බලපත්‍ර නොමැතිව නීති විරෝධී අයුරින් පොලොන්නරුව, වැලිකන්ද, කටුවන්වල ප්‍රදේශයේ සිට මඩකළපුව දක්වා එළගවයන් විසිදෙනකු ලොරි රථයකින් ප්‍රවාහනය කරමින් සිටි සැකකරුවන් දෙදෙනකු, එම ලොරි රථය සමඟ වැලිකන්ද ප්‍රදේශයේදී ඊයේ (26) අලුයම අත්අඩංගුවට ගත් බව වැලිකන්ද පොලිසිය පවසයි. අත්අඩංගුවට ගත් සැකකරුවන් වාලච්චේන, පූනානි ප්‍රදේශයේ පදිංචි අවුරුදු 24 සහ 32 වයසේ පසුවන්නන් බව ඒ පිළිබඳ පරීක්ෂණ සිදුකරන වැලිකන්ද පොලිස් ස්ථානාධිපති පොලිස් පරීක්ෂක සමන්ත රත්නායක මහතා අප කළ විමසීමකදී සඳහන් කළේය.
එළගවයන් විසිදෙනාම මස්කර විකිණීම සඳහා රැගෙන ගොස් ඇති බවට මූලික පරීක්ෂණවලින් හෙළි වී තිබේ. මීට පෙර ද එළ ගවයන් නීති විරෝධීව බලපත්‍ර නොමැතිව ඔවුන් ප්‍රවාහනය කර ඇති අතර එම එළගවයින් මරා මස් කර විකුණා ඇති බවට ද තොරතුරු ලැබී ඇති බව පොලිසිය සඳහන් කළේය.
අත්අඩංගුවට ගත් සැකකරුවන් දෙදෙනා එළගවයන් සමඟ ලොරි රථය ඊයේ (26) පොලොන්නරුව මහේස්ත්‍රාත් අධිකරණය වෙත ඉදිරිපත් කිරීමට කටයුතු කර ඇති බව ද වැලිකන්ද පොලිසිය පැවසීය.
පොලොන්නරුව ජ්‍යෙෂ්ඨ පොලිස් අධිකාරි නිශාන් ද සිල්වා මහතාගේ උපදෙස් පරිදි වැලිකන්ද පොලිස් ස්ථානාධිපති පොලිස් පරීක්ෂක සමන්ත රත්නායක මහතා ඇතුළු පොලිස් නිලධාරිහු කණ්ඩායමක් මේ පිළිබඳ වැඩිදුර පරීක්ෂණ සිදු කරති.
