ජර්මානු චාන්සලර් ඔලාෆ් ස්කොල්ස් (Olaf Scholz) මහතාගේ සුබ පැතුම් ශ්‍රී ලංකාවේ නව ජනාධිපතිවරයාට පිරිනමන බව ශ්‍රී ලංකාවේ ජර්මානු තානාපති ෆෙලික්ස් නියුමන් (Felix Neumann) මහතා ප්‍රකාශ කළේය. ඔහු මේ බව පැවසුවේ පෙරේදා (9) පෙරවරුවේ ජනාධිපති කාර්යාලයේදී ජනාධිපති අනුර කුමාර දිසානායක මහතා මුණගැසුණු අවස්ථාවේදීය.
ජර්මනිය සහ ශ්‍රී ලංකාව අතර දිගුකාලීන මිත්‍රත්වය තව දුරටත් පවත්වාගෙන යෑම සඳහා ජර්මනිය දක්වන උනන්දුව පිළිබඳවද මේ හමුවේදී තානාපති නියුමාන් මහතා විශේෂයෙන් අවධාරණය කළේය. ස්ථිර පාර්ශ්වකරුවකු ලෙස ශ්‍රී ලංකාව වෙනුවෙන් පෙනී සිටීම සඳහා ජර්මනිය කැප වී සිටින බව තානාපතිවරයා ප්‍රකාශ කළේය. මානව සම්පත් සංවර්ධනය පිළිබඳ ජර්මනියේ වසර 70ක පළපුරුද්ද අවධාරණය කළ තානාපතිවරයා ශ්‍රී ලංකාවේ මානව සම්පත් සංවර්ධනය ශක්තිමත් කිරීම සඳහා සිය සහය දෙන බවටද සහතික විය. තවද ශ්‍රී ලාංකේය තාක්‍ෂණික අධ්‍යාපන ක්ෂේත්‍රයේ තීරණාත්මක කාර්යභාරයක් ඉටු කරන කටුබැද්ද සහ කිලිනොච්චි ජර්මානු කාර්මික විද්‍යාල දෙකෙහි මෙහෙයුම් තව දුරටත් වැඩිදියුණු කිරීමට සහාය දෙන බවද තානාපතිවරයා සඳහන් කළේය. ශ්‍රී ලංකාවේ රාජ්‍ය සේවයේ කාර්යක්ෂමතාව ඉහළ නැංවීමට සහයෝගය දීමට ජර්මනිය සූදානම් බවද තානාපතිවරයා මෙහිදී වැඩිදුරටත් පැවසීය.
