කැලණිවැලි දුම්රිය මාර්ගයේ අවිස්සාවේල්ල හිඟුරල සහ මිරිස්වත්ත උප දුම්රිය ස්ථාන අතරතුර දුම්රිය මාර්ගයේ දිවි නසාගැනීමේ අරමුණින් දුම්රිය හරහා නිදා සිටි තරුණ මවක් සහ තුන් හැවිරිදි දියණියගේ දිවි බේරා ගැනීමට දුම්රිය රියැදුරුගේ දැඩි අවධානය නිසා ඊයේ (10) උදෑසන හැකිව තිබේ.
මව සහ දියණියගේ දිවි බේරුණ ද දුම්රිය ගැටීමෙන් දෙදෙනාටම සුළු තුවාල සිදුව ඇති අතර 1990 සුව සැරිය ගිලන් රථයක් මඟින් එම දෙදෙනා අවිස්සාවේල්ල මූලික රෝහලට ඇතුළත් කිරීමෙන් පසු මූලික ප්‍රතිකාර සිදු කිරීමෙන් පසු මේ වනවිට නේවාසිකව ප්‍රතිකාර ලබන බව අවිස්සාවේල්ල මූලික රෝහලේ ප්‍රකාශකයෙක් පැවසීය.
අදාළ අංක 830 දරන දුම්රිය අවිස්සාවේල්ල සිට කොළඹ කොටුව දක්වා ධාවනය වෙමින් තිබියදී හිඟුරල උප දුම්රිය ස්ථානය අසල දුම්රිය නැවැත්විය යුතු නිසාවෙන් එම දුම්රිය වේග පාලනයක් යටතේ ධාවනය කරවූ බැවින් මෙම ජීවිත දෙක බේරාගැනීමට හැකි වී ඇතැයි සිද්ධිය දුටු ප්‍රදේශවාසීහු පැවසූහ.
සිද්ධියට මුහුණ දුන් මවගේ පෞද්ගලික ගැටලුවක් මත මෙලෙස දියණිය සමඟ දුම්රියට පැන සියදිවි නසා ගැනීමේ අරමුණින් දුම්රිය මාර්ගය හරහා නිදා සිට ඇතැයි ද අවිස්සාවේල්ල මූලස්ථාන පොලිසියේ උසස් නිලධාරියෙක් පැවසීය.
