අපරාධ පරීක්ෂණ දෙපාර්තමේන්තුව භාර නියෝජ්‍ය පොලිස්පති ලෙස පී. අම්පාවිල මහතාව ජාතික පොලිස් කොමිෂන් සභාව විසින් පත් කර තිබේ.
අපරාධ පරීක්ෂණ දෙපාර්තමේන්තුවේ නියෝජ්‍ය පොලිස්පතිවරයා ලෙස පී. ම්පාවිල මහතා පත් කිරීමට නියමිත බව මුලින්ම රටට කීවේ දිනමිණ පුවත්පතයි.
පොලිස් මූලස්ථානයට අනුයුක්තව මුදල් විශුද්ධිකරණය, පිරමිඩ ජාවාරම, අතත්‍ය මුදල් පිළිබඳ විමර්ශන භාරව සිටියේ පී. අම්පාවිල මහතාය.
අපරාධ පරීක්ෂණ දෙපාර්තමේන්තුවේ දීර්ඝ කාලයක් සේවය කළ දක්ෂ විමර්ශකයකු වන පී. අම්පාවිල මහතා එම දෙපාර්තමේන්තුවේ අධ්‍යක්ෂ ධුරය දැරීමට පවා සුදුසුකම් ලබා තිබියදී එම අවස්ථාව ඔහුට අහිමි විය. නියෝජ්‍ය පොලිස්පතිවරයකු ලෙස උසස් වීමෙන් පසුවද අපරාධ පරීක්ෂණ දෙපාර්තමේන්තුව ඔහුට හිමි තැනක් වුවත් ඔහු දේශපාලන වන්දනාවේ නොගිය නිලධාරියකු වූ බැවින් එම අවස්ථාවද ඔහුට අහිමි කර තිබිණි. පොලිස් සේවයෙන් විශ්‍රාම ගැනීමට වැඩි කාලයක් නැති වුවත් අපරාධ පරීක්ෂණ දෙපාර්තමේන්තුවේ නියෝජ්‍ය පොලිස්පතිවරයා ලෙස අම්පාවිල මහතා පත් කර ඇත්තේ පසුගිය කාලයේ අවිධිමත් ආකාරයට ක්‍රියාත්මක වූ අපරාධ පරීක්ෂණ දෙපාර්තමේන්තුවේ ඇතැම් කටයුතු නැවතත් විධිමත් කිරීමේ අපේක්ෂාවෙන් බව පොලිස් අභ්‍යන්තර තොරතුරු සඳහන් කළේය.
මෙතෙක් අපරාධ පරීක්ෂණ දෙපාර්තමේන්තුවේ නියෝජ්‍ය පොලිස්පති ලෙස කටයුතු කළ රොහාන් ප්‍රේමරත්න මහතා බස්නාහිර පළාත් උතුරු දිසා නියෝජ්‍ය පොලිස්පති ලෙස පත් කර ඇත. මෙතෙක් එම දිසාවේ නියෝජ්‍ය පොලිස්පති ලෙස කටයුතු කළ කපිල කඩුපිටිය මහතා වයස අවුරුදු හැට පිරීමෙන් පොලිස් සේවයෙන් විශ්‍රාම ගෙන තිබේ. ගාල්ල නියෝජ්‍ය පොලිස්පති ලෙස මෙතෙක් සේවය කළ ඩී.පී. චන්ද්‍රසිරි මහතා පොලිස් ප්‍රවර්තන දිශාව වෙත මාරු කර ඇති අතර, ප්‍රජා පොලිස් හා පරිසර ආරක්ෂක දිසාවේ නියෝජ්‍ය පොලිස්පති ඊ.එම්.පී.ජේ. සේරම් මහතා ගාල්ල නියෝජ්‍ය පොලිස්පති ලෙස පත් කර තිබේ. සේරම් මහතාගෙන් හිස් වූ ප්‍රජා පොලිස් හා පරිසර ආරක්ෂක දිසාවේ නියෝජ්‍ය පොලිස්පති ධුරයට පොලිස් මූලස්ථානයේ සේවයේ නිරතව සිටි නියෝජ්‍ය පොලිස්පතිනි බිම්සානි ජාසිංහආරච්චි මහත්මිය පත් කර ඇත. මෙම පත් කිරීම් ජාතික පොලිස් කොමිෂන් සභාව පෙරේදා රැස්වී ගන්නා ලද තීරණයකට අනුව ක්‍රියාත්මක වන අතර, එය මැතිවරණ කොමිසමේ අනුමැතියට යටත්ව තිබේ.
