හිටපු ජනාධිපති රනිල් වික්‍රමසිංහ මහතාගේ පෞද්ගලික නිවෙසට ගිනි තැබීමේ සිද්ධියේ පස්වැනි සැකකරු ඇන්ඩෘ ඉවෝන් පෙරේරා යන අය දැඩි ඇප කොන්දේසි මත මුදාහරින ලෙස කොටුව මහේස්ත්‍රාත් තනූජා ලක්මාලි මහත්මිය පෙරේදා (09) නියෝග කළාය.
හිටපු ජනාධිපති රනිල් වික්‍රමසිංහ මහතාගේ කොල්ලුපිටියේ පිහිටි පෞද්ගලික නිවෙසට අරගලකරුවන් විසින් 2022දී සිදු කළ ගිනි තැබීමේ සිද්ධිය සම්බන්ධයෙන් පස්වැනි සැකකරු ලෙස නම් කර ඇති විදේශගතවී සිටි ඇන්ඩෘ ඉවෝන් පෙරේරා යන අයට නිකුත් කර ඇති විදේශ ගමන් තහනමේ මෙරටට පැමිණීමේ කොන්දේසිය පමණක් තාවකාලිකව ඉවත් කිරීමෙන් අනතුරුව මෙරටට පැමිණ, ජනාධිපති නීතිඥ මෛත්‍රී ගුණරත්න මහතා ඇතුළු නීතිඥවරුන් කණ්ඩායමක් හරහා අධිකරණයට භාරවී සිදු කළ ඉල්ලීම සලකා බැලූ මහේස්ත්‍රාත්වරිය මේ නියෝගය සිදු කළාය.
ඇප කොන්දේසි ඉදිරිපත් කරමින් රුපියල් මිලියනය බැගින් වූ ශරීර ඇප දෙකක් මත සැකකරු මුදා හරින ලෙස නියෝග කළ මහේස්ත්‍රාත්වරිය ඇපකරුවන් ළඟම ඥාතීන් විය යුතු වන බවත්, සැකකරුට ලබන 11 වැනිදා පෙරවරු 9ට අපරාධ පරීක්ෂණ දෙපාර්තමේන්තුව හමුවේ පෙනී සිට ප්‍රකාශයක් දෙන ලෙසත් මහේස්ත්‍රාත්වරිය නියෝග කළාය.
ජනාධිපති නීතිඥ මෛත්‍රී ගුණරත්න මහතා මෝසමක් ගොනු කරමින් තම සේවාදායකයා වෙනුවෙන් සිදු කළ ඉල්ලීම සලකා බැලීමෙන් අනතුරුව මහේස්ත්‍රාත්වරිය මේ නියෝග සිදු කළාය. තම සේවාදායකයා වැඩිදුර අධ්‍යාපනය සඳහා විදේශගත වූ බවත්, ඔහු දෙවැනි වසර නීති සිසුවකු බවත් ජනාධිපති නීතිඥවරයා අධිකරණයට දන්වා සිටියේය.
තමන් අධිකරණයට වූ එකඟතාව මත ඔහු මෙරටට පැමිණි බවත්, පැමිණි වහාම අධිකරණයට පැමිණ භාර වූ බවත් කියමින් නඩුව සඳහා අවශ්‍ය සියලු සහාය දෙන බැවින් සුදුසු ඕනෑම ඇපයක් මත ඔහු මුදාහරින ලෙස අධිකරණයෙන් ඉල්ලා සිටියේය.
“මගේ සේවාදායකයා මේ සිද්ධියට කිසිදු සම්බන්ධයක් නෑ. ඔහු එදින සවස 6 වන විට එම ස්ථානයෙන් බැහැරවී ගොස් තිබෙනවා. 5000ක් 6000ක් පමණ දෙනා එම ස්ථානයේ සිටි බවට වාර්තා වුණා. එලෙස සිටි අයගෙන් මගේ සේවාදායකයා සම්බන්ධයෙන් පියවර ගත්තාට කිසිදු සාක්ෂියක් නෑ. දුරකතන සංවාද 1500ක් පමණ පරික්ෂා කළ බව අපරාධ පරීක්ෂණ දෙපාර්තමේන්තුව දන්වා ඇතත් ඔහුගේ දුරකතන පරික්ෂාවක් කර නෑ.” යැයි කී ජනාධිපති නීතිඥවරයා මේ නඩුවට ඉදිරිපත් වීමට සහ සහාය දීමට සූදානම් බවත් කියමින් මේ ඉල්ලීම සිදු කළේය.
නඩුවට සහාය දක්වන බව දැන්වූ නිසා මෙරටට පැමිණිමේදී අත්අඩංගුවට ගන්නා බවට වන කොන්දේසිය ලිහිල් කිරීමට විරුද්ධ නැති බව පෙර දින දැන්වූ බවත්, එහෙත් ඔහු මෙරටට පැමිණ ඇත්තේ තමන්ගේ වාසියට එනම් මහමැතිවරණයට ඉදිරිපත් වීමට බව යැයි ද නීතිපති දෙපාර්තමේන්තුව එහිදී නීතිපතිවරයාගේ නියෝජනයක් සිදු කරමින් අධිකරණයට දන්වා සිටියේය.
