ගම්පහ දිස්ත්‍රික්කයේ මීගමු පුරවරයේ ඉපිද මීගමුවේ ශාන්ත පීතර විදුහලින් අධ්‍යාපනය ලැබූ ජෝශප් ඔගස්ටින් ප්‍රනාන්දු මහතා තෙලිතුඩින් දක්ෂ leoo ජීවමාන සිතුවම් නිර්මාණය කිරීමේ සහජ කුසලතාවක් උපතින්ම රැගෙන පැමිණි කලාකරුවෙකි.
පාසල් අධ්‍යාපනය නිමාවීමෙන් අනතුරුව කලා ශිල්පියකු ලෙස ශ්‍රී ලංකා පිඟන් සංස්ථාවේ සේවය කළ ඒ මහතා මෙරට පාඨකයන් අතර චිත්‍රකතා පුවත්පත් අතිශය ජනප්‍රිය වූ යුගයක කැමිලස් ප්‍රකාශන ලෙස ජනප්‍රියත්වයට පත්වූ සිත්තර, සත්සිරි, රසික, සම්පත, ප්‍රාර්ථනා වැනි ලංකාවේ චිත්‍ර කතා කලාවේ පෙරළියක් මෙන්ම පාඨකයන්ගේ මතකයේ සදා රැඳි චිත්‍ර කතා පත්තර රාශියකට ජීවමාන රූ රටාවෙන් දායකත්වය ලබාදී ඇත.
ඉන්පසුව විදෙස් රැකියාවක් සඳහා මෙරටින් පිටව කටාර් රාජ්‍යයට ගිය ඔගස්ටින් ප්‍රනාන්දු මහතා කටාර් රාජ්‍යයේ රාජකීය පවුලේ සාමාජික ෂේක්වරයකු යටතේ එරට ඓතිහාසික ලිපි හා ජායාරූපවලට යළි ජීවය දීමේ වගකීම් සහිත රැකියාවක නිරතව සිට මීට වසර දෙකකට පමණ පෙර මව්බිමට පැමිණ ඇත.
ලෝකය ඩිජිටල් තාක්ෂණ පෙරළියට ලක්වෙමින් තිබියදී ඔගස්ටින් ප්‍රනාන්දු මහතා ද පෑනෙන් පැන්සලෙන් පින්සලෙන් මැවූ විස්කම් ඩිජිටල් තාක්ෂණය උපයෝගි කරගනිමින් සිදුකිරීමේ අභියෝගය ජය ගෙන ඇත.
උපතින් කතෝලික බැතිමතකු වන ඔගස්ටින් ප්‍රනාන්දු මහතාගේ තෙලිතුඩින් මෑත කාලයේ නිමවූ වටිනාම නිමවුමක් ලෙස හැදින්විය හැකි අපූරු නිර්මාණයක් පෑලියගොඩ රෝහණ විහාරයේ අභිනවයෙන් ඉදිකළ චෛත්‍යරාජයාණන් වහන්සේ තුළදී අපට දැකගත හැකිවේ.
