ඕකිඩ් මල් වගාවක් කරගෙන යන මුවාවෙන් මහා පරිමාණ නීති විරෝධී මත්පැන් නිෂ්පාදනාගාරයක් පවත්වාගෙනගිය දෙදෙනකු මත්පැන් සහ උපකරණ තොගයක් සමඟ අත්අඩංගුවට ගත් බව දංකොටුව පොලිසිය පවසයි. දංකොටුව, මෝරුක්කුලිය ප්‍රදේශයේ පවත්වාගෙන ගොස් ඇති මෙම නීතිවිරෝධී මත්පැන් නිෂ්පාදනාගාරයේ මත්පැන් පෙරීම සඳහා ජල ටැංකි හා ජල නළ යොදාගෙන තිබීම විශේෂ බව පොලිසිය කියයි.
කිසිදු පුද්ගලයකුට සැක නොසිතෙන අයුරින් සැලකිය යුතු කාලයක් මෙය පවත්වාගෙන ගොස් ඇති බව පොලිසිය සඳහන් කරයි. මල් වගාව සඳහා ජලය ලබා ගන්නා අයුරින් මේ මෙහෙයුම් පද්ධතිය සකස් කර තිබී ඇති අතර, මේ ස්ථානයේ තිබී මත්පැන් පෙරීම සඳහා භාවිත කරන ගෝඩා මිලි ලීටර් හතළිස් හත් ලක්ෂයකට ආසන්න ප්‍රමාණයක්, නීති විරෝධී මත්පැන් මිලි ලීටර් එක්ලක්ෂ තිස් පන්දහසක් හා පෙරුම් උපකරණ විශාල ප්‍රමාණයක් අත්අඩංගුවට ගත් බව පොලිසිය කියයි.
හලාවත කොට්ඨාස වැඩ බලන පොලිස් අධිකාරි ධම්මික හපුගොඩ මහතාගේ උපදෙස් පරිදි නාත්තන්ඩිය සහකාර පොලිස් අධිකාරි එස්.ඩී. ආර් ජයරත්න මහතාගේ මෙහෙයවීමෙන් දංකොටුව පොලිස් ස්ථානාධිපති ශිරාන් පෙරේරා, උප පොලිස් පරීක්ෂක සමන් සිල්වා, පොලිස් සැරයන්වරුන් වන (22348) දේශප්‍රිය, (63173) පද්මසිරි, (99339) හපුආරච්චි, පොලිස් කොස්තාපල්වරුන් වන (24182) දසනායක, (102569) බණ්ඩාර, (102893) පැතුම් යන නිලධාරීහු මෙම වැටලීමට සහභාගි වූහ.
