මන්නාරම් මහාධිකරණ විනිසුරුවරයාට අපහාස වන අයුරින් පෝස්ටර් දැන්වීම් ඇලවූ බව කියන සිද්ධියට අදාළ මහමොළකරු යැයි කියන හිටපු පාර්ලිමේන්තු මන්ත්‍රී ජේ. ශ්‍රී රංගා මහතා අත්අඩංගුවට නොගන්නා ලෙසට ඉදිරිපත් කරනු ලැබූ අපේක්ෂිත ඇප අයැදුම්පත කොළඹ ප්‍රධාන මහේස්ත්‍රාත් තිළිණ ගමගේ මහතා ඊයේ (23) ප්‍රතික්ෂේප කළේය.
සිද්ධියට අදාළව පෙර නඩු දිනයක දී පෙත්සම්කරු විසින් ඉදිරිපත් කරනු ලැබූ අපේක්ෂිත ඇප ලේඛනයේ කරුණු සලකා බැලීමෙන් අනතුරුව මහේස්ත්‍රාත්වරයා විසින් මෙම නියෝගය ලබා දෙන ලදී.
මෙම සිද්ධියට අදාළව විමර්ශන කටයුතු සඳහා කොළඹ අපරාධ කොට්ඨාසයට පැමිණ ප්‍රකාශයක් ලබාදෙන ලෙසට ජේ. ශ්‍රී රංගා මහතාට දැනුම් දී තිබුණත් ප්‍රකාශය ලබාදීම මඟහැර තිබීම පිළිබඳ කොළඹ අපරාධ කොට්ඨාසය අධිකරණයට පැවසූ අවස්ථාවේ මහේස්ත්‍රාත්වරයා විසින් මෙම නියෝගය ලබා දෙන ලදී. හිටපු පාර්ලිමේන්තු මන්ත්‍රී ශ්‍රී රංගා පදිංචි නි‍ෙවසට කොළඹ අපරාධ කොට්ඨාස විමර්ශනය කටයුතු සඳහා ගිය අවස්ථාවේ එම නිවෙස හැර දමා ගොස් තිබූ නිසා අත්අඩංගුවට ගැනීමට නොහැකි වූ බව කොළඹ අපරාධ කොට්ඨාසය අධිකරණයට දැනුම් දුන්නේය. කොළඹ අපරාධ කොට්ඨාසය වෙනුවෙන් පෙනී සිටි රජයේ නීතිඥ ශක්ති ජාගොඩ ආරච්චි මහතා සඳහන් කරනු ලැබුවේ, කොළඹ අපරාධ කොට්ඨාසයේ නිලධාරීන් විසින් පැමිණ ප්‍රකාශයක් ලබා දෙන ලෙස මන්ත්‍රී ශ්‍රී රංගා මහතාට ඉකුත් 8 දින දැනුම්වත් කර තිබූ බවය.
එදින ප්‍රකාශ ලබා දීමට නොපැමිණි මන්ත්‍රීතුමා දොළොස්වන දින පැමිණෙන ලෙසට පවසා දිනෙන් දින කොළඹ අපරාධ කොට්ඨාසය මඟහැර තිබූ බව නීතිඥවරයා අධිකරණයට දැනුම් දුන්නේය. තමා 2024 මහමැතිවරණයට සම්බන්ධ වන බැවින් ප්‍රකාශයක් ලබා දීමට වෙලාවක් නොමැති බව පවසා සංදේශයක් එවා තිබූ බව ද නීතිඥවරයා අධිකරණයට දැන්වීය. මෙම සිද්ධියට අදාළ හත්වන සැකකරු වන තිලංග දක්ෂිත සුමතිපාල සහ හිටපු පාර්ලිමේන්තු මන්ත්‍රී ශ්‍රී රංගා අතර සිදුවූ දුරකතන සංවාදයේ හඬපට විමර්ශනය කිරීමෙන් පසුව මෙම සිද්ධියට ශ්‍රී රංගා සම්බන්ධ බව කොළඹ අපරාධ කොට්ඨාසය අධිකරණයට දැනුම් දුන්නේය.
