727
ඊශ්‍රායලය ඉලක්ක කරමින් පසුගිය සතියේ බැලැස්ටික් ප්‍රහාරයක් එල්ල කළ ඉරාන විප්ලවීය හමුදාවේ ගුවන් මෙහෙයුම් ඒකකයේ අණදෙන නිලධාරියාට ඉරාන අධ්‍යාත්මික නායක අයතුල්ලා අලි කමේනි ඉහළම ගෞරව පදක්කම පිරිනමා ඇතැයි විදෙස් මාධ්‍ය වාර්තා කළේය.
එරට ඉහළම මට්ටමේ හමුදා නායකයන්ගේ සහභාගීත්වයෙන් පදක්කම් පැලඳවීමේ උත්සවයක් පවත්වා ඇති බවත්, එහිදී ඉරාන විප්ලවීය හමුදාවේ ගුවන් මෙහෙයුම් ඒකකයේ අණදෙන නිලධාරි අමිර් අලි හජිසඩේට එම පදක්කම පිරිනැමූ බවත් විදෙස් මාධ්‍ය වැඩිදුරටත් වාර්තා කළේය. අසූව දශකයේ පැවැති ඉරාන – ඉරාක යුද්ධය අතරතුර ආරම්භ කළ වීර පදක්කම් පිරිනැමීමේ උත්සවය මෙවර පවත්වා ඇත්තේ වසර ගණනාවකට පසුව බව ද වාර්තා වේ.
