මහමැතිවරණයට ද ඉදිරිපත් නොවී ජාතික ලැයිස්තුවෙන් ද පාර්ලිමේන්තුවට නොඑන්නේ නම් රනිල් වික්‍රමසිංහ තවදුරටත් එජාප නායකත්වයේ රැඳී සිටීම තේරුමක් නොමැති බවත්, දැන් එජාප පාක්ෂිකයන්ට ලැජ්ජාවකින් තොරව රෙදි ඇදගෙන සිටිය හැකි එකම තැන සමගි ජන බලවේගය බවත් හිටපු පාර්ලිමේන්තු මන්ත්‍රී, සමගි ජන බලවේගයේ ගම්පහ දිස්ත්‍රික් නායක හර්ෂණ රාජකරුණා මහතා පවසයි.
හිටපු මන්ත්‍රීවරයා මේ බව පැවසුවේ පසුගියදා (08) මල්වතු අස්ගිරි මානාහිමිවරුන් බැහැදැක ආශීර්වාද ගැනීමෙන් අනතුරුව මාධ්‍ය වෙත අදහස් දක්වමිනි.
එහිදී වැඩිදුරටත් අදහස් දැක්වූ හිටපු මන්ත්‍රීවරයා මෙලෙස ද කීවේය.
“මෙවර මහමැතිවරණයේදී එජාපය සමගි ජන බලවේගය හා එකතු නොවුණොත් ඔවුන්ට පසුගිය වර ලැබුණු ජාතික ලැයිස්තු මන්ත්‍රී ධුරයත් අහිමි වෙනවා.
ජනපතිවරණයට කලින් කිව්වා රනිල් ඉදිරිපත් වුණොත් ඒ මහතාට ලැබෙන්නේ තුන්වැනි තැන කියලා. සජිත්ට ලැබෙන ඡන්ද නොකඩා ගෞරවනීය ලෙස විශ්‍රාම යන්න කියලා ඒ මහතාට ඉතා පැහැදිලිව කිව්වා. රනිල් ඉදිරිපත් වීම ඒ මහතාගේ ජයග්‍රහණයට වඩා සජිත්ගේ පරාජයට බලපෑවා.
ජනපතිවරණයෙන් පසු පාර්ලිමේන්තු මැතිවරණය සම්බන්ධයෙන් අපි සාකච්ඡාවක් කළා. මුළු පක්ෂයම සජිත්ට භාරදීම රනිල් එජාප නායකත්වයෙන් ඉවත්වී වෙනත් පුද්ගලයකුට පක්ෂය භාරදී සන්ධානගතවීම පිළිබඳව අදහස් හුවමාරු වුණා. තවමත් රනිල් එජාප නායකත්වයෙන් ඉවත් වෙන්න සූදානම් නෑ. එතුමාට තියෙන්නේ එජාපය තවත් විනාශ නොකර ගෞරවනීය ලෙස විශ්‍රාම යන්නයි.
ජනපතිවරණයේදී රනිල්ට ඡන්දය දුන් අය අතරින් 95%ක් මහ මැතිවරණයේදී සජිත්ට ඡන්දය දෙනවා. ගම්පහ වැඩිම ඡන්ද තිබෙන තීරණාත්මක දිස්ත්‍රික්කයක්. පක්ෂය ප්‍රතිසංවිධානය කර උපරිම ශක්තිය යොදා දිස්ත්‍රික්කයේ ඉහළට ගේන්න. “
