රක්ෂිතයේ පර්චස් 100ක් වනසා ඔහු අනවසර පතලක් කපලා
– ප්‍රදේශයේ පතල්කරුවන්
චෝදනා බොරු: දොළ රක්ෂිතයේ පතල් 2කම බලපත්‍ර අත්හිටවූවා
– පැල්මඬුල්ල ප්‍රාදේශීය ලේකම්
පැල්මඬුල්ල ප්‍රාදේශීය ලේකම්වරයා වසර තුනක පමණ කාලයක සිට ප්‍රදේශයේ දේශපාලන නායකයන්ගේ සහයෝගය ඇතිව පැල්මඬුල්ල ප්‍රාදේශීය ලේකම් කොට්ඨාසයට අයත් බොරාල ග්‍රාම නිලධාරී වසමේ රජයට අයත් දෙනවක්ගොඩහේන නීලගම දොළ රක්ෂිතයේ අනවසර ලෙස පතල් කපන බවට ඒ ආසන්නයේ ඔප්පුවක් සහිත ඉඩමක නීත්‍යනුකූලව පතල් කපන පිරිසක් චෝදනා කර සිටී.
ඔවුන් පවසන්නේ ප්‍රාදේශීය ලේකම්වරයා තමන් නීත්‍යනුකූලව සිදු කරගෙන යන පතල් පොළ නැවැත්වීමට විවිධ බලපෑම් එල්ල කරමින් දිගින් දිගටම බාධා සිදු කරන බවයි. මේ වන විටත් ප්‍රාදේශීය ලේකම්වරයා පර්චස් 100ක පමණ ප්‍රදේශයක් විනාශ කරමින් පතල් කපා ඇති බවද ඔවුහු චෝදනා කරති. 
මේ සම්බන්ධව අදහස් දැක්වූ පතල් හිමිකරුවකු වන පුන්සිරි විජේරත්න මහතා දැක්වූයේ මෙවන් අදහසකි.
Òමම රජයට බදු ගෙවමින් නීත්‍යනුකූලව රාජ්‍ය මැණික් සංස්ථාවෙන් අවසර පත්‍ර ලබාගෙන පතල් කර්මාන්තයේ යෙදෙන අයෙක්. මම ටික කලක සිට මට අයිතිය තිබෙන පැල්මඬුල්ල දෙනවක්ගොඩහේන දොළට යාබද සින්නක්කර ඔප්පුවක් සහිත ඉඩමක පතල් කර්මාන්තයේ යෙදෙනවා. මා ළඟ සේවකයන් 25 දෙනකු සේවය කරනවා. පැල්මඬුල්ල ප්‍රාදේශීය ලේකම්තුමා මාව ඔහුගේ කාර්යාලයට කැඳවා මගේ පතලෙන් හවුල් ඉල්ලුවා. මම හවුල් දෙන්න බෑ කිව්වා. මොහු එදාම හවුල් දෙන්න බැරි නම් මම පතල් පොළ නවත්වනවා කියා පැවසුවා. ඉන් පසු මම රක්ෂිතයට හානි කරමින් පතල් කපන බවට චෝදනා කර රාජ්‍ය මැණික් හා ස්වර්ණාභරණ අධිකාරියට ලිපියක් යවා මගේ පතල් පොළ පවත්වාගෙන යෑමට බාධා කරමින් මගේ බලපත්‍රය තාවකාලිකව අත්හිටුවීමට කටයුතු කර තිබෙනවා. මම රක්ෂිතයට හානි කර පතල් කපන්නේ නෑ. ප්‍රදේශීය ලේකම්තුමා තමයි කේ.ප්‍රේමානන්දනී යන අයගේ නමින් පර්චස් 10ක ඉඩමකට බලපත්‍රයක් ගෙන දොළ රක්ෂිතයේ වටිනා ගස් කපා දමමින් දොළට ද හානි කරමින් පතල් කපන්නේ. මේ වන විටත් අනවසර ලෙස පර්චස් 100ක පමණ ප්‍රදේශයක් පතල් කපා විනාශ කර තිබෙනවා. ප්‍රාදේශීය ලේකම්තුමාගේ පතල්වල සේවය කළ තුන්දෙනෙක් දැන් මගේ පතල් පොළේ වැඩ කරනවා. ප්‍රාදේශීය ලේකම්තුමා පතල් කපන්න කටයුතු කළ ආකාරය, මැණික් ඉල්ලම් ගැරීමට පෙර පුද පූජාවන් සිදු කිරීමට දේවාල ගානේ ගිය තොරතුරු සියල්ල මේ අය දන්නවා. ඔවුන් කැමැත්තෙන් සිටිනවා ප්‍රාදේශීය ලේකම්තුමාගේ පැටිකිරිය කියන්න. ඔප්පු කරන්න අවශ්‍ය සියලු තොරතුරු, ලිපි ලේඛන මා ළඟ තිබෙනවා.Ó
මේ සම්බන්ධව අදහස් දැක්වූ පතල් භාරව සිටින දීපික රම්‍යනාත් මහතා මෙසේ පැවසීය.
Òඅපි මේ පතල් පොළ පවත්වාගෙන යන්නේ නීත්‍යනුකූල ඔප්පුවක් තියෙන පර්චස් 15ක ඉඩමක බලපත්‍ර ලබා ගෙනයි. නමුත් ප්‍රදේශීය ලේකම්තුමා අපේ පතල් පොළ සිදු කරගෙන යන්න ඉඩ නොදී ඔහුගේ නිල බලය යොදා විවිධ බාධා කිරීම් සිදු කරනවා. දැන් තාවකාලිකව පතලක් නැවැත්වීමට කටයුතු කිරීම නිසා පතල්වල වැඩ කළ පිරිසකට රැකියා නැතිව ඔවුන්ගේ පවුල්වල ආර්ථික ගැටලු මතුව තිබෙනවා. අපි ඉල්ලන්නේ බාධාකිරීම්වලින් තොරව නීත්‍යනුකූලව සිදු කරන අපේ පතල් පොළ පවත්වාගෙන යන්න ඉඩ දෙන ලෙසයි.Ó
මේ සම්බන්ධව පැල්මඬුල්ල ප්‍රාදේශීය ලේකම් බී.එස්.ජී. රුවන්සිරි මහතාගෙන් ද විමසීමක් කළ අතර, ඔහු පැවසුවේ,
Òඔය කියන චෝදනාව මම සම්පූර්ණයෙන් ප්‍රතික්ෂේප කරනවා. මට ලැබුණු තොරතුරු අනුව මම මැණික් හා ස්වර්ණාභරණ අධිකාරියට ලිපියක් යැව්වා දොළ රක්ෂිතයේ අනවසර පතල් කැපීම නවත්වන්න කටයුතු කරන ලෙස. අනවසර පතල් නැවැත්වීමට බලය තිබෙන්නේ මැණික් හා ස්වර්ණාභරණ අධිකාරියටයි. මට ඒ සඳහා බලයක් නෑ. මගේ නම විකුණල කවුරු හරි පතල් කපනවා නම් ඒක වැරැද්දක්. මා දන්න විදිහට මේ දොළ රක්ෂිතයේ තිබෙන පතල් දෙකේම බලපත්‍ර මේ වන විට අත්හිටුවා තිබෙනවා. නමුත් යම් පිරිසක් බලහත්කාරයෙන් පතල් කපන බවට තොරතුරු ලැබී තිබෙනවාÓ යැයි පැවසීය.