ශ්‍රී රංගා මහතා ශ්‍රී ලංකා පාපන්දු සම්මේලනයේ කටයුතු කිරීමේ දී හත්වන සැකකරු වන සුමතිපාල හඳුනා ගත් බව ඇප අපේක්ෂිත ලේඛනයේ සඳහන් කර තිබූ බව ද කොළඹ අපරාධ කොට්ඨාසය අධිකරණයට දැනුම් දුන්නේය. ඉකුත් අගෝස්තු මස 29 වන දින ශ්‍රී රංගා මහතාට මන්නාරම අධිකරණයෙන් තීන්දු ලබාදීමට නඩුවක් තිබිය දී මෙවැනි අපහාසයක් කර ඇති බව ද කොළඹ අපරාධ කොට්ඨාසය අධිකරණයට දැනුම් දුන්නේය. එම නඩුව සඳහා ඉදිරිපත් වූ සාක්ෂිකරුවන්ට තර්ජනය කිරීම නිසා ඔහු රක්ෂිත බන්ධනාගාරගතව සිටි බවත් එම සිද්ධියට අදාළව මෙලෙස අපහාස කිරීමක් සිදුකර ඇති බවත් අපරාධ කොට්ඨාසය අධිකරණයට දැනුම් දුන්නේය.
මෙම සිද්ධියට අදාළව සැකකරුවන් අට දෙනකු රක්ෂිත බන්ධනාගාරගතව සිටි අතර එයින් පළමු සැකකරුවන් හතර දෙනා සඳහා රුපියල් ලක්ෂ දහය බැගින් වූ ශරීර ඇප මත මුදා හැරීමට සහ එම සැකකරුවන්ගේ විදේශ ගමන් තහනම් කිරීමටද නියෝග කළ මහේස්ත්‍රාත්වරයා අනෙක් සැකකරුවන් හතර දෙනා ලබන 4 දක්වා රක්ෂිත බන්ධනාගාරගත කිරීමට පෙර නඩු දිනයේ දී නියෝග කළේය.
මේ වනවිට සිද්ධියට අදාළව මාතලේ පදිංචි රවිෂ්ක ගුණසේකර, ඇරැව්වල පදිංචි ක්‍රිශාන් නාලක, මනෝජ් මධුශංක, සංජය බණ්ඩාර යන සැකකරුවන් ඇප මත මුදා හරින ලෙසට නියෝග කළේය.
පෙත්සම්කරු විසින් අපේක්ෂිත ඇප පිළිබඳ ලිඛිත දේශනයක් අධිකරණයට පෙර නඩු දිනයක දී ඉදිරිපත් කර තිබුණ අතර ඊයේ එම ලිඛිත දේශනය විවෘත අධිකරණය තුළ වාචිකව ඉදිරිපත් කරන ලදී.
කොළඹ ප්‍රදේශයේ පදිංචි එරංග ලක්මාල්, ජනක සඳරුවන්, කොළඹ ප්‍රදේශයේ ව්‍යාපාරිකයකු වන තිලංග දක්ෂිත සුමතිපාල සහ ව්‍යාපාරිකයකු වන දසුන් තරංග බණ්ඩාර යන සැකකරුවන් තවදුරටත් රක්ෂිත බන්ධනාගාරගත කරන ලෙසට පෙර නඩු දිනයේ දී මහේස්ත්‍රාත්වරයා නියෝග කර තිබුණි.
තම සේවාදායකයා මෙම සිද්ධිය සම්බන්ධයෙන් කිසිදු කාරණාවක් නොදන්නා බැවින් ප්‍රකාශයක් ලබා දීමට අපරාධ පරීක්ෂණ කොට්ඨාසයට නොපැමිණි බවත්, එම අවස්ථාවේ දී අත්අඩංගුවට ගැනීමක් සිදුවුවහොත් තමාගේ දේශපාලනයට කීර්තියට හානියක් සිදුවන බව සහ ඉල්ලුම්කරු විසින් ඉල්ලන ලද අපේක්ෂිත ඇපය සම්බන්ධයෙන් ලබා දෙන ඕනෑම නියෝගයක් පිළිගන්නා බවද ශ්‍රී රංගා මහතා වෙනුවෙන් පෙනී සිටි නීතිඥ වෙහෙරගොඩ මහතා අධිකරණයට දැනුම් දුන්නේය.
ඒ අනුව ප්‍රකාශය ලබා නොදීම, හත්වන සැකකරු වන සුමතිපාල සමඟ පැවැති දුරකතන සංවාදය, මෙම සිද්ධිය පිළිබඳ නොදන්නා බව ව්‍යාජ ලෙස පැවසීම සහ විමර්ශන කටයුතු සිදු කිරීමේ දී කොළඹ අපරාධ කොට්ඨාසය මඟහැරීම යන කරුණු මත හිටපු පාර්ලිමේන්තු මන්ත්‍රී ශ්‍රී රංගා මහතා අධිකරණයෙන් ඉල්ලනු ලැබූ ඇප අපේක්ෂිත ලේඛනය මහේස්ත්‍රාත්වරයා විසින් ප්‍රතික්ෂේප කරනු ලැබීය.
