පාසල් 60ක ශිෂ්‍ය භටයන් හා භටවියන් 1,500කගේ සහභාගිත්වයෙන් කළුතර පොලිස් අභ්‍යාස විද්‍යාලයේදී පසුගිය 17 දා ආරම්භ කරන ලද පොලිස්පති අභියෝගතා ජාතික ශිෂ්‍ය භට කඳවුරේ විසිර යෑමේ සාමාප්ති උත්සවය වැඩ බලන පොලිස්පතිතුමාගේ ප්‍රධානත්වයෙන් අද (24) පැවැත්වේ.
ශ්‍රී ලංකා පොලිස් සේවය සමාජ සුරක්ෂිතභාවය උදෙසා බොහෝ සමාජීය අවශ්‍යතා සපුරන ලද ශ්‍රී ලංකාවේ පැරණිම රාජ්‍ය ආයතන අතුරින් ප්‍රමුඛතම ආයතනයකි. මේ රාජ්‍ය ආයතනයේ පරමාර්ථය වන්නේ අපරාධ වැළැක්වීම හා සාමකාමි පරිසරයක් නිර්මාණය කිරීමය. ඒ අරමුණ සාක්ෂාත් කරගැනීම පිණිස කලින් කලට විවිධ ක්‍රියාදාම මඟින් මහජනතාව විනයගරුක පුරවැසියන් බවට පත් කිරීමට උත්සාහ දරා ඇති අතර, එවැනි එක් ක්‍රියාදාමයක් ලෙස දේශයේ ජීවනාලිය වන් දරු පරපුර විනයගරුක හා රටේ නීති සම්බන්ධ දැනුම සහිත පුරවැසියන් ලෙස හැඩගැස්වීමට ආරම්භ කරන ලද පොලිස් ශිෂ්‍ය භට ව්‍යාපාරය හඳුන්වා දිය හැකිය.
පොලිස්පති ස්ටැන්ලි සේනානායක මැතිතුමාගේ සංකල්පයක් මත ශ්‍රී ලංකා පොලිස් ශිෂ්‍ය භට සේවය 1972 ජූලි 4 දින පොලිස් මූලාස්ථානයේදී ආරම්භ කරන ලදි. එවකට ගුරු වෘත්තියේ යෙදී සිටි ඩී.ජේ.ඩබ්. විජේසිංහ මහතා ප්‍රධාන පොලිස් පරීක්ෂකයකු ලෙස පත් කොට පරිපාලන කටයුතු භාර දීමෙන් පසු පොලිස් ශිෂ්‍ය භට ව්‍යාපාරය සඳහා පාසල් ගුරුවරුන් උපසේවා උප පොලිස් පරීක්ෂක සහ උපසේවා පොලිස් පරීක්ෂක තනතුරු සඳහා බඳවාගැනීම කොළඹ ආනන්ද, නුවර කිංස්වුඩ්, ගාල්ල මහින්ද, යාපනය හින්දු, නිට්ටඹුව සංඝබෝධි, ගම්පොල සහිරා යන විදුහල් මුල් කරගනිමින් සිදු කරන ලදි.
පොලිස් ශිෂ්‍ය භට ව්‍යාපාරය ආරම්භ වීමෙන් පසු වරින් වර කඳවුරු රැසක් පවත්වා ඇති අතර, මේ සියල්ල පොලිස්පති කුසලානය වෙනුවෙන් පවත්වා තිබේ. මේ අරමුණු මුදුන්පත් කරගැනීමට සවිමත්ව කටයුතු කිරීම උදෙසා පොලිස් ශිෂ්‍ය භට ඒකකය කොට්ඨාසයක් වශයෙන් ස්ථාපිත කිරීම සුවිශේෂ කරුණකි.
සෑම වසරකදී මෙන්ම මෙවරද පොලිස්පති අභියෝගතා ශිෂ්‍ය භට කඳවුරට සහභාගි වූ බාලක බාලිකාවන් සඳහා පොළපාළි පරීක්ෂණ ගණ සරඹ මෙන්ම නාට්‍ය හා කුසලතා පරීක්ෂණ සහ ඉදිරිපත් කිරීමේ පරීක්ෂණද මෙන්ම ආත්ම විශ්වාසය වර්ධනය පරීක්ෂණද පැවැත්විණි.
විනයගරුක යහපත් මානසිකත්වයෙන් යුතු ශ්‍රී ලංකික තරුණ පරපුරක් නිර්මාණය කිරීම උදෙසා ශ්‍රී ලංකා පොලීසිය ගන්නා උත්සාහය සාර්ථක වේවායි අපි ප්‍රර්ථනා කරන්නෙමු.
පොලිස් මාධ්‍ය කොට්ඨාසය
