මැදපෙරදිග යුද වාතාවරණයත් සමඟ ශ්‍රී ලංකාවටත් යම් තර්ජනයන් ඇතිවේ යැයි සැකයක් පැවති බැවින් බුද්ධි අංශ ඒ සම්බන්ධයෙන් ඉතා හොඳින් ආවේක්ෂණ රාජකාරි කළ බැවින් යම් විදේශීය ජාතිකයන් ඉලක්ක කරගෙන ප්‍රහාරයක් එල්ල කිරීමට ඇති සූදානමක් ගැන බුද්ධි තොරතුර ලැබුණේ පසුගියදා (07) බව වැඩබලන පොලිස්පති නීතිඥ ප්‍රියන්ත වීරසූරිය මහතා පැවසීය.
මේ වන විට ජාතික ආරක්ෂාව සම්බන්ධයෙන් කිසිදු ප්‍රශ්නයක් නැති බව ද වැඩබලන පොලිස්පතිවරයා සඳහන් කළේය.
ආරුගම්බේ ප්‍රදේශයේ පිහිටි ජනප්‍රිය සංචාරක ස්ථාන ඉලක්ක කර ගනිමින් ප්‍රහාරයක් එල්ල වන බවට විශ්වසනීය තොරතුරු සමඟ අනතුරු ඇඟවීම් ලැබී ඇතැයි ශ්‍රී ලංකාවේ අමෙරිකානු තානාපති කාර්යාලය මඟින් ඊයේ (23) නිවේදනයක් නිකුත් කිරීමත් සමඟ වැඩබලන පොලිස්පතිවරයා විසින් මෙම කරුණු දැක්වීම කරනු ලැබුවේ පොලොන්නරුව පොලිස් අධිකාරි කාර්යාලයේ පැවති මාධ්‍ය හමුවකදීය.
වැඩබලන පොලිස්පතිවරයා එහිදී මෙසේ ද සඳහන් කළේය.
“මැදපෙරදිග යුද වාතාවරණය ඇරඹීමත් සමඟම ත්‍රස්තවාදී කටයුතු විවිධ පාර්ශ්වවලට ව්‍යාප්ත වෙලා තිබුණා. ශ්‍රී ලංකාවටත් යම් තර්ජනයක් ඇතිවේ යැයි සැකයක් ඇතිවුණු නිසා බුද්ධි අංශ ඒ සම්බන්ධයෙන් ඉතා හොඳින් ආවේක්ෂණ රාජකාරි කළා. ඔක්තෝබර් 07 වන විට ඒ සම්බන්ධයෙන් අපට බුද්ධි තොරතුරු ලැබුණා. විදේශීය ජාතිකයන් ඉලක්ක කරගෙන ප්‍රහාරයක් එල්ල කරන්න සූදානම් කියලා මීට සති 3කට පෙර පටන් ජනාධිපතිතුමාගේ ප්‍රධානත්වයෙන් ආරක්ෂක කවුන්සිලයේ සාකච්ඡා කළා. ඒ සම්බන්ධයෙන් උපදෙස් ලැබුණා. උපදෙස් ප්‍රකාරව එම විදේශිකයන්ගේ ආරක්ෂාව, එම ස්ථානවල ආරක්ෂාව, ආගමික කටයුතු කරන ස්ථානවල විශේෂ ආරක්ෂක සැලසුමක් යටතේ පොලිසිය, එස්.ටී.එෆ්, බුද්ධි නිලධාරීන් ආරක්ෂාව සැලසුවා.”
“පෙරේදා (22) සිට විශේෂිත වූ ආරක්ෂක සැලැස්මක් දියත් කළා. ඊට හේතුව ඒ තොරතුර නිශ්චිතව ලැබීම. අද පෙරවරුවේත් ආරක්ෂක කවුන්සිලය රැස් වුණා. ආරක්ෂක ප්‍රධානීන්, ත්‍රිවිධ හමුදාපතිවරුන් එහිදීත් සාකච්ඡා කළා. එහිදීත් ලැබුණු තොරතුරු අනුව විදේශිකයන්ගේ ආරක්ෂාව තහවුරු කර තිබෙනවා. මේ සම්බන්ධයෙන් තානාපති කාර්යාල අපි දැනුවත් කළා.”
