන්න පුළුවන් කියන විශ්වාසය අපිට දැඩිව තිබෙනවා. ඒ අනුව ගනිද්දී ඊළඟ පාර්ලිමේන්තුවේ විපක්ෂයට නියම නායකත්වය ලබා දෙන්න පුළුවන් සර්වජන බලය සන්ධානයට කියන එක මම විශ්වාසයෙන් කියනවා.
නුවන් කොඩිකාර
