අවසන් කටයුතු සඳහා සූදානම් කර තිබූ දේහයක් පොලිසියෙන් ඇවිත් රෝහලට ගෙන ගිහින්

වහලයකින් වැටීමෙන් තුවාල ලබා සිටි 54 හැවිරිදි අයෙකු කහවත්ත මූලික රෝහලේදී මියයෑමෙන් පසු දේහය ඔහුගේ පවුලේ අයට භාරදී අවසන් කටයුතු සඳහා නිවසේ තැන්පත් කර තිබියදි පශ්චාත් මරණ පරීක්ෂණයට එම දේහය යළි කහවත්ත රෝහලට රැගෙන ඒමට සිදුවීමේ පුවතක් වාර්තා වේ.

පැල්මඬුල්ල පාතකඩ සිංගප්පුලිකන්ද ප්‍රදේශයේ පදිංචි දෙදරු පියකු වන ජේ.කේ. ජගත් මහතා කහවත්ත මූලික රෝගහලට ඇතුළත් කර දින දෙකක් එහි ප්‍රතිකාර ලබමින් සිටියදී පෙරේදා (09) මියගොස් තිබිණි.

මියගිය අය ප්‍රතිකාර ලබමින් සිටි වාට්ටුවේ වෛද්‍යවරයා දේහය මුදාහැරීමට පියවර ගත්තද මෙම මරණය පශ්චාත් මරණ පරීක්ෂණයක් පවත්වා මුදාහැරිය යුතු දේහයක් නිසා කහවත්ත මූලික රෝහලේ අධිකරණ වෛද්‍යවරයාගේ දැනුම් දීමෙන් පසු මහේස්ත්‍රාත් නියෝගය අනුව පශ්චාත් මරණ පරීක්ෂණය පැවත්වීමට නියම කෙරුණි.

පැල්මඩුල්ල පාතකඩ ප්‍රදේශයේ නිවෙසක විදුලි කාර්මික කටයුත්තක නිරත වෙද්දී එහි වහලයකින් ඇදවැටීමෙන් ඔහු කහවත්ත රෝහලට ඇතුළත් කර තිබූ බව පරික්ෂණවලදී හෙළි විය.

මියගිය පුද්ගලයා ප්‍රතිකාර ලබමින් සිටි වාට්ටුවේ වෛද්‍යවරයාගේ අනුමැතිය අනුව දේහය ඔහුගේ පවුලේ අයට ඊයේ (09) උදෑසන භාරදී තිබේ. ඉන්පසු මල් ශාලාවකින් දේහය සකසා අවශ්‍ය කටයුතු සිදු කර පාතකඩ සිංගප්පුලිකන්ද ප්‍රදේශයේ නිවසේ තැන්පත් කර තිබේ. ගම්වාසීන්, හිතවතුන් සහ නෑදෑයන් ද අවමංගල නිවෙසට පැමිණෙමින් සිටියදී දේහය යළි කහවත්ත රෝහලට රැගෙන යෑමට සිදුව තිබේ.

එදින දහවල් පැල්මඬුල්ල පොලිසියේ නිලධාරීන් විසින් මියගිය අයගේ පවුලේ අයට දැනුම් දී ඇත්තේ දේහය කහවත්ත මූලික රෝහලට රැගෙන ගොස් පශ්චාත් මරණ පරික්ෂණයක් පැවත්වීමට සිදු වෙන බවයි.

පසුව 09 පස්වරුවේදී පැල්මඬුල්ල මහේස්ත්‍රාත් නුතිනන් සිරිවර්ධන මහතා එම අවමංගල්‍ය නිවසට පැමිණ මහේස්ත්‍රාත් පරීක්ෂණයේ නිරීක්ෂණ කටයුතු සිදු කරමින් දේහය පශ්චාත් මරණ පරීක්ෂණය සඳහා කහවත්ත මූලික රෝහලට රැගෙන යන ලෙස පොලිසියට නියෝග කළේය.

ඊයේ (10) උදෑසන දේහය රෝහලට රැගෙන යෑමට තීරණය කරනු ලැබුවේ පවුලේ අයගේ ඉල්ලීම ද සලකා බලමිනි.

මියගිය අයගේ නෑදෑයන් සහ ගම්වාසීන් සඳහන් කළේ රෝහලෙන් සිදුවූ වරදක් නිසා නිවසේ තැන්පත් කර තිබූ දේහය පශ්චාත් මරණ පරීක්ෂණයට යොමු කිරීමට සිදු වූ බවයි. සියලු පරීක්ෂණ අවසන් කර දේහය භාර දුන්නේ නම් මෙවැනි ගැටලුවක් උද්ගත නොවෙන බවද ඔවුහු පැවසූහ.

මෙම සිදුවීම ගැන කිසිදු තොරතුරක් මාධ්‍යට ලබාදීමට නොහැකි බව කහවත්ත මූලික රෝහලේ හදිසි මරණ පරීක්ෂකවරයකු වන චම්පානි මහතා පැවසීය. අවම වශයෙන් මියගිය පුද්ගලයාගේ නමවත් ලබාදීමට ඔහු අකමැති විය.