“දේශීය වශයෙන් දේශීය පුද්ගලයන් ඉලක්ක කරගෙන කිසිදු තර්ජනයක් මේ වන විට නිරීක්ෂණය වන්නේ නැහැ. නමුත් අපි මහජනතාවගෙන් ඉල්ලා සිටිනවා කිසියම් ත්‍රස්තවාදී තර්ජනයක්, වෙනස්වීමක්, තොරතුරක්, පුද්ගලයෙක් සම්බන්ධයෙන්, ප්‍රහාරයක් ගැන වාර්තා වුණොත් වහාම පොලිසියට දැනුම් දෙන්න. ඒ වගේම 1997 කෙටි අංකය යටතේ ඕනෑම වෙලාවක දැනුම්දීමක් කරන්න පුළුවන්. දැනට ප්‍රමාණවත් ආරක්ෂාවක් යොදවා තිබෙනවා. වැටලීම්, සෝදිසි කිරීම් ක්‍රියාත්මකයි. නමුත් සැකකටයුතු පුද්ගලයකු හෝ දේපොළක් හමු වුණේ නැහැ. ජාතික ආරක්ෂාව සම්බන්ධයෙන් ශ්‍රී ලංකාවේ කිසිම ප්‍රශ්නයක් නැහැ. විදේශීය ජාතිකයන් සම්බන්ධයෙන් යම් ගැටලුවක් තිබුණා. ඒක ලෝකයේ අනෙක් රටවලටත් පොදුයි. කෙසේ නමුත් අපි එසේ නොවෙන්න අවශ්‍ය කටයුතු කර තිබෙනවා. ගුවන්තොටුපොළේ සහ එම පිවිසුම් මාර්ගවල විශේෂ ආරක්ෂක වැඩපිළිවෙළක් දැනට ක්‍රියාත්මක වෙනවා.”
අරුගම්බේ ප්‍රදේශය ඇතුළු නැඟෙනහිර පළාතේ විදේශිකයන් වැඩිපුර ගැවසෙන ප්‍රදේශවල ආරක්ෂාව කල් ඇතිවම තහවුරු කිරීමට කටයුතු කළ බව නැඟෙනහිර පළාත් භාර ජ්‍යෙෂ්ඨ නියෝජ්‍ය පොලිස්පති නීතිඥ අජිත් රෝහණ මහතා සඳහන් කළේය.
වැඩි වශයෙන් විදේශිකයන් අරුගම්බේ වෙත පැමිණෙන්නේ සර්ෆින් ක්‍රීඩාවට බව ද අජිත් රෝහණ මහතා පැවසීය. ඒ අතරින් වැඩිම සංචාරකයන් පිරිසක් ඊශ්‍රායල් ජාතිකයන් බව ද ඔහු පැවසීය.
“මුහුදු රළ ක්‍රීඩාවට උචිත කාලයට තමයි විදේශිකයෝ අරුගම්බේ එන්නේ. පහුගිය සති දෙක තුන තුළ විදේශිකයන් හත් අටසීයක්ම අරුගම්බේ රැඳී සිටියා. දැන් මුහුදු රළ ක්‍රීඩාවට උචිත ආකාරයට නැහැ. දැන් අරුගම්බේ රැඳී සිටින්නේ සංචාරකයන් සුළු පිරිසක් පමණයි. පොලිසිය, පොලිස් විශේෂ කාර්ය බළකාය, යුද හමුදාව මෙන්ම නාවික හමුදාව ද මේ ප්‍රදේශයේ ආරක්ෂාව තහවුරු කිරීමේ කටයුතුවල නිරතව සිටිනවා. දැන් අපි තවත් ඒ ආරක්ෂාව වැඩි කරලයි තියෙන්නේ.” යැයි අජිත් රෝහණ මහතා වැඩිදුරටත් සඳහන් කළේය.
මේ අතර දකුණු පළාතේ ද වෙරළට ආසන්න සංචාරකයන් වැඩිපුර ගැවසෙන ප්‍රදේශ හා හෝටල් ආශ්‍රිතව ද ආරක්ෂාව තර කිරීමට ඊයේ උදෑසන සිට පොලිසිය පියවර ගත්තේය.
පොලිසිය, පොලිස් විශේෂ කාර්ය බළකාය, යුද හා නාවික හමුදාව ආරක්ෂාව තහවුරු කර ඇති බව දකුණු පළාත් භාර ජ්‍යෙෂ්ඨ නියෝජ්‍ය පොලිස්පති මහේෂ් සේනාරත්න මහතා පැවසීය.
