සීමිත ඕවර තරගාවලි ද්විත්වයකට එක්වීම සඳහා බටහිර ඉන්දීය කොදෙව් ක්‍රිකට් පිල ලබන මස මෙරටට පැමිණීමට නියමිතය.
දෙරට අතර තරග 3කින් සමන්විත විස්සයි20 තරගාවලියක් සහ තරග 3කින් සමන්විත එක්දින තරගාවලියක් පැවැත්වෙන අතර, විස්සයි20 තරගාවලිය ඔක්තෝබර් මස 13 වැනිදා රංගිරි දඹුලු ජාත්‍යන්තර ක්‍රිකට් ක්‍රීඩාංගණයේදී ආරම්භ වෙයි.
දෙවැනි විස්සයි20 තරගය 15 වැනිදා සහ අවසන් විස්සයි20 තරගය 17 වැනිදා පැවැත්වීමට නියමිතය. මේ තරග රාත්‍රී තරග ලෙස දඹුල්ලේදීම පැවැත්වේ.
තරග 3කින් සමන්විත එක්දින ක්‍රිකට් තරගාවලිය පල්ලෙකැලේ ජාත්‍යන්තර ක්‍රිකට් ක්‍රීඩාංගණයේදී පැවැත්වෙන්නේ ඔක්තෝබර් 20, 23 සහ 26 දිනවලදීය. මේ තරග දිවා රාත්‍රී ලෙස පැවැත්වීමට නියමිතය.
බටහිර ඉන්දීය කොදෙව් එක්දින කණ්ඩායමක් කිරාන් පොලාඩ්ගේ නායකත්වයෙන් අවසන් වරට 2020දී මෙරට සංචාරයක නිරත වූ අතර, එහිදී දිමුත් කරුණාරත්නගේ නායකත්වයෙන් යුත් ශ්‍රී ලංකා පිල 3-0ක් ලෙස තරගාවලිය ජය ගැනීමට සමත් විය.
තරග කාලසටහන
විස්සයි20 තරගාවලිය දඹුල්ලේදී
ඔක්. 13 පළමු තරගය
ඔක්. 15 දෙවැනි තරගය
ඔක්. 17 තෙවැනි තරගය
එක්දින තරගාවලිය පල්ලෙකැලේදී
ඔක්. 20 පළමු තරගය
ඔක්. 23 දෙවැනි තරගය
ඔක්. 26 තෙවැනි තරගය
