මධ්‍යම පළාත් පුස්තකාල සේවා මණ්ඩලයේ සභාපති ධුරයට පත්කළ ඒ.ජී. මුදියන්සේ මහතා එම ධුරයෙන් ඉවත් කර ඇත. අදාළ ධුරයේ කටයුතු කරමින් සිටිය දී ඒ මහතා ජාතික ජන බලවේගය යටතේ නුවරඑළිය දිස්ත්‍රික්කය නියෝජනය කරමින් මහමැතිවරණයට තරග කරන බවට ට්රාන්ස්පෙරන්සි ආයතනය මැතිවරණ කොමිසම වෙත කළ පැමිණිල්ලක් සැලකිල්ලට ගනිමින් මධ්‍යම පළාත් ආණ්ඩුකාර එස්.බී.එස්. අබේකෝන් මහතා විසින් මෙම ඉවත් කිරීම සිදුකරනු ලැබ තිබේ.
මධ්‍යම පළාත් ආණ්ඩුකාරවරයා විසින් පසුගිය 20 වැනි දින අදාළ පත්වීම් සිදුකර තිබෙන අතර එම අවස්ථාව වනවිට මුදියන්සේ මහතා අපේක්ෂකයකු ලෙස මහමැතිවරණයට ඉදිරිපත් වන බව ආණ්ඩුකාර කාර්යාලය දැනුම්වත්ව සිට නොමැත.
පසුගිය ජනපතිවරණයේ දී පොදු දේපොළ අවභාවිත කිරීමට අදාළව ට්රාන්ස්පෙරන්සි ආයතනය වෙත පැමිණිලි 1126ක් ලැබුණු බවත් මෙවර මහමැතිවරණයට අදාළව මේ වනවිට එවැනි පැමිණිලි 70කට ආසන්න සංඛ්‍යාවක් ලැබී තිබෙන බවත් ට්රාන්ස්පෙරන්සි ආයතනයේ රාජ්‍ය දේපොළ අවභාවිතය වැළැක්විමේ වැඩසටහනේ ජාතික සම්බන්ධීකාරක නීතිඥ තුෂාණි කන්දිල්පාන මහත්මිය පැවසුවාය.
