කොළඹ සුගතදාස ගෘහස්ථ ක්‍රීඩාංගණයේදී ඊයේ ආරම්භ වූ මධ්‍යම ආසියානු අවුරුදු 20න් පහළ වොලිබෝල් තරගාවලිය යටතේ සහභාගිවූ පළමු තරගයෙන් නේපාලය හමුවේ වට 3-0ක පරාජයක් අත්විඳීමට සත්කාරක ශ්‍රී ලංකා කණ්ඩායමට සිදු විය.
තරගයේ පළමු වටය ලකුණු 25-14ක් ලෙස පහසුවෙන්ම ජය ගැනීමට නේපාල ක්‍රීඩකයන් සමත් වුවත් දෙවැනි සහ තෙවැනි වටවල ප්‍රබල සටනක් දීමට ශ්‍රී ලංකා ක්‍රීඩකයෝ සමත් වූහ. කෙසේ වෙතත් එම වට දෙක පිළිවෙළින් 25-22ක් සහ 28-26ක් ලෙස ජය ගනිමින් තරගයේ ජය තහවුරු කර ගැනීමට නේපාල ක්‍රීඩකයෝ සමත් වූහ. ශ්‍රී ලංකා පිල අද මාලදිවයිනට එරෙහිව පස්වරු 6.00ට තරග වැදීමට නියමිතය.
මේ අතර තරගාවලිය ආරම්භ කරමින් පැවති පළමු තරගයෙන් කිරිකිස්තානය වට 3-0කින් පරාජය කිරීමට උස්බෙකිස්තානය සමත් විය. එහි ලකුණු තත්ත්වය වූයේ 25-20, 28-26 සහ 25-10කි.
මධ්‍යම ආසියානු වොලිබෝල් සම්මේලනයේ ආරාධනාවකට අනුව ශ්‍රී ලංකා වොලිබෝල් සම්මේලනය සංවිධාන කරන මේ තරගාවලිය තරගාවලියට කණ්ඩායම් 6ක් එක්ව සිටින අතර, අද තරගාවලියේ දෙවැනි දිනයයි.
