ශ්‍රී ලංකාව සහ සවුදි අරාබිය අතර ආර්ථික සබඳතා වැඩිදියුණු කිරීමටත්, එහිදී ශ්‍රී ලංකාවේ තේ අපනයනය ප්‍රවර්ධනය කෙරෙහි විශේෂ අවධානය යොමු කළ යුතු බවත් ශ්‍රී ලංකාවේ සවුදි අරාබි තානාපති කලිඩ් හමඩ් නසාර් අල්දසම් අල්කතානි (Khalid Hamoud Nasser Aldasam Alkahtani) මහතා අවධාරණය කළේය. ඔහු මේ බව ප්‍රකාශ කළේ ඊයේ (10) පෙරවරුවේ ජනාධිපති කාර්යාලයේදී ජනාධිපති අනුර කුමාර දිසානායක මහතා හමු වූ අවස්ථාවේදීය.
ජනාධිපති අනුර කුමාර දිසානායක මහතාගේ ජනාධිපතිවරණ ජයග්‍රහණය සම්බන්ධයෙන් සවුදි අරාබියේ සල්මාන් බින් අබ්දුලාසීස් රජුගේ සුබපැතුම් මෙහිදී තානාපතිවරයා විසින් ජනාධිපතිවරයා වෙත පිරිනමන ලදි. සවුදි අරාබිය වෙත ශ්‍රී ලංකාවේ තේ අපනයනය ඉහළ නැංවීම කෙරෙහි මෙහිදී විශේෂ අවධානය යොමු වූ අතර, දෙරට අතර ආර්ථික සබඳතා ශක්තිමත් කිරීම කෙරෙහිද ජනාධිපතිවරයාගේ සහ තානාපතිවරයාගේ අවධානය යොමු විය.
