බිත්තර මිල අඩු වීමේ වාසිය පාරිභෝගික ජනතාවට දීම සඳහා බිත්තර යොදා නිපදවන බේකරි නිෂ්පාදනවල මිල හැකි උපරිමයෙන් අඩු කිරීමට පියවර ගන්නැයි සියලු බේකරි හිමියන්ගෙන් ඉල්ලා සිටින බව සමස්ත ලංකා බේකරි හිමියන්ගේ සංගමයේ සභාපති එන්.කේ. ජයවර්ධන මහතා ප්‍රකාශ කළේය.
කෙසේ වෙතත් බිත්තර මිල ඉහළ යෑම හමුවේ බිත්තර යොදා නිපදවන බේකරි නිෂ්පාදනවල මිල වැඩි කිරීමට බේකරි හිමියන් කිසිම අයුරකින් පියවර නොගත් බවද ඔහු සිහිපත් කළේය. බිත්තර මිල එකම තත්ත්වයෙන් පවතින දෙයක් නොවන බව පෙන්වා දෙන සභාපතිවරයා අද වන විට බේකරි හිමියන් බිත්තරයක් රුපියල් 30ක තොග මිලකට මිල දී ගන්නවා බවත් ඔහු කියා සිටී. කෙසේ වෙතත් බිත්තර මිල දිගටම පහළ මට්ටමක පැවතුණ හොත් බිත්තර යොදා නිපදවන බේකරි නිෂ්පාදන මිල ස්ථිර මිල අඩු කිරීමකට යා හැකි වනු ඇති බවත්, කේක් මිලද රුපියල් 100කින් අඩු කළ හැකි බවත් සභාපතිවරයා ප්‍රකාශ කළේය. විශේෂයෙන් බේකරි නිෂ්පාදනවල මිල පාරිභෝගික ජනතාවට දැනෙන පරිදි අඩු කිරීමට නම් බිත්තර මිල පමණක් නොව, පාන් පිටි සහ මාගරින් මිලද අඩු විය යුතු බව පෙන්වා දෙන සභාපතිවරයා ඒ ද්‍රව්‍යවල මිල පහත දැමීම රජය මඟින් සිදු කළ යුතු බැවින් වත්මන් රජය ඒ සඳහා මැදිහත් වනු ඇති බවට තම සංගමය බලාපොරොත්තුවෙන් පසු වන බවද වැඩිදුරටත් පැවසීය.
