ඉහළ ණය පොලී අනුපාත පැවතීම පහත හෙළීමට කටයුතු කිරීමත්, පෞද්ගලික අංශය සඳහා ලබාදෙන ණය පහසුකම් වැඩි දියුණු කිරීමත්, රාජ්‍ය අංශයේ ණය ලබා ගැනීම් දුර්වල කිරීමත් ඇතුළු තවත් කරුණු ගණනාවක් හේතුවෙන් කොතරම් අභියෝගාත්මක වුවත් මේ වසරේ පළමු කාර්තුව තුළ මෙරට මූල්‍ය පද්ධතිය ස්ථාවර වී ඇතැයි ශ්‍රී ලංකා මහ බැංකුව ප්‍රකාශ කරයි. ශ්‍රී ලංකා මහ බැංකුව වසර 2023 අංක 16 දරන නව මහ බැංකු පනතේ 70 (1) වගන්තිය අනුව සෑම වසරකම මූල්‍ය පද්ධති ස්ථාවරත්වය පිළිබඳව වාර්තාවක් ලබා දිය යුතුය. මහ බැංකුව නව බැංකු පනතට අනුව ඊයේ (11) සිය පළමු ස්ථායිතා විවරණය ඉදිරිපත් කරමින් මේ බව කියා සිටියි.
ශ්‍රී ලංකාවේ මූල්‍ය පද්ධතියේ ස්ථායිතාවය ඇති කිරීමේදී ඊට ඇතිවන අවදානම් සහ දුර්වලතා හඳුනා ගැනීම් මෙම වාර්තාවෙන් එළිදක්වා ඇත. එමෙන්ම මහ බැංකුව ඇතුළු අනෙකුත් නියාමන ආයතන ක්‍රියාත්මක කරන ප්‍රතිපත්ති ක්‍රියාමාර්ග පිළිබඳවද මේ වසරේ ජූනි මස දක්වා දත්ත මෙහි දැක්වේ. අවශ්‍යයම අංශ සතුව පවතින නවතම දත්තයන් ද මෙම වාර්තාවෙන් එළිදක්වන බව මහ බැංකුව කියයි.
ශ්‍රී ලංකාවේ වෙළෙඳපොළ පොලී අනුපාත පහත හෙළීමට මහ බැංකුව ගනු ලැබූ ක්‍රියාමාර්ග හේතුවෙන් මේ වන විට බැංකු හා මූල්‍ය අංශයේ ණය පොලී අනුපාත පහත වැටී ඇත. තැන්පතු පොලී අනුපාත ද ඉහළ නඟිමින් පවතී. ණය පොලී අනුපාත අඩුවීම හේතුවෙන් පෞද්ගලික අංශයේ ණය වැඩිවීමක් දක්නට ලැබේ.
