පහළොස් හැවිරිදි දියණිය දූෂණය වී ගැබිනියක බවට පත්ව සිටියදී ඒ බව පොලිසියට පැමිණිලි නොකර සඟවාගෙන සිටි එම දැරිවියගේ මව සහ පොලිස් කොස්තාපල්වරයකු වන පියා කැබිතිගොල්ලෑව කොට්ඨාස පොලිස් ළමා හා කාන්තා කාර්යාංශයේ නිලධාරින් විසින් පෙරේදා (25) අත්අඩංගුවට ගනු ලැබූහ.
කැබිතිගොල්ලෑව පොලිස් ස්ථානයට අනුයුක්තව සේවයේ නිරත වහල්කඩ පදිංචි පොලිස් කොස්තාපල්වරයා සහ ඔහුගේ බිරිය මෙසේ අත්අඩංගුවට ගෙන තිබේ.
මෙම 15 හැවිරිදි දැරිවිය දිගින් දිගටම බරපතළ ලෙස දූෂණයට ලක්වෙමින් ගැබිනියක බවට පත්ව සිටියත් ඒ බව පොලිසියට පැමිණිලි කරමින් නීතිය ක්‍රියාත්මක කිරීමට ඒ කිසිවකුත් පියවර ගෙන නැති බවත් සිදුවීම සඟවාගෙන සිට ඇති බවත් උසස් පොලිස් නිලධාරියෙක් පැවසීය.
මේ ගැන කරුණු අනාවරණය වී ඇත්තේ වාහල්කඩ පොලිසියට පසුගියදා (14) ගම්වැසියන්ගෙන් ලද තොරතුරකට අනුවය. වාහල්කඩ පොලිසියේ ළමා හා කාන්තා කාර්යාංශයේ නිලධාරින් තමන්ට ගම්වැසියන්ගෙන් ලද තොරතුර සම්බන්ධයෙන් කරුණු සොයාබැලීමේදී අනාවරණය වී ඇත්තේ එම දැරිවිය හය මස් ගැබිනියක බවය. දැරිවියගේ සිරුරේ බාහිර ලක්ෂණවලින්ද ඒ බව පෙනෙන්නට තිබුණ ද ඒ ගැන මවුපියන් සැලකිල්ලට ගෙන නැති බව ද විමර්ශනයේදී පෙනී ගොස් තිබේ.
මෙම අපරාධය සම්බන්ධයෙන් කළ මූලික විමර්ශනවලින්ද පෙනී ගොස් ඇත්තේ පොලිස් නිලධාරියකු වන දැරියගේ පියා සහ මව කලක සිට දැරිය දූෂණයට ලක්වන බව දැන දැනම චේතනාන්විතවම ඒ පිළිබඳ කිසිදු ක්‍රියාමාර්ගයක් ගෙන නැති බවය. දැරිවිය ගැබිනියකව සිටියදී ඒ බව වසන් කර පාසල් පවා යවා ඇතැයි පොලිසිය කියයි.
මේ සම්බන්ධයෙන් කැබිතිගොල්ලෑව පොලිස් අධිකාරිවරයාට තොරතුරු දැනුම් දීමෙන් අනතුරුව විමර්ශන කටයුතු කොට්ඨාස ළමා හා කාන්තා කාර්යාංශයට භාර දී තිබේ. එම අංශයේ නිලධාරින් විසින් සිදු කළ විමර්ශනවලින් අනතුරුව පසුගියදා (17) දැරිවිය දූෂණය කිරීම සම්බන්ධයෙන් සැකකරුවකු අත්අඩංගුවට ගෙන තිබිණි. පදවිය එකේ කණුවේ පදිංචිකරුවකු වන 32 හැවිරිදි වියේ පසුවන එම සැකකරු කැබිතිගොල්ලෑව මහේස්ත්‍රාත් අධිකරණයට පසුගියදා (18) ඉදිරිපත් කිරීමෙන් අනතුරුව දිසා විනිසුරු හා මහේස්ත්‍රාත් කසුන් කාංචන දසනායක මහතා විසින් සැකකරු රක්ෂිත බන්ධනාගාරගත කිරීමට නියෝග කළේය.
