පැලවත්ත මිනැසේරෝ ජාත්‍යන්තර පාසලෙහි ත්‍යාග ප්‍රදානෝත්සවය ලෝක ළමා දිනය හා සමගාමීව පසුගියදා කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේදී උත්කර්ෂවත් අයුරින් පැවැත්විණි.
පළමු වැනි වරට පවත්වනු ලැබූ මේ ත්‍යාග ප්‍රදානෝත්සවයේදී විවිධ අයුරින් දක්ෂතා දැක්වූ මිනැසේරෝ දරුවන් ඇගයීමට ලක් වූ අතර, ත්‍යාග, ලාංඡන, සහතික පත්‍ර සහ සම්මානයට ද ඔවුන්ට හිමි විය.
මෙහිදී එක් සිසුවකුට පමණක් හිමි වන ‘විශිෂ්ටතම අධ්‍යයන කුසලතාව (2024)’ – හෙවත් ‘පුෂ්පා හෙට්ටිආරච්චි කුසලතා සම්මානය’ 09 වැනි ශ්‍රේණියේ තිසරි මලීෂා දේවින්දි ශිෂ්‍යාව පිදුම් ලැබූ අතර, විෂය සමගාමී මෙන්ම විෂය බාහිර දක්ෂතා දක්වමින් වසරේ කැපී පෙනෙන දක්ෂතම ශිෂ්‍යයා සඳහා පිරිනැමෙන ‘අනුර කන්නන්ගර කුසලතා සම්මානය’ හිමි වූයේ පෙසදි දුලන්සා කන්නන්ගර ශිෂ්‍යාවටයි.
ශ්‍රී ලංකා රූපවාහිනී සංස්ථාවේ හිටපු සභාපති, ශ්‍රී ජයවර්ධනපුර විශ්වවිද්‍යාලයේ හිටපු උපකුලපති, ජ්‍යෙෂ්ඨ මහාචාර්ය සුදන්ත ලියනගේ, මිනැසේරෝ ජාත්‍යන්තර පාසලේ අධ්‍යක්ෂ දේශමාන්‍ය ආචාර්ය මේජර් අනුර කන්නන්ගර, විදුහල්පතිනී පුෂ්පා හෙට්ටිආරච්චි, නියෝජ්‍ය විදුහල්පතිනි ලක්ෂ්මි ජයසිංහ, මතුගම කොට්ඨාසයේ හිටපු සහකාර අධ්‍යාපන කොමසාරිස්වරිය වන සම්මානනීය ලේඛිකා ජෙනල්ඩීන් ආර්. පියදාස, විද්‍යාලයීය ආචාර්ය මණ්ඩලය, මවුපියන් ඇතුළු සම්භාවනීයෝ මේ සඳහා සහභාගි වූහ.
