– ලක්ෂ 30කට ජලය-විදුලිය නෑ
– ටොනේඩෝ රැල්ලකින් නිවාසවල වහල උඩු ගුවනට
– ගුවන් ගමන් 781ක් අවලංගුයි
අමෙරිකාවේ කාලගුණ විද්‍යාඥයන් අනාවැකි පළ කළ ආකාරයටම පෙරේදා ෆ්ලොරිඩා ප්‍රාන්තයේ බටහිර වෙරළ තීරයෙන් රට තුළට කඩා වැදුණු බවත්, පැයට කිලෝමීටර් 200ක වේගයෙන් හමා යමින් නගරයට දැඩි හානි සිදු කළ බවත් විදෙස් මාධ්‍ය වාර්තා කළේය. මීට සති දෙකකට පෙර ‘හෙලන්’ සුළි කුණාටුවෙන් පීඩාවට පත්ව සිටි ප්‍රාන්ත වැසියන් තවත් දරුණු සුළි කුණාටුවකට මුහුණ දීමට සිදුවීමෙන් දුෂ්කරතා රැසකට ගොදුරු වී ඇතැයි ද වාර්තා වේ. 
මීටර් 4ක් උසට මුහුදු රැලි නංවාගෙන ‘මිල්ටන්’ සුළි කුණාටුව ෆ්ලොරිඩාවට කඩා වැදීමත් සමඟම දරුණු ටෝනේඩෝ 10ක් පමණ ගස්වැල් උගුලා දමමින්ද, නිවාසවල වහල ගුවනේ පාකර හරිමින් ද ෆ්ලොරිඩාව හරහා ඇදී ගිය බව විදෙස් මාධ්‍ය වාර්තා කළේය.
සුළි කුණාටු, ටෝනේඩෝ සහ ගංවතුර තත්ත්වය හේතුවෙන් ෆ්ලොරිඩා ප්‍රාන්තයේ මුළුමනින්ම උඩුයටිකුරු වී ඇතැයි ද, ලක්ෂ 30ක අධික පිරිසකට විදුලිය හා පානීය ජලය අහිමිවී ඇතැයි ද විදෙස් මාධ්‍ය සඳහන් කළේය. ජනතාවගේ ආරක්ෂක කටයුතු වෙනුවෙන් ජාතික ආරක්ෂක බළකායේ සාමාජිකයන් 5000ක් මේ වන විටත් රාජකාරියේ යොදවා ඇතැයි ද, අවශ්‍යතාව මත සේවයේ යෙදවීමට තවත් සෙබළුන් 3000ක් පමණ සූදානමින් තබා ඇතැයි ද ෆ්ලොරිඩා ආණ්ඩුකාර රොන් ඩි සැන්ටිස් නිවේදනය කර තිබේ.ෆ්ලොරිඩා ප්‍රාන්තයෙන් පිටත්වන සහ එම ප්‍රාන්තයට පැමිණෙන සියලු ගුවන් ගමන් අවලංගු කර ඇති අතර, බදාදා දිනයේදී පමණක් එසේ අවලංගු කළ ගුවන් ගමන් වාර සංඛ්‍යාව 781ක් බව ද වාර්තා වේ.
