ශ්‍රී ලංකාව තුළ දැනට ක්‍රියාත්මක ජාත්‍යන්තර මූල්‍ය අරමුදල පිළිබඳ වැඩසටහන මඟින් ශ්‍රී ලංකාවට සහාය දැක්වීමට ස්විට්සර්ලන්තය කැප වී සිටින බවත් ජනාධිපති අනුර කුමාර දිසානායක මහතා විසින් දූෂණයට එරෙහිව දරනු ලබන උත්සාහයන් සඳහා සහාය වීමට ස්විට්සර්ලන්තය සූදානම් බවත් ශ්‍රී ලංකාවේ ස්විට්සර්ලන්ත තානාපතිනි ආචාර්ය සිරි වෝල්ට් (Siri Walt) මහත්මිය ප්‍රකාශ කළාය. ඇය එසේ ප්‍රකාශ කළේ පෙරේදා (9) ජනාධිපති කාර්යාලයේදී ජනාධිපති අනුර කුමාර දිසානායක මහතා හමු වෙමිනි. මෙහිදී ජනාධිපතිවරණ ජයග්‍රහණය පිළිබඳව ජනාධිපති අනුර කුමාර දිසානායක මහතාට සිය සුබපැතුම් පිරිනැමූ තානාපතිනිය ස්විට්සර්ලන්ත රජයේ සහ ජනතාවගේ සුබ පැතුම්ද ජනාධිපතිවරයා වෙත මෙහිදී පිරිනැමීය. ඍජු විදේශ ආයෝජන සහ සංචාරක ව්‍යාපාරය පිළිබඳ ස්විට්සර්ලන්තයේ විශේෂඥතාවද ඇය විසින් මෙහිදී අවධාරණය කළ අතර, ආර්ථික වර්ධනය ප්‍රවර්ධනය කිරීමෙහිලා ශ්‍රී ලංකාවට එම ක්ෂේත්‍රයන්හි සහය දිය හැකි බවද ප්‍රකාශ කළාය.
24
