පාණදුර උතුර පොලිසියේ සුළු පැමිණිලි අංශයේ ස්ථානාධිපතිනි ලෙස කටයුතු කරන උප පොලිස් පරීක්ෂකවරියක සිය මෝටර් රථයේ හප්පා මරණයට පත් කිරීමට තැත් කළැයි ලද පැමිණිල්ලක් අනුව ප්‍රධාන පොලිස් පරීක්ෂකවරයකුට එරෙහිව විමර්ශනයක් ආරම්භ කර ඇතැයි පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව මහතා පැවසීය.
මෙලෙස විමර්ශන ආරම්භ කර ඇත්තේ මීට වසර කීපයකට ඉහතදී එම පොලිසියේම ස්ථානාධිපති ලෙස කටයුතු කර තිබෙන මේ වන විට පොලිස් ක්‍ෂේත්‍ර බළකා මූලස්ථානයේ සේවයේ නියුතු ප්‍රධාන පොලිස් පරීක්ෂකවරයකුට එරෙහිවය.
ඉකුත්දා (21) ජනාධිපතිවරණයට පසු දින පෙරවරු 6 සිට පශ්චාත් මැතිවරණ සමයට සමගාමීව පාණදුර ජුබිලි හන්දිය පොලිස් මාර්ග බාධකයේ දහවල් 12 දක්වා රාජකාරි නිරතව සිටි උප පොලිස් පරීක්ෂකවරිය තම පෞද්ගලික යතුරුපැදියෙන් පොලිස් ස්ථානය වෙත පැමිණීමේදී එම පොලිසියට අනුබද්ධව ජංගම සංචාරයේ යෙදවූ වෑන් රථයක් පල්ලියමුල්ල හන්දියට ආසන්නයේ නතර කර තිබෙනු දැක යතුරුපැදියෙන්ම වෑන් රථය අසලට ගොස් එහි නිලධාරීන් සමඟ රාජකාරී කටයුත්තක් සම්බන්ධයෙන් යතුරුපැදියේ සිටම සාකච්ඡා කරමින් සිටියදී මොරටුව දෙස සිට පාණදුර දෙසට මෝටර් රථය පදවාගෙන ආ නිල ඇඳුමින් සැරසුණු ප්‍රධාන පොලිස් පරීක්ෂකවරයා මෝටර් රථය යතුරුපැදියේ හිතාමතාම ගැටීමට සලස්වා අනතුරුව තමන්ට එම නිලධාරියා බැණවැදුණු බව පවසමින් පැමිණිල්ලක් කරමින් රෝහල්ගත වී ඇත.
එම නිලධාරියා හිතාමතා අනතුර සිදු කරන අවස්ථාවේදී ජංගම වෑන් රථයේ උප පොලිස් පරීක්ෂකවරයකු ඇතුළු පොලිස් නිලධාරීනියන් කීපදෙනකු ද සිටි බවත් එම මාර්ගයේ ඔහුට මෝටර් රථය ධාවනය කිරීමට ඕනෑ තරම් ඉඩ තිබූ බවත් ඇය කරන ලද පැමිණිල්ලේ වැඩිදුරටත් සඳහන්ය.
අනතුරෙන් පසු අනතුර සිදු කළ ප්‍රධාන පොලිස් පරීක්ෂකවරයා ද පාණදුර උතුර පොලිසිය වෙත පැමිණ උප පොලිස් පරීක්ෂකවරිය තමන්ට ගමන් කිරීමට නියමිත මාර්ගය අවුරාගෙන සිටීම හේතුවෙන් අනතුර වූ බවත් හිතාමතා සිදු නොකළ බව පවසමින් ඇයට විරුද්ධව පැමිණිල්ලක් ද සිදු කර තිබූ බවත් පොලිස් ආරංචි මාර්ග සඳහන් කරයි.
ප්‍රධාන පොලිස් පරීක්ෂකවරයා ද පාණදුර උතුර පොලිස් බලප්‍රදේශයේම පදිංචිව සිටින අතර ඔහු නිල ඇඳුම අවභාවිත කරමින් අවට පදිංචිකරුවන් සමඟ ද නිරතුරුව වතුර කානුවට, මල් වැලට ආදි විවිධ හේතූන් මත බහින්බස්වීම් ආදි සිදුවීම් කීපයක් හේතුවෙන් පාණදුර උතුර පොලිසියට ලද පැමිණිලි ගණනාවක් උප පොලිස් පරීක්ෂකවරිය අපක්ෂපාතීව විසඳීම හේතුවෙන් ඇය සමඟ උරණ වීමට හේතුවක් වී ඇතැයි ද ඊට අමතරව ඔහු පාණදුර උතුර පොලිසියේ ස්ථානාධිපති ලෙස සේවය කරන අවධියේදී මෙම උප පොලිස් පරීක්ෂකවරිය කාන්තා පොලිස් කොස්තාපල්වරියක් වීමද තවත් එක් හේතුවක් වී ඇතැයි පොලිස් ආරංචි මාර්ග සඳහන් කරයි.
මීට මාස කීපයකට ඉහතදී මොරටුව ප්‍රදේශයේදී ද එම නිලධාරියාම උප පොලිස් පරීක්ෂකවරියව මෝටර් රථයේ හප්පා අනතුරට ලක් කිරීමට උත්සාහ දරා ඇතැයි ද පොලිස් ආරංචි මාර්ග වැඩිදුරටත් සඳහන් කරයි.
ප්‍රධාන පොලිස් පරීක්ෂකවරයා කරන ලද පැමිණිල්ල හා උප පොලිස් පරීක්ෂකවරිය කරන ලද පැමිණිල්ල සම්බන්ධයෙන් සීසීටීවී දර්ශනද ලබාගෙන එම අවස්ථාවේදී පොලිස් ජංගම වෑන් රථයේ සිටි පොලිස් නිලධාරීන්ගෙන් ද ප්‍රකාශ ලබාගෙන විමර්ශන සිදු කර අධිකරණයේ නඩු පැවරීමට අවශ්‍ය වුවහොත් එය සිදු කිරීමටත් එසේ නැති නම් විනයානුකූලව කටයුතු කිරීමට අවශ්‍ය කටයුතු කරන බව තල්දූව මහතා වැඩිදුරටත් පැවසීය.
