වැල්ලම්පිටිය, සේදවත්ත ශ්‍රී සිද්ධාර්ථ මධ්‍ය මහා විද්‍යාලයේ ප්‍රථම වතාවට පැවැත්වූ දැවැන්ත ප්‍රදර්ශන ක්‍රිකට් තරගාවලිය “BATCH TO BATCH ක්‍රිකට් සැණකෙළිය ” එම ක්‍රීඩා පිටියේදී පසුගියදා උත්කර්ෂවත් අයුරින් පැවැත්විණි.
විද්‍යාලයේ ඉගෙනුම ලැබූ සිසු සිසුවියන්ගෙන් සහ එක් එක් වර්ෂවලට අදාළ(සා/පෙළ) ආදි ශිෂ්‍ය සංගම් 35ක සාමාජිකයන්ගෙන් සැදුම් ලත් කණ්ඩායම් 35ක් මෙහිදී තරග වැදිණි. එය දිවා – රාත්‍රී තරගාවලියක් ලෙස ප්‍රථම වතාවට මෙය පැවැත්වීම ද විශේෂත්වයකි.
තරග සමාරම්භක අවස්ථාවට හිටපු අමාත්‍ය සරත් වීරසේකර,කොළොන්නාව සහකාර ප්‍රාදේශීය ලේකම් චමින්ද පරණමාන, ලසන්ත අමරසිංහ, විදුහල්පති ඉන්ද්‍රජිත් දොලුකඳුර යන මහතුන් සහ ආචාර්ය මණ්ඩලය ඇතුළු සිසුහු ද සහභාගි වූහ. ආරාධිත අමුත්තන් පිළිගැනීම සඳහා වාදනය කළ තුර්ය වාදක කණ්ඩායමට විදුහල් තුර්ය වාදන කණ්ඩායම නියෝජනය කළ ආදි ශිෂ්‍යාවන් ඇතුළත් වීම මෙහි දී කැපී පෙනිණි.
මෙම තරගාවලිය සඳහා තරග වැදි කණ්ඩායම් 35 අතරින් 2006 සහ 2017 ආදි සිසු කණ්ඩායම් දෙක අවසන් තරගයට තේරී පත් වූ අතර එහිදී සචින්ත උදාන චන්ද්‍රතිලකගේ නායකත්වයෙන් යුත් 2006 කණ්ඩායමට (BLACK HUNTERS) ශුරතාව හිමි විය.