ආරක්ෂාව සම්බන්ධයෙන් මෙතෙක් ගැටලුවක් පැනනැඟී නැති බවත් සර්ෆින් සඳහා මේ කාලයේ දකුණු පළාතේ මුහුදු තීරයට ඇදී එන සංචාරකයන් වැඩි බැවින් මෙම පළාතේ ආරක්ෂාව සම්බන්ධයෙන් වඩාත් අවධානය යොමු කර ඇති බව ද මහේෂ් සේනාරත්න මහතා වැඩිදුරටත් සඳහන් කළේය.
“අරුගම්බේ ප්‍රදේශයේ තියෙනවා ඊශ්‍රායල ජාතිකයන් විසින් ස්ථාපිත කරන ලද ගොඩනැඟිල්ලක්. යම්කිසි ශාලාවක් වැනි ගොඩනැඟිල්ලක්. බොහෝ විට ඊශ්‍රායල ජාතිකයන්ට මෙම අරුගම්බේ ප්‍රදේශය ඔවුන්ගේ ආකර්ෂණීය ප්‍රදේශයක්. ඔවුන් මේ ප්‍රදේශයට අතිශයින්ම ප්‍රිය වෙන්නේ පොතුවිල් හා අරුගම්බේ ප්‍රදේශයේ ප්‍රකට සර්ෆින් ක්‍රීඩාවත් එක්ක. ඒ නිසා තමන්ට වෙන්වූ ස්ථානයක් ඔවුන් හදාගෙන තියෙනවා.” යැයි පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව මහතා සඳහන් කළේය.
“පසුගිය දිනවල යම් යම් තොරතුරු ලැබිලා තිබුණා. ඒ ඊශ්‍රායල ජාතිකයන්ට යම් ආකාරයක අනතුරක් විය හැකි බවට. ඒ නිසා ප්‍රදේශය භාර ජ්‍යෙෂ්ඨ නියෝජ්‍ය පොලිස්පතිවරයා ඊට අවශ්‍ය මූලික පියවර ගෙන තිබුණා. පසුගිය දින කිහිපය තුළම මාර්ග බාධක යොදලා ප්‍රදේශය ආරක්ෂා කිරීම සිදු කළා. වාහන, පුද්ගලයන් විටින් විට පරීක්ෂා කිරීම් කළා. එය පසුගිය කාලසීමාව තුළ ක්‍රියාත්මකවෙච්ච තත්ත්වයක්. අද දිනය වන විටත් ඒ ප්‍රදේශයේ විශේෂ ආරක්ෂාවක් යොදලා තියෙනවා. විශේෂයෙන්ම ශ්‍රී ලංකා පොලිසිය, විශේෂ කාර්ය බළකාය, නාවික හමුදාව, යුද හමුදාව, විශේෂයෙන් බුද්ධි අංශ නිලධාරීන් යොදවලා ඒ ප්‍රදේශයේ අවශ්‍ය ආරක්ෂාව සම්පූර්ණයෙන්ම සලසලා තියෙන්නේ. අපට යම් තොරතුරක් ලැබෙනවා නම් අපි ක්ෂණිකව ක්‍රියාමාර්ග ගන්නවා. මේ වන විටත් ඒ ප්‍රදේශයට අවශ්‍ය පියවර අරගෙනයි තියෙන්නේ. ඒ නිසා තමයි අපි පොලිස් ස්ථානවලට මේ උපදෙස් ලබාදෙන්නෙත් සංචාරකයන් කුමන රටකට ජාතියකට අයත් වුණත් ඔවුන්ගේ ආරක්ෂාව සැපයීම අපේ වගකීමක් වන නිසා ඒ පොලිස් ස්ථානවලට අවශ්‍ය සම්බන්ධීකරණය සහ අවශ්‍ය උපදෙස් දීම සිදු කරන්නේ” යැයිද නිහාල් තල්දූව මහතා පැවසීය.
ගයාන් කුමාර වීරසිංහ, රන්මලී සෝමසිරි, ඇළහැර – සරත් වෙලගෙදර, දකුණු පළාත් සංචාරක – එස්. දීයගහගේ,
වැලිගම – අබේවික්‍රම ගුණරත්න
