රාජ්‍ය බුද්ධි සේවයේ නව ප්‍රධානියා ලෙස නියෝජ්‍ය පොලිස්පති ධම්මික ප්‍රියන්ත මහතාව පත්කර ඇත. ඒ මහතා නව තනතුරේ අද (07) දිනයේ වැඩ භාර ගැනීමට නියමිත ය.
මෙතෙක් මෙම තනතුරේ සේවයේ නිරත මේජර් ජෙනරාල් සුරේෂ් සලෙයි මහතා හමුදා සේවයෙන් විශ්‍රාම ගෙන ඇති බව සඳහන්ය. ඔහු විශ්‍රාම ගෙන ඇත්තේ නියෝජ්‍ය පොලිස්පති ධම්මික ප්‍රියන්ත මහතාගේ පත්වීමත් සමඟිනි. ධම්මික ප්‍රියන්ත මහතා කළුතර මධ්‍ය විද්‍යාලයෙන් ද්විතියීක අධ්‍යාපනය හදාරා ශ්‍රී ජයවර්ධනපුර විශ්වවිද්‍යාලයට ඇතුළත්ව උපාධිධාරියකු ලෙස ශ්‍රී ලංකා පොලිසියට ආධුනික සහකාර පොලිස් අධිකාරිවරයෙක් ලෙස එක්වූ අයෙකි.
2021 වසරේ පෙබරවාරි 14 වැනිදා ඔහු සමඟ ආධුනික සහකාර පොලිස් අධිකාරීවරුන් ලෙස ශ්‍රි ලංකා පොලිසියට බදවාගත් නිලධාරීන් ගණන 15කි. ඒ අතර සිටි ලක්ෂ්මන් කුරේ නමැති නිලධාරියා බන්ධනාගාරගතව සිටියි. ආධුනික සහකාර පොලිස් අධිකාරිවරුන් ලෙස ධම්මික ප්‍රියන්ත සමඟ පොලිස් සේවයට එක්වූ සෙසු නිලධාරීන් අතරින් පස් දෙනෙක් මේ වන විට ජ්‍යෙෂ්ඨ නියෝජ්‍ය පොලිස්පතිවරුන්ය. ඒ පොලිස් විශේෂ කාර්ය බළකා සේනාවිධායක වරුණ ජයසුන්දර, මැතිවරණ අංශය භාර පොලිස් ප්‍රධානි අසංක කරවිට සහ දකුණු පළාත් භාර පොලිස් ප්‍රධානි මහේෂ් සේනාරත්න, උතුරු පළාත් භාර පොලිස් ප්‍රධානි තිලක් ධනපාල සහ ඌව පළාත්භාර පොලිස් ප්‍රධානි දිනේෂ් කරුණානායක යන නිලධාරීන්ය. ජ්‍යෙෂ්ඨ නියෝජ්‍ය පොලිස්පති ධුරයට උසස්වීම් ලැබීමට සුදුසුකම් ලබා සිටින නිලධාරියකු වන ධම්මික ප්‍රියන්ත මහතා දිවයිනේ බොහෝ ප්‍රදේශවලත් අපරාධ පරීක්ෂණ දෙපාර්තමේන්තුවේත් මූල්‍ය අපරාධ විමර්ශන කොට්ඨාසයේත් සේවයේ නිරතව සිටි නමක් දිනා සිටින දක්ෂ නිලධාරියෙකි.
සමාජ විද්‍යාව පිළිබඳ පශ්චාත් උපාධි ඩිප්ලෝමාව ද, අපරාධ විද්‍යාව පිළිබඳ ශාස්ත්‍රපති උපාධිය ද, ශ්‍රී ජයවර්ධනපුර විශ්වවිද්‍යාලයෙන් ලබාගෙන ඇති ධම්මික ප්‍රියන්ත මහතා බණ්ඩාරනායක ජාත්‍යන්තර ඇකඩමියෙන් ජාත්‍යන්තර සම්බන්ධතා පශ්චාත් උපාඩි ඩිප්ලෝමාව ද හදාරා ඇත.
