ජාතික රූපවාහිනියේ නව සභාපතිවරයා ලෙස ආචාර්ය සෙනේෂ් දිසානායක බණ්ඩාර, ස්වාධීන රූපවාහිනී සේවයේ නව සභාපතිවරයා ලෙස ජ්‍යෙෂ්ඨ මාධ්‍යවේදී ප්‍රියන්ත වෙදමුල්ල සහ ශ්‍රී ලංකා ගුවන් විදුලි සංස්ථාවේ නව සභාපතිවරයා ලෙස ආචාර්ය උදිත ගයාෂාන් මහත්වරු පත්කර තිබේ.
ජනමාධ්‍ය ඇමැති විජිත හේරත් මහතා අතින් නව සභාපතිවරු සිය පත්වීම් ලිපි ජනමාධ්‍ය අමාත්‍යාංශයේදී ඊයේ (25) පෙරවරුවේ ලබා ගත්හ. චිත්‍රපට සහ රූපවාහිනී වැඩසටහන් අධ්‍යක්ෂවරයකු, තිර රචකයකු, ශ්‍රී ජයවර්ධනපුර විශ්වවිද්‍යාලයේ ජ්‍යෙෂ්ඨ කථිකාචාර්යවරයකු වන ආචාර්ය සෙනේෂ් දිසානායක බණ්ඩාර මහතා, ජනසන්නිවේදනය පිළිබඳ ශාස්ත්‍රවේදී උපාධිය, ජනසන්නිවේදනය පිළිබඳ ශාස්ත්‍රපති උපාධිය, ජනසන්නිවේදනය පිළිබඳ දර්ශනසූරී උපාධිය හිමිකරගෙන තිබේ.
ආචාර්ය උදිත ගයාෂාන් මහතා කැලණිය විශ්වවිද්‍යාලයේ නාට්‍ය හා රංග කලාව සහ ලලිත කලා අධ්‍යයන අංශයේ පීඨාධිපති, කැලණිය විශ්වවිද්‍යාලයේ ජ්‍යෙෂ්ඨ කථිකාචාර්යවරයකු හා ශ්‍රී ලංකා ජාතික ඡායාරූප කලා සංගමයේ හිටපු සභාපතිවරයකු ද වේ. ප්‍රියන්ත වෙදමුල්ල මහතා විශේෂාංග ලේඛකයකු, ජනමාධ්‍යවේදියකු, වැඩසටහන් නිෂ්පාදකවරයකු සහ අධ්‍යක්ෂවරයකු, ශ්‍රී ජයවර්ධනපුර විශ්වවිද්‍යාලයේ ජ්‍යෙෂ්ඨ කථිකාචාර්යවරයකු, ජාත්‍යන්තර සබඳතා තුළ දේශපාලන විද්‍යාව පිළිබඳ ශාස්ත්‍රවේදී විශේෂ උපාධිය, සංචාරක ආර්ථික විද්‍යාව සහ හෝටල් කළමනාකරණය පිළිබඳ ශාස්ත්‍රපති උපාධිය, කළමනාකරණය පිළිබඳ ආචාර්ය උපාධිය හිමිකරගෙන තිබේ.
