දුරකතන පෙර ගෙවුම් කාඩ්පත් තොග වශයෙන් බෙදාහරින නාරාහේන්පිට ජාවත්ත පාරේ ප්‍රධාන පෙළේ නියෝජිත ආයතනයකට රාත්‍රී කාලයේදී ඇතුළු වී රුපියල් ලක්ෂ 40කට අධික වටිනා පෙර ගෙවුම් කාඩ්පත් සොරාගත් පුද්ගලයන් දෙදෙනාගෙන් අයෙකු සහ 17 හැවිරිදි තරුණියක අත්අඩංගුවට ගත් බව නාරාහේන්පිට පොලිසිය පවසයි.
එම සැකකරු අත්අඩංගුවට ගන්නා අවස්ථාවේදී හොරොයින් මත්කුඩු මිලිග්‍රෑම් 2700ක් සන්තකයේ තිබී පොලිස් භාරයට ගෙන ඇත.
සොරා ගත් පෙර ගෙවුම් කාඩ්පත් තොගයෙන් කොටසක් සොරකමට සම්බන්ධ අනෙක් සැකකරුගේ 17 හැවිරිදි පෙම්වතිය භාරයේ තිබියදී සොර බඩු ළඟ තබාගැනීමේ චෝදනාව මත සැකකාරිය අත්අඩංගුවට ගෙන ඇත.
මීට මාසයකට පමණ ඉහතදී එම නියෝජිත ආයතනයේ ඉහළ මහලට යාබද තාප්පය මතින් නැඟ තිබූ සැකකරු සහ තවත් පුද්ගලයකු විදුලිය විසන්ධි කර එහි ඉදිරිපස දොර කඩා ඇතුළු වී රුපියල් ලක්ෂ 40ක් වටිනා දුරකතන පෙර ගෙවුම් කාඩ්පත් සහ අන්තර්ජාල පෙර ගෙවුම් කාඩ්පත් තොගයක් සොරාගෙන ගොස් තිබිණි.
මේ සම්බන්ධයෙන් ලද පැමිණිල්ල අනුව විමර්ශන පැවැත්වූ නාරාහේන්පිට පොලිසියේ අපරාධ විමර්ශන අංශයේ ස්ථානාධිපති පොලිස් පරීක්ෂක ටී. අයි. හෙට්ටිආරච්චි මහතා ඇතුළු නිලධාරීන් එක් සැකකරුවෙක් හොරොයින් මත්කුඩු සමඟ ජාවත්ත ප්‍රදේශයේදී අත්අඩංගුවට ගෙන සිදු කළ ප්‍රශ්න කිරීමේදී සොරකම සිදු කළ අයුරු සහ ඊට සහභාගි වූ පුද්ගලයා සම්බන්ධයෙන් තොරතුරු අනාවරණය කළ බව පොලිසිය පවසයි.
මේ අනුව අනෙක් සැකකරු අත්අඩංගුවට ගැනීම සඳහා කළුතර ප්‍රදේශයේ නිවෙසක් වැටලීමේදී එම සැකකරු නිවසේ නොසිටි බවත් සොරා ගත් පෙර ගෙවුම් කාඩ්පත් තොගයෙන් අඩකට ආසන්න ප්‍රමාණයක් ඔහුගේ පෙම්වතිය සන්තකයේ තබාගෙන සිටියදී එම සැකකාරිය ද අත්අඩංගුවට ගත් බවත් පොලිසිය පවසයි.
අත්අඩංගුවට ගත් සැකකරු සහ අත්අඩංගුවට ගැනීමට නියමිත සැකකරු මීට පෙරද මෙම නියෝජිත ආයතනය කඩා දේපොළ සොරා ගත් පුද්ගලයන් දෙදෙනකු බව පොලිස් විමර්ශනවලදී අනාවරණය වී ඇත.
මේ වන විට අත්අඩංගුවට ගෙන සිටින ප්‍රධාන සැකකරු මාස කීපයක ඉහතදී මෙම නියෝජිත ආයතනය අලුත්වැඩියා කිරීම සඳහා පැමිණි පුද්ගලයකු බවටද වැඩිදුරටත් අනාවරණය වූ බව පොලිසිය පවසයි.
එම සැකකරු කළුතර දොඩන්ගොඩ ප්‍රදේශයේ 30 හැවිරිදි පුද්ගලයෙකි.
සැකකරු සහ සැකකාරිය අධිකරණය වෙත ඉදිරිපත් කිරීමට නියමිතය.
