නේපාලයේදී සුදුසුකම් ලැබීමේ තරගාවලියට ක්‍රීඩා කළ ශ්‍රී ලංකා රග්බි පිල තුන්වැනි ස්ථානයට පත්වීමෙන් ලබන වසරේ ආසියානු සත් සාමාජික රග්බි තරගමාලාවට ඇතුළත්වීමේ අවස්ථාව ගිලිහී ගියේය. ඒ අනුව 2026 ආසියානු සත් සාමාජික තරගාවලියට එක්වීම සඳහා ලබන වසරේ පැවැත්වෙන සුදුසුකම් ලැබීමේ තරගාවලියට නැවත ක්‍රීඩා කිරීමට ශ්‍රී ලංකාවට සිදුවනු ඇත. දිගු කාලයක් පුරා ආසියානු සත් සාමාජික රග්බි තරගමාලාවේ නිත්‍ය කණ්ඩායමක් බවට පත්වී සිටි ශ්‍රී ලංකා පිලට සුදුසුකම් ලැබීමේ තරගාවලියට ක්‍රීඩා කිරීමට සිදුවූයේ හිටපු ක්‍රීඩා ඇමැතිවරුන්ගේ සහ හිටපු රග්බි නිලධාරීන්ගේ ‘කඹ ඇදිල්ල’ හේතුවෙනි. ශ්‍රී ලංකා පිලට අවසන් වරට 2022 දී ආසියානු තරගමාලාවේ දෙවැනි හා තුන්වැනි අදියරේ තරගාවලියට පමණක් තරග කිරීමට අවස්ථාව උදා වූයේ ද පැවැති තත්ත්වය මත ජාතික ඔලිම්පික් කමිටුවේ ධජය යටතේය.
කලෙකට පසු ජාත්‍යන්තර තරගාවලියකට සහභාගි වූ තරින්ද රත්වත්තගේ නායකත්වයෙන් යුතු ශ්‍රී ලංකා පිල නේපාලයේදී මූලික වටයේ සියලු තරග ද, ඉන්දියාවට එරෙහිව අවසන් පූර්ව තරගය ද ජය ගැනීමට සමත් වුවත්, ප්‍රබල ක්‍රීඩකයන්ගෙන් සැදුම්ලත් පිලිපීනය හමුවේ අවසන් පූර්ව වටයේදී ලකුණු 19-12කින් පරාජයට පත්විය. ශ්‍රී ලංකාවට තුන්වැනි ස්ථානය හිමිවූයේ උස්බෙකිස්තානය සමඟ පැවැති තරගයෙන් ලකුණු 32-0ක ජයක් වාර්තා කිරීමෙනි.
මේ අතර පිරිමි තරගාවලියට සමගාමීව පැවැති කාන්තා තරගාවලියේදී රන්දිකා කුමුදුමලීගේ නායකත්වයෙන් තරග වැදුණු ශ්‍රී ලංකා කාන්තා රග්බි පිල මූලික වටයේදී එක් තරගයක් පමණක් ජයගෙන බඳුන ශුරතාව සඳහා එක්වූ අතර, එහිදී අවසන් පූර්ව තරගයෙන් නේපාලයත්, අවසන් තරගයෙන් උස්බෙකිස්තානයත් පරාජය කරමින් බඳුන ශුරතාව දිනා ගත්තේ තරගාවලියේ පස්වැනි ස්ථානය අත්කර ගනිමිනි.
මේ තරගාවලියේදී කාන්තා හා පිරිමි දෙඅංශයෙන්ම කුසලාන දිනාගත් පිලිපීනය ලබන වසරේ ආසියානු සත් සාමාජික රග්බි තරගමාලාවට සුදුසුකම් ලැබූ අතර, ශ්‍රී ලංකා කාන්තා හා පිරිමි දෙඅංශයටම
2026 ආසියානු තරග බිමට එක්වීමට නම් ලබන වසරේ පැවැත්වෙන සුදුසුකම් ලැබීමේ තරගාවලියට ක්‍රීඩා කිරීමට සිදුවනු ඇත.
